KA MOQEBELO oa la 24 January 2015, ha ho ne ho tšoeroe lenaneo la ho nehela lekala la Madagascar, morali’abo rōna e mong o ile a re: “Ke thabile haholo.” Eena hammoho le baeti ba bang ba 583 ba ne ba hloletsoe ha ba bona mohaho o mocha oa bolulo o nang le likamore tse 19, hammoho le phaposi ea ho jela e atolositsoeng le kichine e nchafalitsoeng. Lefapha la Tšebeletso, la Liak’haonte le la Kaho a ile a ekeletsoa liofisi. Ho phaella moo, lefapha la Audio/Video le la Puo ea Matsoho a ile a etsetsoa listudio tse ncha ’me ha thehoa Lefapha la Mongolo oa Braille. Ka mor’a hore baeti ba utloe pale e khutšoanyane ka mosebetsi oa boboleli naheng ea Madagascar, ba ile ba thabela ho utloa puo ea ho nehela lekala e ileng ea fanoa ke Mor’abo rōna Mark Sanderson oa Sehlopha se Busang.

 Batho ba Jehova ba ile ba thaba haholo motseng oa Jakarta, Indonesia, ha lipula tse matla li emisa ka nako e loketseng hore ho neheloe mehaho e mecha ea lekala ka la 14 February, 2015. Hona joale ofisi ea lekala e mokatong o le mong kaofela mohahong o molelele oa liofisi o nang le mekato e 42 le mekatong e 12 mohahong o mong oa lifolete o haufinyane. Mafapha a ’maloa a Bethele a sebeletsa mehahong e menyenyane e haufinyane. Mor’abo rōna Anthony Morris oa Sehlopha se Busang o ile a fana ka puo ea ho nehela lekala, ’me letsatsing le latelang, batho ba 15 257 ba ile ba bokana lebaleng la bolo ho tla mamela ha a fana ka puo e reng, “Le ’ne le Mamelle Mosebetsing o Molemo.” Lenaneo le ile la hokeloa ka Inthanete libakeng tse ling tse 41 ’me la mameloa ke batho ba 11 189, e leng seboka se seholo ka ho fetisisa sa batho ba Jehova se kileng sa e-ba teng Indonesia. Ronald Jacka, e leng e mong oa baromuoa ba pele ba ileng ba ea Indonesia, o ile a re: “Ha ke fihla mona ka 1951, ho ne ho e-na le bahoeletsi ba 26 feela naheng eohle. Empa kajeno, batho ba fetang 26 000 ba bile teng lenaneong lena le khethehileng. Ka sebele Jehova o hlohonolofalitse batho ba hae naheng ea Indonesia!”