Litabeng tsa borapeli, mosali oa Mokreste o lokela ho roala hloohong neng hona hobane’ng? A re ke re hlahlobeng seo moapostola Pauluse a ileng a bululeloa hore a se ngole mabapi le taba ena. O fana ka tataiso eo re e hlokang e le hore re etse liqeto tse nepahetseng le tse tlotlisang Molimo. (1 Bakorinthe 11:3-16) Pauluse o bua ka lintlha tse tharo tseo re lokelang ho li sekaseka: (1) mesebetsi e hlokang hore mosali a roale hloohong, (2) maemo ao a lokelang ho etsa joalo ho ’ona le (3) mabaka a etsang hore a sebelise molao ona.

Mesebetsi. Pauluse o bua ka e ’meli: thapelo le ho profeta. (Litemana 4, 5) Ka sebele thapelo ke ho buisana le Jehova ka tsela ea borapeli. Kajeno, ha ’moleli oa Mokreste a ruta ka Bibele ka tsela efe kapa efe ho ka thoe oa profeta. Leha ho le joalo, na Pauluse o bolela hore neng kapa neng ha mosali a rapela kapa a ruta ’nete ea Bibele o lokela ho roala hloohong? Che. Maemo ao mosali a rapelang kapa a rutang ho ’ona a etsa phapang.

Maemo. Mantsoe a Pauluse a hlalosa maemo a mabeli, e leng hore na thapelo kapa ho ruta ho etsetsoa hokae—ebang ke lapeng kapa phuthehong. O re: “Hlooho ea mosali ke monna . . . Mosali e mong le e mong ea rapelang kapa ea profetang hlooho ea hae e sa koaheloa o tlotlolla hlooho ea hae.” (Litemana 3, 5) Ka lapeng, monna ke eena eo Jehova a mo khethileng hore e be hlooho  ea mosali oa hae. Ha a sa bontše hore o hlompha bolaoli ba monna oa hae, o ne a tla be a tlotlolla monna oa hae haeba a ne a ka etsa mesebetsi eo Jehova a e abetseng monna. Ho etsa mohlala, haeba ho ne ho ka hlokahala hore a khanne thuto ea Bibele moo monna oa hae a leng teng, o ne a tla bontša hore o hlompha bolaoli ba hae ka hore a roale hloohong. O ne a tla etsa joalo ho sa tsotellehe hore na monna eo o kolobelitsoe kapa che kaha monna eo ke hlooho ea lelapa. * Haeba a lokela ho rapela kapa ho ruta moo mora oa hae e monyenyane ea kolobelitsoeng a leng teng, le teng o lokela ho roala, eseng hobane mora eo e le hlooho ea lelapa, empa o etsa joalo ka lebaka la bolaoli bo filoeng batho ba batona ba kolobelitsoeng ka hare ho phutheho ea Bokreste.

Pauluse o hlalosa boemo ba phuthehong ’me o re: “Haeba motho leha e le ofe a bonahala a pheha khang ka lebaka la tloaelo e ’ngoe e itseng, ha re na e ’ngoe, leha e le hore liphutheho tsa Molimo li na le eona.” (Temana ea 16) Ka phuthehong ea Bokreste bohlooho bo filoe batho ba batona ba kolobelitsoeng. (1 Timothea 2:11-14; Baheberu 13:17) Ke batho ba batona feela ba khetheloang ho ba baholo le ho ba bahlanka ba sebeletsang bao Molimo a ba fileng boikarabelo ba ho hlokomela mohlape oa hae. (Liketso 20:28) Leha ho le joalo, ka linako tse ling mosali oa Mokreste a ka ’na a kōptjoa hore a etse mosebetsi oo ka tloaelo o etsoang ke motho e motona ea kolobelitsoeng ea bileng a tšoanelehang. Ho tea mohlala, ho ka ’na ha hlokahala hore a tsamaise seboka sa tšebeletso ea tšimo hobane ho se na mor’abo rōna ea kolobelitsoeng ea tšoanelehang kapa hobane a le sieo ka nako eo. Kapa a ka ’na a khanna thuto ea lehae ea Bibele e hlophisitsoeng esale pele moo mor’abo rōna ea kolobelitsoeng a leng teng. Kaha mesebetsi ena ke karolo ea mesebetsi e etsoang ka phuthehong ea Bokreste, o ne a tla roala hloohong ha a e etsa ho bontša hore oa hlokomela hore o etsa mesebetsi eo ka tloaelo e abeloang barab’abo rōna.

Ka lehlakoreng le leng, ho na le likarolo tse ngata tsa borapeli ba rōna tse sa hlokeng hore morali’abo rōna a roale. Ho tea mohlala,  ha ho hlokahale hore a roale ha a fana ka tlhaloso libokeng tsa Bokreste, ha a etsa tšebeletso ea ntlo le ntlo le monna oa hae kapa le mor’abo rōna ea kolobelitsoeng, kapa ha a ithuta kapa a rapela le bana ba hae ba sa kolobetsoang. Ha e le hantle, ho ka ’na ha hlaha lipotso tse ling, ’me haeba morali’abo rōna a sa tsebe karabo hantle, a ka ’na a etsa lipatlisiso. * Haeba a ntse a sa tiiseha ebile letsoalo la hae le mo susumelletsa hore a roale, o tla be a sa etse phoso, joalokaha ho bontšitsoe setšoantšong mona.

Mabaka. Temaneng ea 10, re fumana mabaka a mabeli ao ka ’ona mosali oa Mokreste a ka ’nang a batla ho roala hloohong: ‘Mosali o tšoanela ho ba le pontšo ea ho laeloa hloohong ea hae ka lebaka la mangeloi.’ Pele, hlokomela poleloana e reng, “pontšo ea ho laeloa.” Ha mosali a roala hloohong, o bontša hore o hlompha bolaoli boo Jehova a bo fileng batho ba batona ba kolobelitsoeng ka phuthehong. Kahoo, o bontša hore o rata Jehova Molimo ebile o tšepahala ho eena. Lebaka la bobeli le fumanoa mantsoeng a reng “ka lebaka la mangeloi.” Ka ho roala hloohong, mosali o ama libōpuoa tseo tse matla tsa moea joang?

Mangeloi a thahasella ho bona hore bolaoli ba Molimo boa hlomphuoa mokhatlong oohle oa Jehova, leholimong le lefatšeng. Mohlala oa batho ba sa phethahalang o boetse o tsoela mangeloi molemo ntlheng ena. Etsoe le ’ona a lokela ho ikokobelletsa tokisetso ea Jehova—e leng teko e ileng ea hlōla mangeloi a mangata nakong e fetileng. (Juda 6) Joale, mangeloi a ka ’na a bona liketsahalo tseo ho tsona mosali oa Mokreste ea nang le boiphihlelo tabeng e itseng, ea nang le tsebo e batsi le ea bileng a leng bohlale ho feta mor’abo rōna ea kolobelitsoeng ka phuthehong, a ikokobelletsang bolaoli ba mora eo oabo rōna. Maemong a mang mosali eo ke Mokreste ea tlotsitsoeng eo hamorao e tla ba e mong oa majalefa hammoho le Kreste. Qetellong mosali ea joalo o tla sebeletsa  boemong bo phahameng le ho feta ba mangeloi ’me a buse le Kreste leholimong. Oo ke mohlala o motle hakaakang oo mangeloi a ka o elang hloko hona joale! Ka sebele, baralib’abo rōna kaofela ba na le tokelo e kaakang ea hore ba bontše boikokobetso ka hore ka botšepehi ba itšoare ka tsela e bontšang boikokobetso moo ba bonoang ke mangeloi a limilione a tšepahalang!