1. Ke mang ea re fileng bophelo?

JEHOVA “ke Molimo ea phelang.” (Jeremia 10:10) Ke eena ea re bopileng le ho re fa bophelo. Bibele e re Molimo ‘o bōpile lintho tsohle, ’me ka lebaka la thato ea hae li ile tsa e-ba teng ’me tsa bōptjoa.’ (Tšenolo 4:11) Kaha Jehova o batla hore re phele, o re file bophelo.—Bala Pesaleme ea 36:9.

2. Re lokela ho etsa’ng e le hore re thabe bophelong?

² Jehova o re fa lintho tseo re li hlokang, tse kang lijo le metsi. (Liketso 17:28) O boetse o batla hore re thabe bophelong. (Liketso 14:15-17) E le hore re thabe, re lokela ho mamela melao ea Molimo.—Esaia 48:17, 18.

3. Jehova o ile a etsa’ng ha Kaine a bolaile Abele?

³ Bibele e ruta hore Jehova o nka bophelo bo le bohlokoa. Ka mohlala, ha mora oa Adama le Eva ea bitsoang Kaine a ne a halefetse Abele moena oa hae, Jehova o ile a mo lemosa hore a se ke a halefa. Empa Kaine ha aa ka a mamela. O ile a halefa hoo a ileng “a hlasela Abele ’me a mo bolaea.” (Genese 4:3-8) Jehova o ile a ahlola Kaine ka lebaka la ho bolaea Abele. (Genese 4:9-11) Kahoo, khalefo le lehloeo li kotsi hobane li ka etsa hore re be khopo. Batho ba khopo ba ke ke ba fumana bophelo bo sa feleng. (Bala 1 Johanne 3:15.) E le hore re thabise Jehova, re lokela ho rata batho bohle.—1 Johanne 3:11, 12.

4. Molimo o ile a fa Baiseraele molao ofe, hona molao oo o re ruta’ng?

 ⁴ Lilemo tse likete hamorao, Jehova o ile a bontša hore o nka bophelo bo le bohlokoa ha a fa Moshe Melao e Leshome. O mong oa melao eo o ne o re: “U se ke ua bolaea.” (Deuteronoma 5:17) Haeba motho a ne a ka bolaea e mong ka boomo, le eena o ne a lokela ho bolaoa.

5. Molimo o ikutloa joang ka ho ntša mpa?

⁵ Molimo o ikutloa joang ka ho ntša mpa? Esita le bophelo ba ngoana ea e-s’o hlahe bo bohlokoa ho Jehova. Molaong oo Jehova a ileng a o fa Baiseraele, o ile a re haeba motho a ne a ka ntša mosali oa moimana kotsi eaba ngoana oa hae oa shoa, motho eo o ne a lokela ho bolaoa. (Bala Exoda 21:22, 23; Pesaleme ea 127:3.) Taba ena ea re ruta hore ho ntša mpa ho fosahetse.—Sheba tlhaloso ea 27 lethathamong la Litlhaloso qetellong ea buka.

6, 7. Re ka bontša Jehova joang hore re nka bophelo bo le bohlokoa?

⁶ Re ka bontša Jehova joang hore re nka bophelo bo le bohlokoa? Ka hore re se ke ra etsa ntho leha e le efe e ka behang bophelo ba rona kapa ba batho ba bang kotsing. Kahoo, ha rea lokela ho tsuba kapa ra sebelisa lithethefatsi hampe, kaha li ka re ntša kotsi tsa ba tsa re bolaea.

⁷ Kaha Molimo ke eena ea re bopileng a ba a re fa bophelo, re lokela ho phela ka tsela eo a e batlang. Kahoo, re lokela ho itlhokomela. Haeba re sa itlhokomele, Molimo o tla nka re sa hloeka. (Baroma 6:19; 12:1; 2 Bakorinthe 7:1) Re ke ke ra ba barapeli ba Jehova haeba re sa nke bophelo bo le bohlokoa. Ho ka ’na ha e-ba boima hore re khaotse ho etsa lintho tse re silafatsang, empa haeba re leka, Jehova o tla re thusa ho li tlohella, kaha re tla be re bontša hore re nka bophelo bo le bohlokoa.

8. Re ka etsa’ng hore re se ke ra beha bophelo ba rona kapa ba batho ba bang kotsing?

 ⁸ Re ithutile hore bophelo ke mpho ea bohlokoa. Jehova o batla hore re etse sohle seo re ka se khonang ho qoba ho beha bophelo ba rona kapa ba batho ba bang kotsing. Re ka etsa joalo ka hore re khanne hantle, ebang re khanna koloi, sethuthuthu, baesekele kapa sepalangoang leha e le sefe. Re lokela ho qoba lipapali tse kotsi. (Pesaleme ea 11:5) Re boetse re lokela ho etsa sohle seo re ka se khonang hore batho ba se ke ba tsoa kotsi ha ba le malapeng a rona. Jehova o ile a laela Baiseraele a re: “Haeba u haha ntlo e ncha, u etse lehora [kapa lebota le lekhutšoanyane] bakeng sa marulelo a hao, e le hore u se ke ua beha molato oa mali ntlong ea hao hobane e mong a ka ’na a oa a le holim’a eona.”—Deuteronoma 22:8.

9. Re lokela ho tšoara liphoofolo joang?

⁹ Bophelo ba liphoofolo le bona bo bohlokoa ho Jehova. O re lumella hore re bolaee liphoofolo haeba re tl’o li ja, re batla ho etsa liaparo ka matlalo a tsona, kapa haeba li beha bophelo ba rona kotsing. (Genese 3:21; 9:3; Exoda 21:28) Empa ha rea lokela ho tšoara liphoofolo hampe, kapa re li bolaee feela ho ithabisa.—Liproverbia 12:10.

10. Jehova o nka mali a le bohlokoa hakae?

¹⁰ Jehova o nka mali a halalela hobane ke bophelo. Ka mor’a hore Kaine a bolaee Abele, Jehova o ile a bua le eena a re: “Mali a moen’ao a hoeletsa ho ’na a le mobung.” (Genese 4:10) Ha Jehova a ne a bua le Kaine ka mali, o ne a bolela bophelo ba Abele. Kahoo, o ile a ahlola Kaine hobane a bolaile Abele. Ka mor’a moroallo oa mehleng ea Noe, Jehova o ile a boela a bontša hore mali ke bophelo. O ile a lumella Noe le lelapa la hae ho ja  nama. A re: “Phoofolo e ’ngoe le e ’ngoe e hahabang e phelang e tla ba lijo tsa lōna. Joalokaha ke le nehile limela tse tala, ke le neha tsona kaofela.” Leha ho le joalo, ho na le ntho e le ’ngoe eo Jehova a ileng a laela hore ba se ke ba e ja. O ile a re: “Ke feela nama e nang le moea oa eona—mali a eona—eo le ke keng la e ja.”—Genese 1:29; 9:3, 4.

11. Molimo o ile a fana ka taelo efe ho Baiseraele mabapi le mali?

¹¹ Lilemo tse ka bang 800 ka mor’a hore Jehova a laele Noe hore a se ke a ja mali, o ile a bua le Baiseraele a re: “Motho leha e le ofe oa bara ba Iseraele kapa mojaki ea itseng ea lulang e le mojaki har’a lōna eo ha a tsoma a tšoasang sebata kapa nonyana e ka jeoang, tabeng eo a tšolle mali a eona ’me a a koahele ka mobu.” A phaella ka ho re: “Le se ke la ja mali.” (Levitike 17:13, 14) Jehova o ne a ntse a batla hore batho ba hae ba nke mali a halalela. Ba ne ba lumeletsoe ho ja nama, eseng mali. Ha ba bolaea phoofolo hore ba tl’o e ja, ba ne ba lokela ho ntšetsa mali a eona mobung.

12. Ke hobane’ng ha Bakreste ba sa je mali?

¹² Lilemo tse seng kae ka mor’a lefu la Jesu, baapostola le baholo ba phutheho ea Bokreste e Jerusalema ba ile ba kopana e le hore ba etse qeto ea hore na ke likarolo life tsa Molao oa Moshe tseo Bakreste ba neng ba lokela ho li mamela. (Bala Liketso 15:28, 29; 21:25.) Jehova o ile a ba thusa hore ba utloisise hore mali a ntse a le bohlokoa. Kahoo, ba ne ba lokela ho a nka a halalela. Bakreste ba pele ba ne ba sa lokela ho ja kapa ho noa mali, kapa ho ja nama e neng e sa fophisoa mali hantle. Haeba ba ne ba ka a ja, ba ne ba tla be ba entse sebe se tšoanang le bohlola, bofebe kapa ho rapela litšoantšo. Ho tloha ka nako eo, haesale Bakreste ba sa je mali ba bile ba sa a noe. Le  mehleng ena, Jehova o ntse a batla hore re nke mali a halalela.

13. Ke hobane’ng ha Bakreste ba sa lumele ho tšeloa mali?

¹³ Taba ena e bolela hore Bakreste ha baa lokela ho tšeloa mali. Jehova o re laetse hore re se ke ra ja kapa ra noa mali. Ha ngaka e u boleletse hore u se ke oa noa joala, u ke ke oa bo kenya ’meleng oa hao ka ente eaba u re ha oa bo noa. Ka tsela e tšoanang, taelo ea hore re se ke ra ja kapa ra noa mali e bolela hore re ke ke ra lumela ho tšeloa mali.—Sheba tlhaloso ea 28 lethathamong la Litlhaloso qetellong ea buka.

14, 15. Bakreste ba bontša joang hore ba mamela Jehova ebile ba nka bophelo bo le bohlokoa?

¹⁴ U ka etsa’ng ha ngaka e u bolella hore u tla shoa haeba u hana ho tšeloa mali? Motho ka mong o lokela ho iketsetsa qeto ea hore na o tla mamela molao oa Molimo tabeng ea mali kapa che. Kaha Bakreste ba hlompha bophelo, ba tla batla mekhoa e meng ea phekolo; empa ba ke ke ba lumela ho tšeloa mali.

¹⁵ Re leka ka matla hore re lule re phetse hantle, empa kaha bophelo bo bohlokoa ho Molimo, re ke ke ra lumela ho tšeloa mali. Ho mamela Jehova ho bohlokoa ho feta hore re tlole molao oa hae hobane feela re batla ho phela nako e telele. Jesu o ile a re: “Mang kapa mang ea batlang ho pholosa moea oa hae o tla lahleheloa ke oona; empa mang kapa mang ea lahleheloang ke moea oa hae ka lebaka la ka o tla o fumana.” (Matheu 16:25) Re mamela Jehova hobane re mo rata. O tseba ntho e tla re tsoela molemo. Re lokela ho etsisa Jehova ka hore re nke bophelo bo le bohlokoa bo bile bo halalela.—Baheberu 11:6.

16. Ke hobane’ng ha bahlanka ba Molimo ba mo mamela?

 ¹⁶ Bahlanka ba Molimo ba ikemiselitse ho mamela molao oa hae tabeng ea mali. Ba ke ke ba ja kapa ba noa mali, ebile ba ke ke ba lumela ho tšeloa mali. * Empa ba tla khetha mekhoa e meng ea phekolo. Ba lumela hore ’Mopi oa bona o tseba se tla ba tsoela molemo. Na le uena oa lumela?

17. Jehova o ne a lumeletse Baiseraele ho sebelisa mali joang?

¹⁷ Jehova o ile a fa Baiseraele molao o reng: “Moea oa nama o maling, ’me ke a behile aletareng hore le koahele libe [kapa le kope tšoarelo] tsa meea ea lōna, hobane mali a koahela libe ka lebaka la moea o ho ’ona.” (Levitike 17:11) Ha Baiseraele ba entse sebe, ba ne ba ka kopa tšoarelo ho Jehova ka hore ba ise phoofolo ho moprista e le hore a ka etsa sehlabelo ka eona ebe o tšela mali a mang a eona holim’a aletare e tempeleng. Jehova o ne a lumeletse Baiseraele ho sebelisa mali ka tsela ena feela.

18. Lefu la Jesu le re tsoela molemo joang?

¹⁸ Ha Jesu a le lefatšeng, o ile a tela bophelo ba hae e le hore re tšoareloe libe. Kahoo, ha ho sa hlokahala hore batho ba etse mahlabelo ka liphoofolo. (Matheu 20:28; Baheberu 10:1) Kaha joale Jesu o tetse bophelo ba hae, Jehova o se a ka fa batho bohle monyetla oa ho phela ka ho sa feleng.—Johanne 3:16; Baheberu 9:11, 12; 1 Petrose 1:18, 19.

19. Re ka bontša joang hore re nka bophelo bo le bohlokoa?

¹⁹ Re leboha Jehova haholo hore ebe o re file bophelo.  Ebile re batla ho bolella batho hore ba ka phela ka ho sa feleng, haeba ba bontša tumelo sehlabelong sa Jesu. Kaha re rata batho ba bang, re lokela ho etsa sohle seo re ka se khonang ho ba ruta, e le hore ba tle ba phele ka ho sa feleng. (Ezekiele 3:17-21) Ha re etsa joalo, re tla bua joaloka moapostola Pauluse ea ileng a re: “Ke hloekile maling a batho bohle, kaha ha kea tlohela ho le bolella morero oohle oa Molimo.” (Liketso 20:26, 27) Re bontša hore re nka bophelo le mali li le bohlokoa ha re ruta batho ka Jehova le kamoo a nkang bophelo bo le bohlokoa kateng.