Molimo o mema batho ba lichaba tsohle hore ba atamele haufi le eena ka thapelo. (Pesaleme ea 65:2) Leha ho le joalo, ha a mamele kapa hona ho amohela lithapelo tsohle. Ka mohlala, lithapelo tsa monna ea tšoarang mosali oa hae hampe li ka sitisoa. (1 Petrose 3:7) Hape, ha Baiseraele ba ne ba tsoela pele ho etsa lintho tse mpe, Molimo o ne a hana ho mamela lithapelo tsa bona. Ho hlakile hore thapelo ke ntho ea bohlokoa. Leha ho le joalo, Molimo a ka mamela esita le lithapelo tsa baetsalibe ba feteletseng haeba ba baka.—Bala Esaia 1:15; 55:7.

Shebella video ea Na Molimo o Mamela Lithapelo Tsohle?

Thapelo ke karolo ea borapeli ba rōna, kahoo re lokela ho rapela ’Mōpi oa rōna feela, e leng Jehova. (Matheu 4:10; 6:9) Hape, kaha ha rea phethahala, re lokela ho rapela ka lebitso la Jesu, hobane ke eena ea shoetseng libe tsa rōna. (Johanne 14:6) Jehova ha a batle hore re pheta-phete lithapelo tseo re li tsebang ka hlooho kapa tseo re li ngotseng. O batla hore re mo bolelle se ka lipelong tsa rōna.​—Bala Matheu 6:7; Bafilipi 4:6, 7.

’Mōpi oa rōna a ka utloa le lithapelo tse etsetsoang ka pelong. (1 Samuele 1:12, 13) O re khothalletsa hore re rapele ka linako tsohle, tse kang ha re tsoha, ha re il’o robala, nakong ea lijo le ha re e-na le mathata.​—Bala Pesaleme ea 55:22; Matheu 15:36.

Ha ho bonolo hore re atamele haufi le Molimo hobane re phela le batho ba sa lumeleng ho Molimo le ba somang tšepiso ea hae ea hore ho tla ba le khotso lefatšeng. (2 Timothea 3:1, 4; 2 Petrose 3:3, 13) Kahoo re lokela ho tloaelana le batho ba re khothatsang, e leng balumeli-’moho le rōna, ’me le bona baa re hloka.—Bala Baheberu 10:24, 25.

 Ho tloaelana le batho ba ratang Molimo, ho re thusa hore re atamele haufi le eena. Liboka tsa Lipaki Tsa Jehova li re fa monyetla oa hore re khothatsoe ke tumelo ea ba bang.—Bala Baroma 1:11, 12.

U ka atamela haufi le Jehova ka hore u thuise ka lintho tseo u ithutileng tsona Lentsoeng la hae. Nahanisisa ka mesebetsi ea hae, ka litaelo tsa hae le ka litšepiso tsa hae. Ha u rapela u bile u thuisa ka lintho tsena, u tla ananela lerato la Molimo le bohlale ba hae ka pelo eohle.—Bala Joshua 1:8; Pesaleme ea 1:1-3.

U ka atamela haufi le Molimo hafeela u mo tšepa ’me u lumela ho eena. Empa tumelo e tšoana le ntho e phelang e lokelang ho feptjoa. U lokela ho lula u matlafatsa tumelo ea hao ka ho nahanisisa ka seo u se lumelang.—Bala Matheu 4:4; Baheberu 11:1, 6.

Jehova o hlokomela ba mo ratang. A ka ba sireletsa nthong leha e le efe e ka ’nang ea beha tumelo le tšepo ea bona ea ho phela ka ho sa feleng kotsing. (Pesaleme ea 91:1, 2, 7-10) O re lemosa ka mekhoa e ka senyang bophelo ba rōna le e ka re sitisang ho thaba. Jehova o re ruta ho phela ka tsela e molemo ka ho fetisisa.—Bala Pesaleme ea 73:27, 28; Jakobo 4:4, 8.