’Moleli oa ’Muso ea Ratehang:

Nahana u se u le e mong oa baapostola ba emeng Thabeng ea Mehloaare. U bona Jesu a hlaha ka pel’a hao. Ha a se a tla nyolohela leholimong, o re: “Ha le fumana moea o halalelang, le tla ba le matla ’me le tla ba lipaki tsa ka Jerusalema, libakeng tsohle tsa Judea le Samaria le karolong e hole-hole ea lefatše.” (Lik. 1:8) U ne u tla ikutloa joang?

Mohlomong u ne u tla nka hore mosebetsi oo o boima. U ne u ka ’na oa re, ‘Re ka khona joang ho paka “le karolong e hole-hole ea lefatše” re le barutuoa ba fokolang hakaale ka palo?’ E ka ’na eaba u hopola temoso eo Jesu a ileng a fana ka eona bosiung ba pele a shoa, ha a re: “Lekhoba ha le leholo ho mong’a lona. Haeba ba ntlhorisitse le lona ba tla le hlorisa. Haeba ba ’mametse le lona ba tla le mamela. Ba tla le hlorisa ka lebaka la lebitso la ka hobane ha ba tsebe ea nthomileng.” (Joh. 15:20, 21) Ha u nahana ka mantsoe ao, u ka ’na ua ipotsa, ‘Re ka fana ka bopaki bo hlakileng joang har’a khanyetso le mahloriso a makaalo?’

Le kajeno re ipotsa lipotso tse tšoanang le tseo. Mosebetsi oo re o filoeng re le Lipaki Tsa Jehova o hloka hore re fane ka bopaki bo hlakileng “le karolong e hole-hole ea lefatše,” ’me re pakele “batho ba lichaba tsohle.” (Mat. 28:19, 20) Mosebetsi oo o ka phethoa joang, haholo-holo ha ho profetiloe hore ho tla ba le khanyetso?

Buka ea Liketso Tsa Baapostola e re bolella kamoo ka ho hlollang Jehova a ileng a thusa baapostola le Bakreste-’moho le bona ba lekholong la pele la lilemo C.E. hore ba phethe mosebetsi oo. Buka ena eo u ntseng u e bala e reretsoe ho u thusa hore u ithute litaba tseo ’me u li thabele. U tla hlolloa ke kamoo ho nang le lintho tse ngata tseo bahlanka ba Molimo ba lekholong la pele la lilemo ba tšoanang ka tsona le batho ba hae kajeno. U tla hlokomela hore lintho tsena ha li amane le mosebetsi oo re o etsang feela empa li boetse li amana le tsela eo re hlophisitsoeng ka eona hore re etse mosebetsi oo. Ruri ho nahanisisa ka lintho tsena ho tla etsa hore u kholisehe le ho feta hore Jehova Molimo o sa ntse a tataisa karolo e lefatšeng ea mokhatlo oa hae o hlophisitsoeng.

Re na le tšepo ebile re rapella hore ha u ntse u ithuta buka ea Liketso u tla ba le tumelo e tiileng ea hore Jehova o tla u thusa le hore matla a moea oa hae o halalelang a tla u tšehetsa. Ka lebaka leo, e se eka u ka tsoela pele u fana ka “bopaki bo hlakileng ka ’Muso oa Molimo” le ho thusa ba bang hore ba tsamaee tseleng e isang polokong.—Lik. 28:23; 1 Tim. 4:16.