AK’U bone lelapa lena le leholo. Bana ke bara ba 12 ba Jakobo. O ne a boetse a e-na le barali. Na u tseba a mang a mabitso a bana ba hae? A re ke re ithute ’ona.

Lea o tsoetse Rubene, Simeone, Levi le Juda. Eitse ha Ragele a bona hore ha a be le bana, a utloa bohloko haholo. Eaba o fa Jakobo lekhabunyane la hae Bilha, ’me Bilha a ba le bara ba babeli ba bitsoang Dane le Nefthali. Lea le eena a fa Jakobo lekhabunyane la hae Zilpa, ’me Zilpa a tsoala Gade le Ashere. Qetellong Lea a ba le bara ba bang ba babeli, e leng Isakare le Zabulone.

Qetellong Ragele o ile a ba le ngoana. O ile a mo reha Josefa. Re tla ithuta ho eketsehileng ka Josefa hamorao, kaha e bile motho oa bohlokoa haholo. Bana ke bara ba 11 ba tsoaletsoeng Jakobo ha a ntse a lula le Labane, ntate oa Ragele.

Jakobo o ne a boetse a e-na le barali, empa Bibele e re bolella lebitso la a le mong feela. Lebitso la hae ke Dina.

Ho ile ha fihla nako ea hore Jakobo a etse qeto ea hore o siea Labane ’me o khutlela Kanana. Kahoo o ile a bokella lelapa la hae le leholo le mehlape ea hae e meholo ea linku le likhomo, a qala leeto le lelelele.

Ka mor’a nakoana Jakobo le ba lelapa la hae ba khutletse Kanana, Ragele o ile a ba le mora e mong. O hlahile ba ntse ba le leetong. Ragele o ile a tšoaroa ke mahlaba a bohloko, a ileng a qetella a mo bolaile ha a ntse a e-ba le ngoana. Empa ngoana eo oa moshemane eena a phela. Jakobo a mo reha Benjamine.

Re batla ho hopola mabitso a bara ba 12 ba Jakobo kaha sechaba sohle sa Iseraele se tsoile ho bona. Ha e le hantle, meloko e 12 ea Iseraele e reheletsoe ka bara ba 10 ba Jakobo le ba babeli ba Josefa. Isaka o ile a phela lilemo tse ngata bashemane bana bohle ba se ba le teng, ’me e tlameha ebe o ne a thabetse ho ba le litloholo tse ngata joalo. Empa a re bone se ileng sa etsahalla setloholo se seng sa hae, e leng Dina.