TRUJILLO o ne a e-na le selekane sefe le Kereke e K’hatholike? Setsebi se seng sa lipolotiki se ile sa re: “Nakong ea puso ea Trujillo ka 1930-1961, Kereke e ne e tšehetsana le ’muso oa Dominican Republic.”

Ka 1954, Trujillo o ile a ea Roma ho ea saena selekane le Mopapa. Motsoalle oa mehleng oa Trujillo e leng Germán Ornes o ile a ngola a re: “Kaha kereke ea Dominican Republic ke motšehetsi e moholo oa Trujillo, e ile ea tiisa maqhama le ‘Morena’ [Trujillo]. Sehlopha sa baruti ba eteletsoeng pele ke Moarekabishopo Ricardo Pittini le Moarekabishopo Octavio Beras, ke ba bang ba batho ba ka pele-pele ba neng ba buella ’muso.”

Ornes o ile a tsoela pele a re: “Kamehla Mopapa o ne a romella Trujillo melaetsa e monate ea litumeliso. . . . Ka 1956, Moruti Francis Spellman eo e neng e le moemeli oa Mopapa, o ile a romella Trujillo molaetsa oa litumeliso tse mofuthu sebokeng se neng se tšehelitsoe ke [Trujillo] sa Catholic Culture,  se neng se tšoaretsoe Ciudad Trujillo. Ka nako e ’ngoe, Moruti Spellman o ile a tloha New York a etela Mohlomphehi [Trujillo] ’me a fumana kamohelo e mofuthu. Letsatsing le hlahlamang, litšoantšo tsa kamoo ba neng ba thabelane kateng, li ile tsa hlaha likoranteng tsohle tsa Dominican Republic.”

Ka 1960, makasine ea Time e ile ea re: “Trujillo o ntse a e-na le maqhama a matla le kereke. Moarekabishopo oa Linaha Tsa Amerika e leng Ricardo Pittini, o se a le lilemo li 83 ’me o foufetse, empa lilemong tse ’nè tse fetileng o ile a saena lengolo le ileng la hlaha koranteng ea New York Times le rorisang Trujillo ’me le re: ‘Le hoja ho thoe ke ’musi ea hatellang, sechaba sea mo rata ebile sea mo hlompha.’”

Leha ho le joalo, ka mor’a hore Kereke e K’hatholike e tšehetse puso e hatellang ea Trujillo ka lilemo tse 30, e ile ea khaotsa ho mo tšehetsa ha maemo a lipolotiki a fetoha. Setsebi seo sa lipolotiki se ile sa re: “Le hoja kereke e ’nile ea tšehetsa puso ea Trujillo ka nako e telele, e ile ea tlameha ho khaola maqhama le eena ha batho ba e-ba khahlanong le puso ea hae e hatellang ’me hamorao ba etsa boiteko ba ho hloma puso ea sechaba ka sechaba.”

Qetellong, ka 2011 Kereke e ile ea tlameha ho kōpa tšoarelo ho batho ba Dominican Republic. Lengolo le ileng la hlaha koranteng ea Dominican Today le ile la re: ‘Re lumela liphoso tsa rōna ’me re masoabi hore ebe ha rea ka ra etsa lintho tumellanong le lithuto, mosebetsi le boikarabelo ba kereke. Ka lebaka leo, re kōpa hore baahi ba Dominican Republic ba re inele matsoho metsing.’