Litaba tse molemo li ile tsa fihla Sierra Leone ka 1915 ha baahi ba moo ba tsoang Engelane ba fihla ba nkile lingoliloeng tse thehiloeng Bibeleng. Ka July selemong sona seo, motseng oa Freetown ho ile ha fihla mohlanka oa pele oa Jehova ea kolobelitsoeng. Lebitso la hae e ne e le Alfred Joseph. O ne a le lilemo li 31 ebile e le letsoalloa la Guyana, Amerika Boroa. O ne a kolobelitsoe mathoasong a selemo seo Barbados, West Indies ’me a fumane mosebetsi oa ho khanna terene Freetown. O ile a lula komponeng ea batho ba sebetsang litereneng Toropong ea Cline, e bohōle ba lik’hilomithara tse 3,2 ho tloha Sefateng sa K’hothone se Freetown. Ntle ho tšenyo ea nako, o ile a qala ho bolella basebetsi-’moho le eena molaetsa oa Bibele.

Selemong se latelang, ho ile ha fihla Leonard Blackman ea neng a sebetsa le Alfred pele Barbados, ’mè oa hae Elvira Hewitt, ke eena ea ileng a ruta Alfred ’nete. Leonard e ile ea e-ba moahisani oa Alfred ’me ba ne ba kopana hangata ho buisana ka Bibele. Ba ile ba boela ba fa metsoalle le batho ba bang ba thahasellang lingoliloeng tsa Bibele.

Alfred le Leonard ba ile ba hlokomela hore masimo a Freetown a “soeufaletse ho kotuloa.” (Joh. 4:35) Ka 1923, Alfred o ile a ngolla ntlo-khōlō New York, a re: “Batho ba bangata mona ba thahasella Bibele. Re kōpa le romele motho ea tla ba hlokomela le ho ntšetsa pele mosebetsi oa ho bolela Sierra Leone.” O ile a fumana karabo e reng: “Re tla mo romela!”

Alfred o re, “Ka Moqebelo o mong bosiu, ka mor’a likhoeli tse ’maloa, motho e mong o ile a ntetsetsa ke sa lebella.”

 “Motho eo o ile a re, ‘Na ke uena ea ileng a ngolla Mokhatlo oa Watch Tower a kōpa batho ba ka bolelang litaba tse molemo?’

“Ka re, ‘e, ke ’na.’

“Eaba o re, ‘ba rometse ’na.’

“Motho eo e ne e le William R. Brown. Eena le mosali oa hae Antonia le morali oa hae e monyenyane ba ne ba fihlile hona letsatsing leo ’me ba lula Gainford Hotel.

“Hoseng ho latelang, ’na le Leonard re ne re tšoere thuto ea Bibele ea beke le beke ha ho fihla senatlahali sa monna. E ne e le William R. Brown. O ne a chesehela ’nete hoo a neng a batla ho fana ka puo ea phatlalatsa letsatsing le latelang. Ka potlako re ile ra batla holo e khōlō ka ho fetisisa Freetown—e leng Wilberforce Memorial Hall—’me ra lokisetsa hore ka Labone mantsiboea ho be le puo ea pele ea phatlalatsa ho tse ’nè.

“Re ile ra phathahana ka ho mema batho re sebelisa limemo, likoranta re bile re ba bolella ka molomo. Re ne re  ipotsa hore na ebe ba tla tla, empa ho ne ho sa hlokahale hore re tšoenyehe. Holo e ile ea tlala batho ba ka bang 500 ba akarelletsang baruti ba bangata ba Freetown. Re ne re thabile haholo!”

Puong eo e nkileng hora, Mor’abo rōna Brown o ne a qotsa Mangolo haholo ’me a bontša litemana tsa Bibele ka mochini oa li-slide. Nako le nako o ne a pheta mantsoe a reng, “Hase ’na ea chong joalo empa ke Bibele.” Bamameli ba ne ba hloletsoe ’me ba opa liatla ka mor’a ntlha e ’ngoe le e ’ngoe. Ba ne ba khahloa ke linnete tsa Mangolo eseng bokheleke ba Mor’abo rōna Brown. Har’a bamameli ho ne ho e-na le mohlankana ea neng a ithutela boruti ea ileng a hooa a re, “Monghali Brown o tseba Bibele!”

Lipuo tsa Mor’abo rōna Brown li ne li tsosa tjantjello ea batho ’me li etsa hore ba tle ka bongata ho tla li mamela. Ka Sontaha se latelang, holo eo e ile ea boela ea tlala letšoele le ileng la mamela puo ea sehlooho se reng, “Ho ea Liheleng le ho Khutla—Ke Bo-mang ba Leng Moo?” Linnete tse matla tseo Mor’abo rōna Brown a ileng a li bolela bosiung boo li ile tsa susumetsa le batho ba hlaheletseng likerekeng hore ba tlohele likereke tsa bona.

Puo ea bone ebile e le ea ho qetela ea sehlooho se reng, “Limilione Tse Phelang Hona Joale li ke ke Tsa Hlola li E-shoa,” e ile ea hohela matšoele hoo e mong oa baahi ba Freetown a ileng a re, “Likereke li ile tsa tlameha ho emisa litšebeletso tsa tsona tsa mantsiboea hobane litho tsa tsona li ne li il’o mamela puo ea Mor’abo rōna Brown.”

Kaha Mor’abo rōna Brown o ne a sebelisa Bibele kamehla, a re ha e buile le lumme, batho ba ile ba mo bitsa “Bible” Brown. Lebitso leo le ile la mo khomarela ’me la tuma hohle Afrika Bophirimela. William R. Brown o ne a le motlotlo ho bitsoa ka lebitso leo ho fihlela qetellong ea tšebeletso ea hae ea lefatšeng.