BONA monna eo ea ka metsing. Na ha a tsietsing e khōlō? Tlhapi eo e tloha e mo koenya! Na u tseba monna eo? Lebitso la hae ke Jonase. A re bone hore na o kene joang tsietsing ena e khōlō.

Jonase ke moprofeta oa Jehova. Nakoana ka mor’a lefu la moprofeta Elisha Jehova o re ho Jonase: ‘E-ea motseng o moholo oa Ninive. Batho ba moo ba babe haholo, ’me ke batla u buisane le batho ba teng ka hona.’

Empa Jonase ha a batle ho ea moo. Joale o kena sekepeng se sa eeng Ninive. Jehova ha a thabele ha Jonase a baleha. Joale O tsosa moea o matla. O matla hoo sekepe se leng kotsing ea ho teba. Basesisi ba sona ba tšohile haholo, ’me ba kōpa thuso ho melimo ea bona.

Qetellong Jonase o re ho bona: ‘Ke rapela Jehova, Molimo ea entseng leholimo le lefatše. ’Me ke baleha seo Jehova a itseng ke se etse.’ Kahoo basesisi ba sekepe baa botsa: ‘Joale re etse’ng ka uena ho emisa moea?’

Jonase o re: ‘Ntiheleng ka leoatleng, joale leoatle le tla boela le khutse.’ Basesisi ba sekepe ha ba rate, empa ha moea o ba matla haholo ba lihela Jonase. Hona hoo feela moea oa emisa, ’me leoatle le boetse lea khutsa.

Ha Jonase a teba ka metsing, o koenngoa ke tlhapi e khōlō. Empa ha a shoe. Ka matsatsi a mararo le masiu a mararo o ka mpeng ea tlhapi eo. Jonase o soabetse hore ebe ha aa mamela Jehova ’me a ea Ninive. Na u tseba seo a se etsang joale?

Jonase o rapela hore Jehova a mo thuse. Joale Jehova o etsa hore tlhapi e hlatsetse Jonase moo ho omileng. Ka mor’a moo Jonase o ea Ninive. Na hoo ha ho re rute kamoo e leng habohlokoa kateng hore re etse sohle seo Jehova a se bolelang?