Ka 1999, phutheho ea puo ea matsoho ea Kobe, Japane, e ile ea utloela hore ho na le monna ea sa utloeng litsebeng ea bitsoang Hirofumi. Ha mor’abo rōna a leka ho mo etela, ’mè oa hae o ile a mo hanela ho kopana le Hirofumi. Mor’abo rōna o ile a kōpa ’mè oa Hirofumi ka  makhetlo-khetlo eaba qetellong o mo tlisa monyako. Moriri oa hae le litelu li ne li le telele ebile li le bohlasoa. O ne a tšoana le motho ea lahlehileng eo e leng khale a sa hlape. E ne eka o tšerehane. Hirofumi o ne a sa utloe litsebeng a bile a sa bone. Seo se ile sa makatsa mor’abo rōna ’me a tšoara matsoho a hae hore a bue le eena a sebelisa puo ea batho ba sa boneng ba bile ba sa utloe litsebeng. Ha hoa ka ha e-ba le seo a se etsang. Lilemong tse leshome tse fetileng ha Hirofumi a le lilemo li 31 o ile a foufala ’me ho ne ho se motho eo a buang le eena.

Mora eo oabo rōna o ile a ea habo Hirofumi hape ka mor’a matsatsi a mabeli. ’Mè oa Hirofumi o ne a nahana hore ha mor’abo rōna a se a bone kamoo mora oa hae a leng kateng, a ke ke a hlola a le beha. Mor’abo rōna o ile a boela a kōpa ’mè oa Hirofumi ka tieo hore a mo lumelle ho mo bona, kahoo a mo tlisa monyako. Ka mor’a khoeli a ntse a etela Hirofumi, feela ho se letho leo a le etsang, ’mè oa hae o ile a mo bolella hore a se ke a hlola a ikhathatsa. Leha ho le joalo, mor’abo rōna o ile a phehella. O ile a ba ela le likuku ho bontša hore oa ba tsotella, empa ka mor’a likhoeli tse ling tse peli ho ne ho ntse ho se letho leo Hirofumi a le etsang ’me a bona ho se na thuso hore a ’ne a ee moo.

Mor’abo rōna o ile a etsa qeto ea ho mo etela hape ka lekhetlo la ho qetela. Pele a ea moo o ile a kōpa Jehova hore a mo thuse ho lemoha hore na ho ntse ho hlokahala hore a ’ne a etele Hirofumi. Ha a fihla moo, o ile a bua le eena ka puo ea matsoho ’me a mo bolella hore ho na le Molimo eo lebitso la hae e leng Jehova eo ka linako  tsohle a mo shebileng a le leholimong, ’me o utloisisa mahlomola a hae ho feta leha e le mang. A mo bolella hore Jehova oa mo tsotella ebile o batla ho mo lokolla mahlomoleng. Ke ka lebaka leo e mong oa Lipaki tsa hae a tlileng ho eena. Qalong ho ne ho se letho leo a le etsang empa ka mor’a nako a tiisa letsoho la mor’abo rōna, ’me meokho ea keleketla marameng. Sena se ile sa ama mor’abo rōna maikutlo eaba le eena oa lla. O ile a qalisa thuto ea Bibele le eena.

Ka mor’a ho ithuta ka lilemo tse 11, Hirofumi o ile a qala ho kopanela le phutheho ea moo a lulang teng eaba o khaotsa ho ea phuthehong ea puo ea matsoho e neng e le hōle. Phuthehong eo ho ne ho se na motho ea tsebang puo ea matsoho, empa likhoeling tse 18 tse latelang,  bara le barali babo rōna ba 22 ba phutheho eo ba ile ba ithuta puo ea matsoho e le hore ba mo thuse. Ka January selemong sa 2012, Hirofumi o ile a fana ka puo ea hae ea pele Sekolong sa Tšebeletso sa Puso ea Molimo, ’me puo eo e ile ea fetoleloa. Ka October selemong sona seo, e ile ea e-ba mohoeletsi ea sa kolobetsoang.

Floren eo e leng pula-maliboho ea lulang Philippines, o khanna lithuto tse 25 ’me boholo ba tsona ke bo-matjekelane. Hangata banna bana ba sebetsa mantsiboea ha ba bang bona ba sebetsa bosiu bohle. Ka lebaka leo, Floren o lokela ho tenyetseha le maemo. O ea moo ba sebetsang teng ’me o ithuta le bona ka nako ea khefu kapa ka linako tse ling tse loketseng e le hore a se ke a ba sitisa mosebetsing. O khanna lithuto tse ling lipakeng tsa 7:00 le 11:00 bosiu, tse ling o li khanna lipakeng tsa 5:00 le 9:00 hoseng. Ka linako tse ling o etsa tokisetso ea ho ba etela ha ba le haufi le ho chencha lichifi. Ka tsela ena, a ka ithuta le matjekelane ea leng haufi le ho kena mosebetsing, a nt’ano ithuta le ea chaisang. Floren o re, “Ho khanna lithuto tsena tse ngata ho nthabisa haholo, ha ke e-s’o thabe hakana bophelong ba ka.” Hona joale bo-matjekelane ba bang ba ba teng libokeng Holong ea ’Muso. E mong o se a bile a kolobelitsoe, ’me ke pula-maliboho oa kamehla.

Ka letsatsi le leng pula e ne e na Armenia, ’me baralib’abo rōna ba babeli ba ile ba bona ’mè le morali ba eme seterateng eaba ba ba fa pampitšana. Sena se ile sa makatsa barali bana babo rōna ha Marusya a re eena le morali oa hae, Yeva, ba qetile lihora tse peli ba le moo pula e ntse e na ba emetse ho bona Lipaki Tsa Jehova. Ba ne ba  li emetse ka lebaka la’ng? Ha abuti oa Marusya a le teronkong, o ile a ithuta ’nete le barab’abo rōna ba neng ba le moo ka lebaka la ho se tšehetse lipolotiki. Marusya o ne a lebeletse hore a tsoe teronkong a le pelo e thata a bile a le mabifi. Ho e-na le hoo, o ne a se a le bonolo. Ha abuti oa Marusya a ntse a kopanela le Lipaki, o ile a fetoha motho ea molemo. Sena se ile sa makatsa Marusya le morali oa hae hobane ba ne ba atisa ho bona li-poster le mananeo a thelevishene a buang mashano ka Lipaki Tsa Jehova. Yeva o ile a re: ‘Malome oa ka ke motho ea molemo. Kahoo ke hobane’ng ha ho buuoa lintho tse ngata hakaale tse mpe ka Lipaki Tsa Jehova?’ A ikemiselitse ho fumana karabo ea potso ena, o ile a re ho ’mè oa hae: “Ha ho mohla re tla tseba batho bana ntle le hore re itete sebete. A re e’o batla Lipaki Tsa Jehova hona joale ’me re felise pherekano ea rōna.” Ke seo ba ileng ba se etsa ha ba tla kopana le barali bao babo rōna. Ka mor’a matsatsi a mabeli, ’mè le morali ba ile ba qala ho ithuta Bibele, ba ea libokeng ’me e se e le bahoeletsi ba sa kolobetsoang.

Mosali e mong oa Adana, Turkey, o ne a e-na le mathata a lelapa a maholo a bile a nahana ho ipolaea eaba o fumana limakasine tse peli monyakong oa hae. Ho bonahala hore ho na le bana ba motseng moo ba ileng ba li thola eaba ba li beha moo ba nahana hore ke tsa hae. Mosali eo o ile a khahloa haholo ke lipale tsa bophelo tse ka har’a limakasine tseo eaba o lakatsa hore bophelo ba hae bo fetohe. O ile a letsetsa nomorong e neng e ngotsoe ho e ’ngoe ea limakasine tseo ’me a buisana le morali’abo rōna oa pula-maliboho ea lulang haufinyane. O ile a qala thuto ea Bibele le eena, a rata seo a neng a ithuta sona ’me a re o batla ho ea libokeng. O ile a fumana hore o  lula pel’a Holo ea ’Muso. A qala ho ea libokeng hang-hang ’me ha a s’o khaotse.

Lepolesa la Nepal le kenang kereke le bitsoang Bam le ile la kopana le banyalani ba bo-pula-maliboho ba khethehileng seterateng ha le ntse le le mosebetsing. Bam o ile a khahloa ke ha ba araba lipotso tsa hae kaofela ka Bibele. O ile a lumela ho ithuta Bibele ’me ho e-s’o ee kae a qala ho ea libokeng. Ha a ntse a ithuta, letsoalo le ile la mo tšetšetha ka lebaka la mosebetsi oa hae, kahoo a kōpa baokameli hore ba mo fe mosebetsi oa ofisi e le hore a se ke a hlola a nka libetsa. Ba ile ba lumela. Leha ho le joalo, ka mor’a hore Bam a be teng kopanong ea setereke, letsoalo le ile la boela la mo khoebetha ’me a etsa qeto ea ho tlohela mosebetsi oa sepolesa.

Qeto ena e ile ea utloisa mosali oa hae bohloko, kaha mosebetsi oa sepolesa o ne o etsa hore ba hlomphuoe o bile o na le moputso o motle le melemo e meng e mengata le penshene e ntle. E le hore a mo susumelletse ho fetola maikutlo, o ile a re, “Haeba u ka tsoela pele ho sebetsa sepoleseng, ke tla ithuta Bibele le Lipaki.” Ha a bona hore leqheka la hae ha le sebetse, o ile a susumetsa mokapotene oa sepolesa hore a mo koalle teronkong, a lumela hore o tla fetola maikutlo. Bam o ile a lokolloa ka mor’a matsatsi a leshome, empa o ne a ntse a ikemiselitse ho batla mosebetsi o mong. E ile ea e-ba richa, e leng mosebetsi o neng o hloka hore a sebetse nako e telele letsatsing le chesang. O ne a thabile ho sa tsotellehe mathata ana. Kamano ea hae le Jehova e ile ea ntlafala ’me ea e-ba mohoeletsi. Ha nako e ntse e feta, mosali oa hae o ile a khaotsa ho mo hanyetsa. Ka lebaka la mosa oo  bara le barali babo rōna ba ileng ba mo bontša oona, o ile a qala ho ithuta Bibele. Bam o tsoela pele ho hlokomela lelapa la hae, ’me ho ba richa ho mo fa chelete e ngata ho feta ha e ne e le lepolesa. O ile a kolobetsoa ka February 2013, ’me hona joale mosali oa hae le mora ba ea le eena libokeng.

Morali’abo rōna oa Korea ea bitsoang Myeong-hee, o na le bothata ba leoto le ileng la holofala ha a le lilemo li peli. O khathala kapele ’me ka linako tse ling o oa oa. Ho phaella moo, ka linako tse ling o tšoha ka tsela e sa laoleheng ebile o ba le mathata a bakoang ke meriana eo a e sebelisang. Myeong-hee o hema ka thata, ’me ho ngongoreha le khatello ea kelello li etsa hore a opeloe. Le har’a mathata ana, o ne a batla ho ba pula-maliboho ea thusang ’me o butse maliboho hoo e ka bang khoeli e ’ngoe le e ’ngoe lilemong tse peli tse fetileng. O leboha Jehova ha a mo file matla a ho bolela litaba tse molemo.

Agnes, eo e leng moromuoa Indonesia, o ’nile a pakela mosali oa moimana ea neng a rekisa meroho ’marakeng. O ne a rata ho bala limakasine tsa rōna a bile a thabela ho qoqa ka Bibele ha ho se na bareki. Ka letsatsi le leng ha Agnes a ea ’marakeng ho ea etela mosali eo, o ile a fumana a le sieo. Monna oa hae o ile a bolella Agnes hore ke motsoetse. Agnes o ile a etsa qeto ea ho mo etela lapeng. O ile a mo isetsa mpho e phuthetsoeng ea Buka  ea ka ea Lipale Tsa Bibele. Mosali eo o ile a makatsoa ke hore Agnes o tlil’o ba bona, empa o ile a makala le ho feta ha Agnes a mo fa mpho. Mosali eo o ile a e phutholla, a e makalla, ’me a re: “Buka ee u e fumane hokae? Haesale ke e batla lilemong tse fetileng tse 30! Ke e batlile mabenkeleng ’ohle a libuka ka ba ka botsa motho e mong le e mong. Ha ho na motho ea nang le eona, ha ho ea e tsebang, ’me ha ho na buka e tšoanang le eona.” Ho bonahala hore ha mosali enoa e sa le ngoana, malome oa hae o ne a e-na le eona, ’me mosali eo a rata ho e bala. Hona joale o boetse o bala buka ena, ’me morali oa hae e moholo le eena o rata ho e bala. Ka bobeli ba ile ba qala ho ithuta Bibele.