Ho ile ha fihla baromuoa ba bang ba akarelletsang, Pete Paschal, Amos, Barbara Parker, Richard le Belva Stoddard, ba neng ba sebeletsa Bolivia, hammoho le Jesse le Lynn Cantwell ba tsoang Colombia. Baromuoa bao ba ile ba thusa hore mosebetsi o hatele pele ka sekhahla. Ka 1973 mosebetsi oa ho ruta batho Bibele o ne o etsoa metseng le metsaneng ea Dominican Republic, empa litaba tse molemo li ne li e-s’o boleloe metseng ea mahaeng. Kahoo, ho ile ha lokisetsoa hore litaba tse molemo li boleloe libakeng tseo. Ho ile ha kōptjoa bahoeletsi hore ba ithaopele ho ea bolela litaba tse molemo metseng eo ea mahaeng ka likhoeli tse peli, ’me bo-pula-malibo ba kamehla ba 19 ba ile ba ithaopa. Lipakeng tsa December 1973 le January 1977, ho ile ha romeloa lihlopha tsa bo-pula-maliboho libakeng tseo ho tsona mosebetsi oa boboleli o entsoeng hanyane kapa o e-s’o etsoe ho hang.

Pula-maliboho e mong ea ileng a kenya letsoho letšolong lena le khethehileng o re: “Letsatsing la pele re ne re bolella batho molaetsa oa Bibele re bile re ba fa lingoliloeng, ebe ka le hlahlamang re etsa maeto a ho boela ho ba bontšitseng thahasello. Kaha batho ba mahaeng ha ba na chelete, ba ne ba reka lingoliloeng ka likhoho, mahe kapa litholoana. Ruri re leboha Jehova hore ha ho mohla re kileng ra robala re itsosa ha re le moo.” E ne e le lekhetlo la pele batho ba bangata ba balloa Bibele. Ka linako tse ling, baruti ba ne ba bolella batho hore Jehova ke Diabolose.  Ba ile ba makala haholo ha ba bala litemana tse kang Pesaleme ea 83:18 e reng: “Uena, eo lebitso la hao e leng Jehova, uena u le mong u Ea Phahameng ka ho Fetisisa holim’a lefatše lohle”! Libakeng tse ling batho ba ne ba thahasella hoo ho neng ho tšoaroa liboka.

Ka September 1979, ho ile ha fihla baromuoa ba bang e leng Abigail Pérez le mohats’ae Georgina. Ba ile ba etsa mosebetsi oa potoloho. Hamorao, ka 1987, Tom le Shirley Dean ba neng ba tsoa sekolong sa Gileade ba ile ba fihla ho tla etsa letsoho la monna mosebetsing oa boboleli. Basebeletsi ba tšebeletsong e khethehileng ea nako e tletseng ba tsoang Puerto Rico le bona ba ile ba thusetsa. Ka August 1988, Reiner le Jeanne Thompson ba ile ba kōptjoa ho ea Dominican Republic, ’me eo e ne e le kabelo ea bona ea bohlano e le baromuoa.

Ka 1989, palo ea bahoeletsi e ile ea nyolohela ho ba ka bang 11 081, ’me ho ne ho e-na le monyetla oa khōlo kaha ho ne ho khannoa lithuto tsa Bibele tse 20 494. Ho ne ho lokela hore ho etsoe mosebetsi oa motonanahali ho hlokomela khōlo ena. Ka mohlala, pejana ho bo-1990 mohaho oa ofisi ea lekala o ne o le monyenyane haholo bakeng sa basebetsi. Reiner Thompson o re: “Re ne re le bangata hoo re ileng ra lokela ho hira matlo a mang le ho boloka thepa libakeng tse fapaneng.”

Reiner o boetse o re: “Ho ne ho le thata ho fumana setša se loketseng. Leha ho le joalo, rakhoebo e mong ea ileng a utloela hore re batla setša o ile a re atamela. A re o batla ho rekisa setša se botleng, empa a ka se rekisetsa Lipaki Tsa Jehova feela. O ne a kile a ba le khoebo e khōlō ea  moroko, ’me mongoli oa hae le basebetsi ba bang ba ’maloa e ne e le Lipaki Tsa Jehova. O ne a khahluoe ke botšepehi ba bona bo ikhethang le boitšoaro ba bona bo hlomphehang. Kaha o ne a hlompha Lipaki Tsa Jehova, o ile a re a ka re rekisetsa setša seo ka chelete e tlaase haholo.” Re ile ra se reka ka December 1988, ’me hamorao ra reka litša tse ling tse tharo haufi le sona. Sebaka sa ofisi ea lekala hammoho le Holo ea Kopano e ne e ka ba lihekthere tse robong.

Baithaopi ba makholo ba Dominican Republic le ba tsoang linaheng tse ling ba ile ba thusa ho haha ofisi ea lekala e ncha hammoho le Holo ea Kopano. Mehaho eo e ile ea neheloa ka November 1996 ke litho tsa Sehlopha se Busang e leng Carey Barber, Theodore Jaracz le Gerrit Lösch. Ho ile ha boela ha tšoaroa liboka tse khethehileng mabaleng a mabeli a maholo ka ho fetisisa, ’me batho ba fetang 10 000 ba etela mehaho e mecha ea lekala.

Ho ile ha e-ba le Lipaki tse ngata tse ileng tsa fallela Dominican Republic moo ho neng ho hlokahala bahoeletsi ba eketsehileng. Ba bangata ba ile ba fallela moo pejana ho bo-1990 e le hore ba ‘tšelele Macedonia’ kaha ba ne ba utloile hore batho ba moo baa mamela ’me mohoeletsi a ka khanna lithuto tsa Bibele tse ’maloa. (Lik. 16:9) Baithaopi bana ba ile ba phetela ba bang liphihlelo tsa bona tse thabisang ha ba ntse ba paka Dominican Republic. Ka hona, ba bang ba bangata ba ile ba falla ka bo-1990.

Ka mohlala, Stevan le Miriam Norager ba tsoang Denmark, ba ’nile ba sebeletsa Dominican Republic ho tloha ka 2001. Pele ho moo, Miriam le ausi oa hae ba ne ba ile ba sebeletsa Dominican Republic ka nako e etsang selemo  le likhoeli tse tšeletseng. Ke’ng se ileng sa susumetsa banyalani baa hore ba fallele naheng ee e hōle e bileng e nang le setso le puo eo ba sa e tsebeng? Miriam o re: “Malapa a’bo rōna a matla moeeng, batsoali ba rōna e ne e le bo-pula-maliboho ba khethehileng ha ba sa le bacha ’me ea e-ba bo-pula-maliboho ba kamehla ha re se re le teng. Batsoali ba rōna ba ne ba lula ba re khothalletsa ho ikitlaetsa tšebeletsong ea Jehova ka hore re kenele tšebeletso ea nako e tletseng.”

Stevan le Miriam e bile bo-pula-maliboho ba khethehileng ho tloha ka 2006 ’me ba thusitse batho ba bangata ho ithuta ’nete. Stevan o re: “Re hlohonolofalitsoe haholo. Mathata le ho kula hase letho ha li bapisoa le liphihlelo tse monate le thabo e tlisoang ke ho ruta batho ho tseba Jehova le ho mo rata. Re boetse re iketselitse lelapa le leholo la metsoalle e lerato. Ho sebeletsa Dominican  Republic ho re rutile ho ba le boikokobetso le mamello, ’me ho phela bophelo bo bonolo ho matlafalitse tumelo le tšepo ea rōna ho Jehova.”

Jennifer Joy ke e mong oa baralib’abo rōna ba bangata ba masoha ba linaheng tse ling ba sebeletsang Dominican Republic. Ka 1992, ha Jennifer a etetse nkhono oa hae Edith White eo e leng khale e le moromuoa Dominican Republic, o ile a natefeloa ke tšimo ea moo haholo. O ile a boela a kopana le baralib’abo rōna ba bang ba neng ba sebeletsa moo. Jennifer o re: “Ke ne ke le motho ea lihlong. Empa ke ne ke ee ke re, ‘Haeba ba bang ba khona, mohlomong le ’na nka atleha.’”

 Qalong, Jennifer o ne a ikemiselitse ho lula selemo se le seng feela, empa meso e ile ea ’na ea tsoala mesoana, ’me hona joale o na le lilemo tse fetang 20 a sebeletsa Dominican Republic. O thusitse batho ba bangata bao a neng a ithuta Bibele le bona ho ba barapeli ba Jehova. O bile le seabo ha ho qaloa tšimo ea puo ea matsoho Dominican Republic, a ba a thusa le ha ho lokisetsoa lenaneo la thuto le tla sebelisoa ho ruta batho puo ea matsoho.

Jennifer o iphelisa joang? O re: “Selemo le selemo ke khutlela Canada ho ea sebetsa ka likhoeli tse ’maloa. Ke etsa mesebetsi e sa tšoaneng e kang ho nka linepe, ho li foreima, ho penta matlo, ho hloekisa liofising, ho lokisa mabone le ho etsa mealo. Ke boetse ke tsamaisa bahahlauli, ke hlophisa maeto, ke ruta Senyesemane ebile ke toloko.” Jennifer o itšoantša le Baiseraele ba boholo-holo ha ba ne ba le lefeelleng. O re: “Ba ne ba phela ka polelo e ’ngoe le e ’ngoe ea molomo oa Jehova. O ne a ba tšepisitse hore o tla ba hlokomela, ’me o ile a feela a etsa joalo. Ba ne ba lula ba e-na le lijo, ’me liaparo le meqathatso ea bona ha lia ka tsa taboha. (Deut. 8:3, 4) Le rōna Jehova o tšepisa hore o tla re hlokomela. (Mat. 6:33) Haesale a ntlhokometse ho tla fihlela lena le holimo, ka hona, ke’ng e ka etsang hore ke belaele hore o tla ntlhokomela nakong e tlang?”

Ho na le bahoeletsi ba ka ba bang 1 000 ba itetseng ba tsoang linaheng tse kang Austria, Japane, Poland, Puerto Rico, Russia, Spain, Sweden, Taiwan le United States. Baithaopi bana ba tsoang linaheng tse 30 ba kopanela le  liphutheho tsa Puo ea Matsoho ea America (ASL), Sechaena, Secreole sa Haiti, Senyesemane, Sepanishe, Serussia le Setaliana. Joaloka moapostola Petrose ba re: “Bona! Re siile lintho tsohle ’me re ’nile ra u latela.”—Mar. 10:28.