Mohlankana e mong oa Uganda ea bitsoang Thomson, o ne a khathetse ke bolumeli. Kaha o ne a tennoe ke tsela eo baruti ba lulang ba kōpa chelete ka eona, o ile a khaotsa ho ea kerekeng. Leha ho le joalo, ha aa ka a khaotsa ho bala Bibele letsatsi le letsatsi. O ne a rata buka ea Tšenolo hoo a bileng a leka ho e hlalosa le ho ngola lintlha. Ha mora e mong oabo rōna a kopana le  Thomson moo a neng a sebetsa teng, o ne a ntse a bala Bibele. Ba ile ba tsoela pele ka moqoqo o monate ’me Thomson a amohela buka ea Ha e le Hantle ke Eng Seo Bibele e se Rutang? O ile a e bala kaofela bosiung bona boo. Letsatsing le hlahlamang, mor’abo rōna o ile a fumana molaetsa oa selefouno o reng: “Ke leboha Morena ka boitsebiso boo u mphileng bona. Ke se ke ikemiselitse ho tsoa Babylona e Moholo.” Thomson o ile a kōpa lingoliloeng tsohle tse boletsoeng mongolong o botlaaseng ba leqephe le lihlomathisong tsa buka eo. O ile a ikakhela ka setotsoana thutong ea Bibele, a hatela pele ka potlako ’me a kolobetsoa ka 2012 Kopanong ea Setereke ea “Sireletsa Pelo ea Hao!” Ka March 2013, Thomson o ile a qala ho sebetsa e le pula-maliboho oa kamehla, a thusa batho ba bang hore ba bone bohlokoa ba ho tsoa Babylona e Moholo.

Jimmy o hōletse Port Louis, motse-moholo oa Mauritius. O ile a qala ho noa joala ha a le lilemo li 16 ’me ka mor’a moo o ne a lula a tahiloe letsatsi le leng le le leng. Ha a tahiloe o ne a atisa ho etsa lintho tse tsoileng tseleng ’me a kena chankaneng hangata. Ka linako tse ling o ne a noa libotlolo tse 3 tsa rum ’me a tsuba lisakerete tse 60 ka letsatsi. Haeba a ne a se na chelete, o ne a noa ntho e hlatsoang lifensetere e nang le tahi. O ne a bile a noa perfume ea ’mè oa hae. Ha motho e mong a mo bolella hore ekare ke setopo se tsamaeang, o ile a ikisa setsing sa ho ntšetsa batho lithethefatsi. A lula moo selemo le likhoeli tse tšeletseng, empa ha ’na ha itšoanela feela.

Qetellong, Jimmy o ile a kopana le Lipaki Tsa Jehova eaba o amohela thuto ea Bibele. Ka linako tse ling o ne a tsamaea thuto e ntse e tsoela pele a e’o noa. O ile a qetella  a ithutile le barab’abo rōna ba robeli. Qetellong o ile a hlokomela hore o tlameha ho fetola tsela eo a phelang ka eona. O ile a re: “Ke ile ka utloa eka sabole ea moea ea Baheberu 4:12 e phunya pelo ea ka. Ka letsatsi le leng ha ke ntse ke bala Bibele ke ile ka bala Liproverbia 24:16, e reng: ‘Ea lokileng a ka ’na a oa esita le ka makhetlo a supileng, ’me ka sebele o tla ema.’ Bophelo ba ka bo ile ba fetoha letsatsing lona leo.” Jimmy o ile a ’na a “oa” a tsoha ho fihlela a ithutile le barab’abo rōna ba supileng empa ke nakong eo a neng a ithuta le oa borobeli moo a ileng a “ema” ’me a fetola bophelo ba hae. Jimmy o ile a kōpa Jehova ka tieo hore a mo matlafatse, a ea libokeng ’me a lahla mekhoa ea hae e mebe. O ile a kolobetsoa ka 2003 ’me ka 2012 ea e-ba pula-maliboho oa kamehla. Hona joale ke mohlanka ea sebeletsang phuthehong e sehlekehlekeng sa Rodrigues.

Mary oa Kenya ea lilemo li 70, e bile setho sa Kereke ea Presbyterian bophelo bohle ba hae. Hangata o ne a thusa ho bokellela kereke chelete ’me o bile a thusa kahong ea kereke e ’ngoe motseng oa habo. O ile a utloa bohloko ha e mong oa bara ba hae e e-ba Paki. Mora enoa o ne a mo mema hore a ee libokeng, empa o ne a hana, a re o batla ho utloa molaetsa oa Bibele ka puo ea habo ea Sekikuyu, eseng ka Seswahili. Qetellong, Mary o ile a lumela ho ea kopanong ea setereke e neng e tla tšoaroa ka Sekikuyu. Ha a le kopanong, o ile a lula karolong ea batho ba hōlileng. O ile a khahloa haholo ke tsela e mosa le e lerato eo a ileng a tšoaroa ka eona. O itse ha ho mohla a  kileng a bona lerato le joalo kerekeng ea hae. O ile a mamela lipuo tsohle ka hloko ’me a rata seo a se utloang. Ha aa ka a senya nako ha a kōptjoa hore a ithute Bibele ka bukana ea Listen to God.

Ka mor’a hore Mary a ithute ka likhoeli tse ’maloa, o ile a etsa qeto ea hore o batla ho ba Paki ea Jehova, eaba o itokolla kerekeng. Baeta-pele ba kereke ba ile ba halefa haholo. Ba bitsa moruti oa motse-moholo, Nairobi, hore a tl’o bua le eena. Moruti o ile a leka ho phehella Mary hore a se ke a tlohela kereke, empa a hana hehehe! Eaba moruti o re: “Metsoalle ea hao e tla ba bo-mang ha u tlohela kereke? U na le metsoalle e mengata le baahelani ba kenang kereke ena.”

Mary o ile a re: “Jehova le mangeloi e tla ba metsoalle ea ka. Le Lipaki e tla ba metsoalle ea ka.”

Moruti o ile a tsamaea ha a hlōloa ho kholisa Mary hore a tlohele kereke. Mary o ntse a tsoela pele hantle ka thuto ea Bibele ’me o ba teng libokeng tsohle tsa Bokreste, le hoja a lula hōle le moo li tšoareloang teng. Haufinyane tjena o ile a hlōloa ho fumana lipalangoang tsa sechaba ha a ea sebokeng, eaba o tsamaea har’a pula ka  lihora tse peli. Le hoja baahelani ba mo hanyetsa, o ikemiselitse ho kolobetsoa.

Cameroon ho na le ngoanana ea lilemo li 14 ea bitsoang Ashton. Ha a qala ho ithuta Bibele le Lipaki Tsa Jehova, moholoane oa ntate oa hae le mosali oa hae bao a neng a lula le bona, ba ile ba mo hanyetsa ka matla. Ba ne ba mo qobella hore a ee le bona kerekeng ea Pentekonta. Ha ba le tšebeletsong e ’ngoe ea kereke, moruti o ile a beha bohle matsoho, a re o ba tšollela “moea” e le hore ba oele fatše. Ashton ha aa ka a oa. Moruti o ile a rapela ka makhetlo, empa Ashton ha aa ka a oa. Kahoo, moruti o ile a mo khopa hore a oe! Ha a fihla lapeng, o ile a bolella moholoane oa ntate oa hae le mosali oa hae hore moruti o ile a mo khopa, empa ha baa ka ba lumela. O ile a etsa qeto hona hoo hore a ke ke a hlola a ea kerekeng. Kajeno, le hoja Ashton a hanyetsoa ke beng ka eena le baahelani, o ntse a ea libokeng.

Le hoja Anilpa a ne a e-na le selemo le likhoeli tse hlano feela, o ile a kopanela ka cheseho letšolong la ho memela ba bang kopanong ea setereke ea selemo se fetileng Angola. “Mosebetsi” oa Anilpa e ne e le hore a kokote, ere ha ’mè oa hae a hlaloselitse beng ba matlo morero oa leeto la bona ka bokhutšoanyane, eena a ba fe limemo. Anilpa o ne a thabile hoo ka linako tse ling a neng a sa emele ’mè oa hae hore a qete ho bua pele a kokota monyakong o latelang. O ile a khahla beng ba matlo haholo.  Ka mohlala, letsatsing la ho qetela la kopano mosali e mong o ile a tla ho eena ’me a re: “Ke ne ke ntse ke u batla. Ke thabile ha ke u fumane, kaha ke uena ea ’memetseng kopanong ena.”

Ka August 2012, bahoeletsi ba Phutheho ea Antaviranambo Madagascar ba ile ba kopana le batho ba reng ba batla ho ba Lipaki Tsa Jehova. Ba ne ba ikutloa ba hateletsoe ke baruti, bao mesebetsi ea bona e neng e hanana le seo ba se rutang. Ba re likereke tsa bona ha li na mananeo a ho ruta Bibele ebile ha li na lingoliloeng tse hlalosang litumelo tsa bona. Lichelete tse lefuoang kerekeng li ne li phahame, ho se na bonngoe ebile ho se letho le bontšang hore ba na le lerato la ’nete la Bokreste. Ho feta moo, ba ile ba re baa tseba hore har’a Lipaki Tsa Jehova ha ho joalo.

Hamorao sehlopha sena se ile sa ngolla ofisi ea lekala, sa re: “Re le ngolla ho le tsebisa hore re lakatsa ho sebeletsa Jehova. Leha ho le joalo, re lula hōle haholo. Ba bang  ba rōna ba lokela ho tsamaea lihora tse 9 ho ea ho tse 15 ha ba ea libokeng. Kahoo, re kōpa hore le romele motho ea ka re rutang Bibele. Re lakatsa ho sebeletsa Jehova ka lipelo tsohle empa rea sitoa kaha ha ho na motho ea re thusang hore re mo rate haholoanyane. Kaofela ha rōna re 215 ’me re lula bonyane metseng e meraro. Re ne re le malumeling a sa tšoaneng, empa joale kaofela re labalabela ho sebeletsa Jehova le ho mo mamela ka lipelo tsohle. Re na le tšepo ea hore le tla re thusa.”

Barab’abo rōna ba ile ba etela sehlopha sena, ’me ba tsamaea lihora tse robong ho ea motseng oa pele. Ba ile ba tšoara seboka seo ho sona ho ileng ha e-ba le batho ba 65 ba thahasellang. Ho e-s’o ee kae batho ba ile ba tseba hore ba teng, ’me ba tsoang metseng e meng ba re le bona ba lakatsa ho eteloa le ho rutoa Bibele. Kahoo, barab’abo rōna ba ile ba tsamaea lihora tse ling tse ’nè ’me ba tšoara seboka motseng o mong moo batho ba fetang 80 ba ileng ba e-ba teng. Ha ba le moo, ba ile ba kopana le batho ba bang hape ba ileng ba ba kōpa ka tieo hore ba ee motseng oa habo bona oo ba neng ba tla tsamaea lihora tse peli ho ea ho oona. Ba ile ba lumela ntle ho tikatiko ho ea tšoara seboka le hona moo. Ho ile ha tla batho ba fetang 50.

Ka makhetlo a mabeli, batho ba metse ena ba fetang 30 ba ile ba tla kopanong Mahanoro, ba nkile leeto la letsatsi le halofo ho ea feela. Ba 25 ba ile ba boela ba tla ketelong ea molebeli oa potoloho. Har’a bona ho ne ho e-na le banyalani, malapa le batho ba hōlileng. Ba ne ba fihletse ntlong e le ’ngoe, ba buisana ka seo ba ithutileng sona le ho botsa lipotso ho fihlela bosiu bo boholo. Baahi ba metse ena ba ile ba re ba bang ba bangata ba batla ho ba Lipaki hobane batho ba khathetse ke ho hatelloa ke baeta-pele ba bolumeli.