Lengeloi le hlaha ho Josefa torong le re: “Tsoha, u nke ngoana e monyenyane le ’m’ae u balehele Egepeta, ’me u lule moo ho fihlela ke u laela, etsoe Heroda o haufi le ho batla ngoana eo e monyenyane hore a mo timetse.” (Matheu 2:​13) Ha Josefa a utloa litaba tsena, o tsosa Maria hang-hang ’me o mo bolella tsona.

Maria le Josefa ba balehela Egepeta le mor’a bona bosiung bona boo. Morena Heroda o loloma ke bohale hobane linohe tsa linaleli li mo tsoile tlaase, li khutletse habo tsona li sa mo bolella hore na Jesu o hokae. Kahoo o laela hore bana bohle ba bashanyana ba Bethlehema le ba haufi le eona, ba lilemo li peli ho ea tlaase ba bolaoe. O hakanya hore mohlomong Jesu o lilemong tseo a ipapisitse le seo linohe tsa linaleli li mo boleletseng sona.

Ha re tsebe hore na ho bolailoe bashanyana ba bakae empa re se re ka inahanela hore na ba shoele lefu le sehloho hakae. Seboko sa bo ’ma bona se otla pelo ’me taba ena e phethahatsa boprofeta ba Jeremia.​—Jeremia 31:15.

Ka mor’a nako ha Maria le Josefa ba ntse ba le Egepeta, lengeloi le hlaha ho Josefa torong le re: “Tsoha, u nke ngoana e monyenyane le ’m’ae ’me u tsamaee u kene naheng ea Iseraele, kaha ba neng ba batla moea oa ngoana e monyenyane ba shoele.” (Matheu 2:​20) Joale Josefa o etsa qeto ea ho khutlela ha habo ’me boprofeta ba Bibele boa phethahala bo reng: “Ke bitsitse mora oa ka Egepeta.”​—Hosea 11:1.

Josefa o etsa qeto ea ho khutlela ha habo Judea, mohlomong haufi le Bethlehema moo ba neng ba lula teng pele ba balehela Egepeta. Leha ho le joalo, oa utloela hore mora ea khopo oa Heroda ea bitsoang Arkelause e se e le  morena Judea. Torong e ’ngoe, Jehova o lemosa Josefa ka kotsi e ka hlahang ha a ka ea Judea. Joale Josefa o ea le lelapa la hae Nazaretha, seterekeng sa Galilea ’me Jesu o holela teng. Kahoo, ho phethahala boprofeta bo reng: “O tla bitsoa Monazaretha.”​—Matheu 2:​23.