1, 2. Jehova o batla hore malapa a be joang?

JEHOVA MOLIMO ke eena ea qapileng lenyalo. Bibele e re o ile a bopa mosali ’me a mo “tlisa ho monna.” Adama o ile a thaba haholo hoo a ileng a re: “Qetellong enoa ke lesapo la masapo a ka le nama ea nama ea ka.” (Genese 2:22, 23) Taba eo e bontša hore Jehova o batla hore banyalani ba thabe.

² Ka masoabi, malapa a mangata ha aa thaba. Leha ho le joalo, Bibele e na le likeletso tse ngata tse ka thusang bohle ka lapeng hore ba thabele ho ba ’moho.—Luka 11:28.

3, 4. (a) Monna o lokela ho tšoara mosali oa hae joang? (b) Ke hobane’ng ha ho le bohlokoa hore monna le mosali ba tšoarelane?

³ Bibele e re monna o lokela rata mosali oa hae le ho mo hlompha. Ka kopo bala Baefese 5:25-29. Monna o lokela ho rata mosali oa hae ka linako tsohle. O boetse o lokela ho mo sireletsa, ho mo hlokomela le ho qoba ho mo utloisa bohloko.

⁴ Monna o lokela ho etsa’ng ha mosali oa hae a etsa liphoso? Bibele e re: “Le ’ne le rate basali ba lōna ’me le se ke la ba halefela ka matla.” (Bakolose 3:19) Banna ba lokela ho hopola hore le bona ba etsa liphoso. Kahoo, haeba ba batla hore Molimo a ba tšoarele, le bona ba lokela ho tšoarela basali ba bona. (Matheu 6: 12, 14, 15) Haeba monna le mosali ba tšoarelana, lelapa la bona le tla thaba.

5. Ke hobane’ng ha monna a lokela ho hlompha mosali oa hae?

⁵ Jehova o lebeletse hore banna ba hlomphe basali ba bona. Ho bohlokoa hore monna a fe mosali oa hae lintho tseo a li hlokang. Haeba a sa etse joalo, Jehova a ke ke a mamela lithapelo tsa hae. (1 Petrose 3:7) Jehova o rata batho bohle ba mo ratang, ho sa tsotellehe hore na ke banna kapa ke basali.

6. Kaha monna le mosali ke “nama e le ’ngoe”, ba lokela ho tšoarana joang?

⁶ Jesu o ile a re monna le mosali “ha ba sa le babeli, empa e se e le nama e le ’ngoe.” (Matheu 19:6) Kahoo, ba lokela ho tšepahallana. (Liproverbia 5:15-21; Baheberu 13:4) Monna le mosali ha baa lokela ho hanelana ka tokelo ea ho kopanela liphate. (1 Bakorinthe 7:3-5) Monna o lokela ho hopola hore “ha ho motho ea kileng a hloea nama ea hae; empa oa e fepa le ho e baballa.” Kahoo, o lokela ho rata mosali oa hae le ho mo hlokomela. Mosali o tla thaba haeba monna oa hae a mo rata a bile a le mosa ho eena.—Baefese 5:29.

7. Ke hobane’ng ha ho lokela ho ba le motho ea etellang pele ka lapeng?

⁷ Lelapa le leng le le leng le hloka motho ea tla le etella pele e le hore le sebelisane hantle. 1 Bakorinthe 11:3 e re: “Hlooho ea monna e mong le e mong ke Kreste; hape hlooho ea mosali ke monna; hape hlooho ea Kreste ke Molimo.”

8. Mosali a ka bontša joang hore o hlompha monna oa hae?

⁸ Banna bohle ba etsa liphoso. Empa haeba mosali a  tšehetsa liqeto tseo monna oa hae a li etsang a bile a sebelisana le eena, lelapa le tla thaba. (1 Petrose 3:1-6) Bibele e re: “Mosali o lokela ho ba le tlhompho e tebileng ho monna oa hae.” (Baefese 5:33) Mosali o lokela ho hlompha monna oa hae le haeba ba e-na le litumelo tse sa tšoaneng. Bibele e re: “Lōna basali, le ipehe tlas’a banna ba lōna, e le hore, haeba leha e le bafe ba sa mamele lentsoe, ba ka hapuoa ka ntle ho lentsoe ka boitšoaro ba basali ba bona, kahobane e bile lipaki tse boneng ka mahlo tsa boitšoaro ba lōna bo hloekileng hammoho le tlhompho e tebileng.” (1 Petrose 3:1, 2) Ha mosali a mamela keletso ea Bibele, monna oa hae o tla mo hlompha a be a hlomphe le bolumeli ba hae.

9. (a) Mosali o lokela ho etsa’ng haeba ho e-na le ntho eo a sa lumellaneng le monna oa hae ka eona? (b) Tite 2:4, 5 e eletsa basali ho etsa’ng?

⁹ Mosali o lokela ho etsa’ng haeba ho e-na le ntho eo a sa lumellaneng le monna oa hae ka eona? O lokela ho ntša maikutlo a hae ka tsela e bontšang hore o  hlompha monna oa hae. Ka mohlala, Sara o ile a bua ntho e ’ngoe eo Abrahama a neng a sa lumellane le eona. Empa Jehova a re ho Abrahama: “Mamela lentsoe la hae.” (Genese 21:9-12) Ha monna a etsa qeto e seng khahlanong le melao ea Bibele, mosali o lokela ho mo tšehetsa. (Liketso 5:29; Baefese 5:24) Mosali ea khabane o hlokomela lelapa la hae. (Bala Tite 2:4, 5.) Ha monna oa hae le bana ba hlokomela kamoo a sebetsang ka thata kateng, ba tla mo rata ba be ba mo hlomphe le ho feta.—Liproverbia 31:10, 28.

10. Bibele e re’ng ka ho arohana le ho hlalana?

¹⁰ Ka linako tse ling, banyalani ba potlakela ho arohana kapa ho hlalana. Leha ho le joalo, Bibele e re “mosali ha aa lokela ho tloha ho monna oa hae . . . ’me monna ha aa lokela ho tlohela mosali oa hae.” (1 Bakorinthe 7:10, 11) Ho na le maemo a mang a thata haholo a ka etsang hore banyalani ba etse qeto ea ho arohana, empa qeto eo e boima. Ha Bibele e bua ka ho hlalana, e re monna le mosali ba ka hlalana haeba feela e mong oa bona a entse thobalano le motho eo e seng molekane oa hae.—Matheu 19:9.

11. Ke’ng eo bana ba e hlokang?

¹¹ Batsoali ba lokela ho leka ho lula ba e-na le bana ba bona. Bana ba hloka batsoali ba bona. Ntho ea bohlokoa haholo eo ba e hlokang ke hore batsoali ba ba rute ka Jehova.—Deuteronoma 6:4-9.

12. Batsoali ba ka sireletsa bana ba bona joang?

¹² Lefatšeng lena la Satane, batho ba ntse ba e-ba khopo le ho feta ’me ho na le ba batlang ho ntša bana  kotsi, le ho ba hlekefetsa ka motabo. Batsoali ba bang ba thatafalloa ho bua le bana ba bona ka taba ena. Empa ba tlameha ho lemosa bana ka batho ba ka ba ntšang kotsi le ho ba ruta hore na ba ka etsa’ng e le hore ba se ke ba ba hlekefetsa. Batsoali ba lokela ho sireletsa bana ba bona. *—1 Petrose 5:8.

13. Batsoali ba lokela ho ruta bana ba bona joang?

¹³ Batsoali ke bona ba lokelang ho ruta bana ba bona ho itšoara hantle. U ka ruta bana ba hao joang? U lokela  ho khalemela bana ba hao, empa ha oa lokela ho ba hlekefetsa. (Jeremia 30:11) Kahoo, u se ke oa khalemela bana ba hao u halefile hobane u ka bua lintho tse tla ba utloisa bohloko haholo. (Liproverbia 12:18) Thusa bana ba hao ho utloisisa hore na ke hobane’ng ha ba lokela ho mamela.—Baefese 6:4; Baheberu 12:9-11; sheba tlhaloso ea 29 lethathamong la Litlhaloso qetellong ea buka.

14, 15. Ke hobane’ng ha bana ba lokela ho mamela batsoali ba bona?

¹⁴ Jesu o ne a mamela Ntate oa hae ka linako tsohle leha ho ne ho le thata. (Luka 22:42; Johanne 8:28, 29) Jehova o batla hore bana le bona ba mamele batsoali.—Baefese 6:1-3.

¹⁵ Bana, tsebang hore ha le mamela batsoali ba lona, esita leha ho se bonolo, le tla thabisa Jehova le batsoali ba lona. *—Liproverbia 1:8; 6:20; 23:22-25.

16. (a) Satane o khelosa bacha joang? (b) Ke hobane’ng ha ho le bohlokoa ho ba le metsoalle e mamelang Jehova?

¹⁶ Kaha Diabolose oa tseba hore ho ka ba bonolo hore u mamele lithaka tsa hao le metsoalle ea hao, a ka e sebelisa ho u khelosa. Lelapa la Jakobo le ile la hlaheloa ke mathata a maholo hobane morali oa hae Dina, a ile a ba le metsoalle e sa mameleng Jehova. (Genese 34:1, 2) Haeba metsoalle ea hao e sa mamele Jehova, e ka u khelosa eaba u etsa ntho eo Jehova a e hloileng. Ka lebaka leo, u ka qetella u utloile bohloko u bile u utloisitse Molimo le ba lelapa leno bohloko. (Liproverbia  17:21, 25) Kahoo, ho bohlokoa hore u be le metsoalle e mamelang Jehova.—1 Bakorinthe 15:33.

17. Motho ka mong o lokela ho etsa’ng e le hore bohle ka lapeng ba thabe?

¹⁷ Batho ba ka qoba mathata a lelapa haeba ba mamela tataiso ea Molimo. Kahoo, haeba u monna, rata mosali oa hao u be u mo hlokomele. Haeba u mosali, hlompha monna oa hao u be u ikokobeletse eena ’me u etsise mosali eo ho builoeng ka eena ho Liproverbia 31:10-31. Haeba u motsoali, ruta bana ba hao ho rata Molimo. (Liproverbia 22:6) Bo-ntate ba lokela ho tataisa malapa a bona “ka mokhoa o motle.” (1 Timothea 3:4, 5; 5:8) Bana bona ba lokela ho hlompha batsoali ba bona. (Bakolose 3:20) Hopola hore motho e mong le e mong ka lapeng o etsa liphoso. Kahoo, ha u entse phoso, ikokobetse u be u kope tšoarelo. Bibele e na le likeletso tse tsoang ho Jehova tse ka thusang bohle ka lapeng.