Barab’abo rōna ba ile ba hula ka thata nakong eo mosebetsi o neng o thibetsoe. Moromuoa ea bitsoang Alma Parson o re: ‘Liholo Tsa ’Muso li ne li koetsoe, ’me mosebetsi o thibetsoe. Barab’abo rōna ba ratehang ba ne ba tobana le liteko le mathata a mangata.’ Ba ile ba lelekoa mosebetsing ba ba ba kenngoa teronkong. Leha ho le joalo o re: ‘Ka makhetlo a mangata re ’nile ra bona ka ho hlaka  hore Jehova oa re tataisa le ho re sireletsa.’ Kaha barab’abo rōna ba ne ba kholisehile hore Jehova oa ba tataisa, ba ile ba tsoela pele ho etsa mosebetsi ka sekhukhu.

Ha Lennart Johnson a bua ka nako eo ka eona ba neng ba thibetsoe ho tšoara liboka o re: ‘Barab’abo rōna ba ne ba bokana ka sekhukhu ka lihlopha tse nyenyane malapeng. Re ne re ithuta lihlooho tsa Molula-Qhooa tse kopilitsoeng. Barab’abo rōna ba tšepahalang ba ne ba ananela tsela eo Jehova a neng a lula a re matlafatsa ka eona moeeng le hoja re ne re bokana ka lihlopha tse nyenyane.’

Ka nako eo, ’muso o ile oa ba beha leihlo oa ba oa ba hlekefetsa le ho feta. Empa seo ha sea ka sa tšosa bara le barali babo rōna. Ka la 15 September, 1950, monghali Hungría o ile a ngolla Mopresidente oa Dominican Republic, ’me a re: “Ke ’nile ka bitsetsa Monghali Lee Roy Brandt le baeta-pele ba bang ba sehlopha sena sa Lipaki Tsa Jehova ofising ea ka hore ke ba khalemelle ho ruta batho lithuto tse fosahetseng tsa mokhatlo ona oa bona o thibetsoeng, empa ho bonahala ba sa utloe. Letsatsi le leng le le leng re fumana litlaleho tse tsoang lebakeng tse sa tšoaneng tse bontšang hore ka sekhukhu ba ntse ba tsoela pela ho lahlehisa sechaba ’me ba soma ’muso le maano a oona.” O ile a phethela lengolo leo ka hore a ipiletse ho Mopresidente hore a leleke “baeta-pele ba tsoang linaheng tse ling” ba Lipaki Tsa Jehova.

Qetellong ea 1950, Mor’abo rōna Knorr le Mor’abo rōna Henschel ba ile ba etela Dominican Republic. Ka mor’a moo, baromuoa ba bang ba ile ba abeloa ho ea  sebeletsa Argentina, Guatemala le Puerto Rico. Ba bang ba ile ba batla mosebetsi e le hore ba ka lula Dominican Republic. Ka mohlala, Mor’abo rōna Brandt o ile a sebetsa k’hamphaning ea motlakase, ’me ba bang ba sebetsa e le matichere a Senyesemane. Ha Buka ea Selemo ea 1951 (ea Senyesemane) e bua ka baromuoa bao e re: “Boteng ba bona e ne e le mohloli oa matla ho balateli ba tšepahalang ba Morena ba neng ba ithutile ’nete ho bona. Barab’abo rōna baa thaba ha ba bona kamoo baromuoa ba etsang mosebetsi ka sebete kateng.”

Dorothy Lawrence ke e mong oa baromuoa bao e neng e le matichere a Senyesemane. Ntle le hore o ne a ruta batho Senyesemane, o ne a boetse a ruta baithuti ba thahasellang Bibele. Ka hona, o ile a thusa batho ba ’maloa ho kena ka phuthehong.

Bahlanka ba Jehova ba tšepahalang ba ile ba etsa maoala a mang e le hore ba ’ne ba ee tšebeletsong ea tšimo le hoja ba lula ba behiloe leihlo. Ka linako tse ling, ba ne ba ntša libuka maqephe ’me ba kenya a ’maloa ka pokothong ea hempe kapa ka mokotleng oa korosari e le hore ba se ke ba tsosa libata masene. Ba ne ba ngola tlaleho ea tšebeletso ea tšimo joaloka lethathamo la korosari. Ho e-na le ho ngola libuka, libukana, limakasine, maeto a ho  boela le lihora tlalehong ea tšimo, ba ne ba ngola papaya, linaoa, mahe, k’habeche le sepiniche. Molula-Qhooa o kopilitsoeng o ne o bitsoa yuca kapa cassava, e leng limela tse tsebahalang tsa moo.

Ka la 16 June, 1954, Rafael Trujillo o ile a tekena selekane le Mopapa, ’me selekane seo se ile sa fa baruti ba kereke ea Roma e K’hatholike boemo bo khethehileng Dominican Republic. Nakong ena, e ne e se e le lilemo tse ’nè Lipaki li thibetsoe. Leha ho le joalo, ka 1955 ho ne ho e-na le bahoeletsi ba 478 Dominican Republic. Ho tlile joang hore ho be le khōlo e kaalo tlas’a maemo ao a boima? Buka ea Selemo ea 1956 (ea Senyesemane) e ile ea re: “Re thusitsoe ke moea oa Jehova. Barab’abo rōna ba momahane, ba matla tumelong ’me ba etsa mosebetsi ka sebete.”

Ka July 1955, ntlo-khōlō e ile ea ngolla Mopresidente Trujillo. Lengolo leo le ile la hlalosa ka ho hlaka hore  Lipaki Tsa Jehova ha li kenelle litabeng tsa lipolotiki, ’me la kōpa Mopresidente Trujillo ‘ho tlosa thibelo e khahlanong le Lipaki Tsa Jehova le Watch Tower Bible and Tract Society.’ Phello e bile efe?