1-6. Pheta phihlelo e bontšang hore Lipaki Tsa Jehova li bolela litaba tse monate maemong a fapa-fapaneng.

 NGOANANA ea bitsoang Rebecca ke Paki ea Jehova Ghana ’me o re sekolo e ne e le tšimo ea hae. O ne a lula a e-na le lingoloa tsa Lipaki Tsa Jehova ka mokotleng oa hae oa libuka tsa sekolo. Nakong ea khefu, o ne a lula a le malala-a-laotsoe ho pakela liithuti-’moho le eena. Ho na le liithuti tse ’maloa tseo Rebecca a ileng a ithuta Bibele le tsona.

² Sehlekehlekeng sa Madagascar, haufi le lebopo le ka bochabela la Afrika, ho na le bo-pula-maliboho ba babeli ba neng ba tloaetse ho tsamaea lik’hilomithara tse 25 mochesong o ntšang koena bolibeng ba e-ea motsaneng o hole. Ha ba fihla teng ba ne ba ithuta Bibele le batho ba ’maloa ba thahasellang.

³ Lipaki tsa Paraguay hammoho le baithaopi ba tsoang linaheng tse ling tse 15 ba ile ba etsa seketsoana e le hore ba ka khona ho etela batho ba lulang haufi le noka ea Paraguay le ea Paraná. Batho ba 12 ba ka lula ka har’a seketsoana seo se boima ba lithane tse 45. Baboleli ba ’Muso ba chesehang ba lulang seketsoaneng sena ba phatlalalitse litaba tse monate libakeng tseo ho seng bonolo ho fihla ho tsona.

⁴ Leboea le Hole, Lipaki tsa Alaska li ne li sebelisa monyetla o ikhethang oa ho paka hlabula ha ho e-na le bahahlauli ba bangata. Ha ho futhumala, likepe tse kholo tsa baeti ba lichaba tse fapa-fapaneng li ne li fihla sebakeng sena, ’me Lipaki tsa moo li ne li ema boema-kepeng li tšoere lingoliloeng tsa rona ka lipuo tse sa tšoaneng. Sebakeng sona seo, sefofane se ile sa thusa haholo bakeng sa hore ho fihloe metsaneng e hole, e le hore batho ba buang lipuo tse kang Sealeute, Seathabaska, Setsimshiane le Setlingite ba ka bolelloa litaba tse monate.

⁵ Larry oa Texas, U.S.A., o ne a e-na le tšimo e khethehileng—o ne a pakela batho lehaeng la batho ba hlokang tlhokomelo leo a neng a lula ho lona. Le hoja Larry a tsamaea ka wheelchair ka lebaka la kotsi e ileng ea mo hlahela, o ne a lula a le maphathaphathe. O ne a bolella ba bang molaetsa oa ’Muso, hammoho le tšepo eo a e fumaneng Bibeleng ea hore o tla boela a khona ho tsamaea ha ’Muso oo o se o busa.—Esa. 35:5, 6.

⁶ Lipaki tse ling li ile tsa tsamaea matsatsi a mararo ka seketsoana li tloha Mandalay li ea kopanong karolong e ka leboea ea Myanmar. Kaha li ne li labalabela ho bolela litaba tse monate, li ile tsa tsamaea li nkile lingoliloeng tse thehiloeng Bibeleng, tseo li neng li li fa baeti. Nako le nako  ha seketsoana seo se ema toropong kapa motsaneng o itseng, baboleli bao ba mahlahahlaha ba ne ba itlhahanella motseng, ba fa batho lingoliloeng. Ka nako e tšoanang, ho ne ho palama baeti ba bacha seketsoaneng seo, ebe baboleli bao ba ’Muso ba fumana “tšimo e ncha” ha ba khutla.

7. Barapeli ba Jehova ba paka ka ’Muso oa Molimo ka litsela life, hona morero oa bona ke ofe?

⁷ Joalokaha mehlala ea bara le barali ba bo rona e bontša, barapeli ba Jehova ba chesehang lefatšeng ka bophara ba fana ka “bopaki bo hlakileng ka ’Muso oa Molimo.” (Lik. 28:23) Ba ea ka ntlo le ntlo, ba ngola mangolo, ba bua le batho seterateng le ka fono. Ebang ba palame bese, ba otlolla maoto serapeng sa boikhathollo kapa ba khefulitse mosebetsing, ba lula ba le malala-a-laotsoe ho paka ka ’Muso oa Molimo. Ba sebelisa litsela tse fapa-fapaneng empa morero oa bona oa tšoana—ke ho bolela litaba tse monate hohle moo batho ba leng teng.—Mat. 10:11

8, 9. (a) Ke hobane’ng ha se finyeletsoeng mosebetsing oa ho bolela ka ’Muso se hlolla? (b) Ho hlaha potso efe e thahasellisang, hona ho hlokahala re etse’ng hore re fumane karabo?

⁸ ’Mali ea ratehang, na u e mong oa baboleli ba ’Muso ba bangata bao hona joale ba bolelang litaba tse monate linaheng tse fetang 235? Haeba ho joalo, u kentse letsoho kholong e thabisang ea mosebetsi oa ho bolela ka ’Muso! Se finyeletsoeng mosebetsing oa boboleli lefatšeng ka bophara sea hlolla. Ho sa tsotellehe litšitiso le mathata a boima—ho akarelletsa le ho thibeloa ke mebuso le ho hlorisoa—Lipaki Tsa Jehova li fana ka bopaki bo hlakileng ka ’Muso oa Molimo bathong ba lichaba tsohle.

⁹ Potso e thahasellisang ke ena, Ke hobane’ng ha litšitiso, esita le khanyetso ea Satane, li sa thibela mosebetsi oa ho bolela ka ’Muso? E le ho araba potso eo, ho hlokahala hore re nahane ka se ileng sa etsahala lekholong la pele la lilemo C.E. Etsoe, rona Lipaki Tsa Jehova tsa kajeno re mpa re ntšetsa pele mosebetsi o qaliloeng nakong eo.

10. Jesu o ne a iteletse mosebetsi ofe, ’me o ne a tseba eng ka oona?

¹⁰ Mothehi oa phutheho ea Bakreste, e leng Jesu Kreste, o ne a iteletse mosebetsi oa ho bolela litaba tse monate tsa ’Muso oa Molimo; o ne o le maling. O kile a re: “Ke tlameha ho ea metseng e meng ke hase molaetsa ona o monate oa ’Muso oa Molimo, hobane ke rometsoe ho etsa joalo.” (Luka 4:43) Jesu o ne a tseba hore mosebetsi ona oo a o simollang a ke ke a o phetha a le mong. Nakoana pele a e-shoa, o ile a profeta hore molaetsa oa ’Muso o ne o tla boleloa “lichabeng tsohle.” (Mar. 13:10) Leha ho le joalo, mosebetsi oo o ne o tla etsoa joang, hona o etsoa ke bo-mang?

11. Jesu o ile a fa barutuoa ba hae mosebetsi ofe oa bohlokoa, ’me ba ne ba tla tšehetsoa joang hore ba o etse?

¹¹ Ka mor’a hore Jesu a shoe ’me a tsohe bafung, o ile a hlaha ho barutuoa ba  hae ’me a ba fa mosebetsi oa bohlokoa, a re: “Ka hona, e-eang le etse batho ba lichaba tsohle barutuoa, le ba kolobetse ka lebitso la Ntate le la Mora le la moea o halalelang, le ba rute ho mamela lintho tsohle tseo ke le laetseng tsona. Ke na le lona ka matsatsi ’ohle ho fihlela lefatše le fela.” (Mat. 28:19, 20) Mantsoe a reng “ke na le lona” a ne a bontša hore o tla tšehetsa barutuoa mosebetsing oa ho bolela le ho etsa barutuoa. Ho ne ho tla hlokahala hore Jesu a ba tšehetse, hobane o ne a profetile hore ‘lichaba tsohle li tla ba hloea.’ (Mat. 24:9) Barutuoa ba ne ba tla boela ba fumana thuso e tsoang mohloling o mong. Nakoana pele Jesu a nyolohela leholimong o ile a ba bolella hore moea o halalelang o tla ba matlafatsa hore e be lipaki tsa hae ho isa “karolong e hole-hole ea lefatše.”—Lik. 1:8.

12. Ho hlaha lipotso life tsa bohlokoa, ’me ke hobane’ng ha e le habohlokoa hore re tsebe likarabo?

¹² Joale ho hlaha lipotso tsa bohlokoa: Na baapostola ba Jesu le barutuoa ba bang ba lekholong la pele la lilemo ba ile ba nka mosebetsi oa bona ka ho teba? Na sehlotšoana see sa banna le basali ba Bakreste se ile sa fana ka bopaki bo hlakileng ka ’Muso oa Molimo ho sa tsotellehe mahloriso a sehloho? Na kannete ba ile ba fumana thuso e tsoang ho Jehova, Jesu, mangeloi le moea o halalelang mosebetsing oa bona oa ho etsa barutuoa? Buka ea Bibele ea Liketso e araba lipotso tsena hammoho le tse ling tse tšoanang le tsona. Ke habohlokoa hore re tsebe likarabo tsa tsona. Hobane’ng? Jesu o ile a tšepisa hore mosebetsi oo a faneng ka oona o ne o tla tsoela pele “ho fihlela lefatše le fela.” Ka lebaka leo, mosebetsi ona o lokela ho etsoa ke Bakreste bohle ba ’nete, ho akarelletsa le rona ba phelang nakong ena ea bofelo. Ka lebaka leo re thahasella haholo tlaleho e bukeng ea Liketso ea lintho tse etsahetseng nakong e fetileng.

13, 14. (a) Ke mang ea ngotseng buka ea Liketso, hona o ile a fumana litaba tsa eona joang? (b) Buka ea Liketso e bua ka eng?

¹³ Ke mang ea ngotseng buka ea Liketso? Ha ho moo buka ena e bolelang mongoli oa eona ka lebitso, empa selelekela sa eona se bontša ka ho hlaka hore Liketso le Kosepele ea Luka li ngotsoe ke motho a le mong. (Luka 1:1-4; Lik. 1:1, 2) Kahoo, ho tloha khale, ho ’nile ha lumeloa hore Luka, e leng “ngaka e ratoang” le rahistori ea hlokolosi, ke eena ea ngotseng Liketso. (Bakol. 4:14) Buka ena e hlalosa litaba tse etsahetseng ka lilemo tse 28, ho tloha ha Jesu a nyolohela leholimong ka 33 C.E. ho fihlela ha moapostola Pauluse a kenngoa teronkong Roma hoo e ka bang ka 61 C.E. Hore ebe Luka ha a sa re “ba” o se a re “re” tlalehong ena ho bontša hore o ne a le teng ha lintho tse ngata tseo a buang ka tsona li etsahala. (Lik. 16:8-10; 20:5; 27:1) Kaha Luka o ne a fuputsa ka hloko, ha ho pelaelo hore o ile a fumana litaba ka ho toba ho Pauluse, Barnabase, Filipi le ba bang bao a buileng ka bona.

¹⁴ Buka ea Liketso e bua ka eng? Kosepeleng eo Luka a e ngotseng pejana, o ile a bua ka lintho tseo Jesu a li entseng le tseo a li buileng. Leha ho le joalo, bukeng ea Liketso Luka o bua ka lintho tseo balateli ba Jesu ba li buileng le tseo  ba li entseng. Ka hona, Liketso e bua ka batho ba ileng ba etsa mosebetsi o tsoileng matsoho, le hoja ba bang ba ne ba nka hore bongata ba bona ke “batho feela ba tloaelehileng ba sa rutehang.” (Lik. 4:13) Ka bokhutšoanyane, buka ena e bululetsoeng e re bolella kamoo phutheho ea Bakreste e qalileng kateng le kamoo e ileng ea hola kateng. Buka ea Liketso e bontša kamoo Bakreste ba lekholong la pele la lilemo ba neng ba bolela litaba tse monate kateng—mekhoa eo ba neng ba e sebelisa le kamoo ba neng ba nka mosebetsi ona kateng. (Lik. 4:31; 5:42) E hlalosa hore na moea o halalelang o ile oa ba thusa joang ha ba bolela litaba tse monate. (Lik. 8:29, 39, 40; 13:1-3; 16:6; 18:24, 25) Liketso e totobatsa sehlooho sa Bibele, se amanang le ho halaletsoa ha lebitso la Molimo a sebelisa ’Muso oa hae oo Kreste e leng morena oa oona, ’me e bontša kamoo Bakreste ba ileng ba bolela molaetsa oa ’Muso kateng leha ba hanyetsoa ka matla.—Lik. 8:12; 19:8; 28:30, 31.

15. Re tla rua molemo joang ka ho bala buka ea Liketso?

¹⁵ Ka sebele, ho bala buka ea Bibele ea Liketso hoa thabisa ebile ho matlafatsa tumelo! Ho nahana ka mohlala oa balateli ba Kreste ba pele ba sebete le ba chesehang ho tla re susumetsa ka matla. Re tla susumelletseha ho ba le tumelo e kang ea bara le barali babo rona ba lekholong la pele la lilemo. Ka tsela eo re tla hlomelloa hantle hore re phethe mosebetsi oa rona oa ho ‘ea ’me re etse barutuoa.’ Morero oa buka ena eo u ntseng u e bala ke ho u thusa ho ithuta buka ea Liketso ka hloko.

16. Buka ee e reretsoe ho etsa lintho life tse tharo?

¹⁶ Buka ee e ngotsoe ka morero ofe? Buka ena e reretsoe ho etsa lintho tse tharo, e leng (1) ho re kholisa haholoanyane hore Jehova o sebelisa moea oa hae o halalelang ho tšehetsa mosebetsi oa ho bolela ka ’Muso le ho etsa barutuoa, (2) ho re susumetsa hore re chesehe tšebeletsong ka ho hlahloba mohlala oa balateli ba Kreste ba lekholong la pele la lilemo, le (3) ho re thusa ho hlompha mokhatlo o hlophisitsoeng oa Jehova haholoanyane le ho hlompha ba etellang pele mosebetsing oa boboleli le oa ho alosa liphutheho.

17, 18. Buka ee e ngotsoe joang, hona e na le litšobotsi life tse tla re tsoela molemo ha re etsa thuto ea botho ea Bibele?

¹⁷ Buka ee e ngotsoe joang? U tla hlokomela hore e arotsoe likarolo tse robeli, ’me e ’ngoe le e ’ngoe e tšohla karolo e itseng ea buka ea Liketso. Morero oa likhaolo tse latelang hase ho hlalosa temana e ’ngoe le e ’ngoe ea Liketso, empa ke ho bontša hore na re ka ithuta eng liketsahalong tse boletsoeng bukeng eo ea Bibele le ho re thusa ho bona kamoo re ka sebelisang lintlha tseo re ithutileng tsona. Qalong ea khaolo ka ’ngoe, ho na le karolo e hlalosang moko-taba ’me ho na le Lengolo le bontšang karolo ea Liketso e tla tšohloa.

¹⁸ Ho na le lintho tse ling bukeng ena tse tla re tsoela molemo ha re etsa thuto ea botho ea Bibele. Litšoantšo tse ntle tse bontšang liketsahalo tse susumetsang maikutlo tse boletsoeng bukeng ea Liketso li tla u thusa hore ha u ntse u  nahana ka tlaleho ena ea Bibele u bone se neng se etsahala. Likhaolo tse ngata li na le mabokose a nang le lintlha tse eketsehileng tse molemo. Mabokose a mang a bua ka motho ea itseng ka Bibeleng eo tumelo ea hae e leng mohlala oo re ka o etsisang. A mang a fana ka lintlha tse eketsehileng ka libaka, liketsahalo, mekhoa kapa batho ba bang ba boletsoeng ho Liketso.

19. Re lokela ho itekola joang nako le nako?

¹⁹ Buka ena e ka u thusa hore u itekole. Ho sa tsotellehe hore na ke nako e kae u le ’moleli oa ’Muso, ke hantle hore nako le nako u iphe nako ea ho bona hore na ke lintho life tseo u li nkang e le tsa bohlokoa le hore na u ikutloa joang ka tšebeletso ea Bokreste. (2 Bakor. 13:5) Ipotse: ‘Na tšebeletso ea ka e bontša hore ke lula ke hopola hore nako e lekane motinyane? (1 Bakor. 7:29-31) Na ha ke bolela litaba tse monate ke bontša hore ke kholisehile ebile kea cheseha? (1 Bathes. 1:5, 6) Na ke ikakhela ka setotsoana mosebetsing oa ho bolela le ho etsa barutuoa?’—Bakol. 3:23.

20, 21. Ke hobane’ng ha mosebetsi oa rona e le oa bohlokoa hakaale, hona re lokela ho ikemisetsa ho etsa’ng?

²⁰ A re luleng re hopola hore re laetsoe ho etsa mosebetsi oa bohlokoa—e leng ho bolela le ho etsa barutuoa. Ha letsatsi ka leng le ntse le feta, mosebetsi oo e ntse e e-ba oa bohlokoa le ho feta. Bofelo ba tsamaiso ena ea lintho bo atamela ka potlako. Ha ho mohla bophelo ba batho ba bangata bo kileng ba e-ba kotsing hakana! Ha re tsebe hore na ke batho ba bakae ba nang le tšekamelo e nepahetseng ba sa ntseng ba tla amohela molaetsa oa rona. (Lik. 13:48) Empa re na le boikarabelo ba ho ba thusa, esere ra haha serobe phiri e se e jele.—1 Tim. 4:16.

²¹ Kahoo, ke habohlokoa hore re etsise mohlala oa baboleli ba ’Muso ba chesehang ba lekholong la pele la lilemo. E se eka ha u ntse u ithuta buka ena ka hloko u ka susumelletseha ho bolela litaba tse monate ka cheseho e kholo le sebete. ’Me e se eka u ka ikemisetsa haholoanyane ho tsoela pele u fana ka “bopaki bo hlakileng ka ’Muso oa Molimo.”—Lik. 28:23.