HO NA le phapang efe setšoantšong see? E, se na le batho. Ke monna oa pele le mosali oa pele. Ba entsoe ke mang? Ke Molimo. Na u tseba lebitso la Molimo? Ke Jehova. ’Me monna eo le mosali eo ba ile ba bitsoa Adama le Eva.

Jehova Molimo o entse Adama tjena. O ile a nka lerōle mobung ’me ka lona a etsa ’mele o motle, ’mele oa monna. A ntan’o hemela monna ka linkong, eaba Adama oa phela.

Jehova Molimo o ne a e-na le mosebetsi oo a batlang hore Adama a o etse. O ile a re Adama a rehe liphoofolo tsohle mabitso. Mohlomong Adama o ile a qeta nako e telele a shebile liphoofolo e le hore a rehe e ’ngoe le e ’ngoe lebitso le e tšoanelang hantle. Ha a ntse a li reha mabitso, o ile a bona ntho e ’ngoe. Na ua tseba hore na o ile a bona eng?

Liphoofolo kaofela li ne li e-na le balekane. Ho ne ho e-na le bo-ntate tlou le bo-’mè tlou, hape ho e-na le bo-ntate tau le bo-’mè tau. Empa Adama eena o ne a se na molekane. Eaba Jehova o robatsa Adama boroko bo tebileng, ’me a ntša khopo ho eena. Jehova a sebelisa khopo eo ho etsetsa Adama mosali, ea e-ba mosali oa hae.

Joale Adama a thaba haholo! Ak’u inahanele kamoo Eva a ileng a thaba kateng ha a behoa serapeng seo se setle hore a phele ho sona! Joale ba ne ba ka ba le bana ’me ba phela hammoho ka thabo.

Jehova o ne a batla hore Adama le Eva ba phele ka ho sa feleng. O ne a batla hore ba etse hore lefatše lohle le be letle joaloka serapa sa Edene. E tlameha ebe Adama le Eva ba ile ba thaba hakaakang ha ba nahana ka seo! Na u ne u sa tl’o rata hore le uena u etse lefatše serapa se setle joalo? Empa thabo ea Adama le Eva e ile ea fela kapele. A re bone lebaka.