Rafael Pared, eo hona joale a sebeletsang Bethele le mosali oa hae Francia, e ile ea e-ba mohoeletsi ka 1957 ha a le lilemo li 18. O hopola kamoo mapolesa a neng a mo sala morao kateng ha a le tšimong, a batla monyetla  oa ho mo tšoara hammoho le bao a neng a tsamaea le bona. Rafael o re: “Ka linako tse ling re ne re nyenyelepa ka mor’a matlo re bile re tlōla literata e le hore re se ke ra tšoaroa.” Ha Andrea Almánzar a hlalosa seo eena le ba bang ba neng ba se etsa e le hore ba se ke ba tšoaroa, o re: “Re ne re lokela ho ba masene. Ha re le tšimong, re ne re tlōla matlo a leshome pele re ka kena ho e latelang.”

Ka 1959, ’muso oa Trujillo o ne o se o e-na le lilemo tse 30 o le litulong, empa maemo a lipolotiki a ne a ntse a fetoha. Ka la 14 June 1959, batho ba Dominican Republic ba neng ba lelekiloe ka har’a naha, ba ile ba khutla ’me ba boela ba leka ho ketola ’muso oa Trujillo. Le hoja morero oa bona o ile oa nyopa ha marabele a mang a bolaoa ’me a mang a tšoaroa, lira tse neng li ntse li eketseha tsa ’muso ha lia ka tsa tela.

Le hoja Kereke e K’hatholike e ’nile ea sebelisana le ’muso oa Trujillo ka lilemo tse ngata, ka la 25 January, 1960 kereke e ile ea ngolla ’muso e o qosa ka hore o hatakela litokelo tsa botho tsa baahi ba Dominican Republic. Rahistori oa Modominican e leng Bernardo Vega o re: “Ka June 1959, ba neng ba ameha phutuhong ena ba ile ba etsa hore kereke e be tlas’a khatello ’me hamorao ea hlaseloa ke lebotho la likhukhuni hore e nke bohato bo matla khahlanong le Trujillo.”

Ho thabisang ke hore ka May 1960 ’muso o ile oa tlosa thibelo e neng e etselitsoe Lipaki Tsa Jehova. Ka mor’a lilemo tse ngata Lipaki li thibetsoe, khohlano e lipakeng tsa Trujillo le Kereke e K’hatholike e ile ea etsa hore Trujillo a li lokolle.