Ho na le batho ba ratang ’nete malumeling ’ohle. Ke litaba tse molemo hore ebe Molimo o bona batho ba joalo le hore oa ba tsotella. Empa ka masoabi, bolumeli bo ’nile ba sebelisetsoa merero e mebe. (2 Bakorinthe 4:3, 4; 11:13-15) Ho ea ka litlaleho tsa litaba, malumeli a mang a ameha liketsong tsa bokhukhuni, litlhaselong tse reretsoeng ho timetsa merabe e meng, lintoeng le tlhekefetsong ea bana. Batho ba lumelang ho Molimo e le kannete ba utloisoa bohloko ke liketso tsena.—Bala Matheu 24:3-5, 11, 12.

Le hoja bolumeli ba ’nete bo tlotlisa Molimo, bolumeli ba bohata bona ha bo mo khahlise. Bo ruta likhopolo tse sieo ka Bibeleng, tse akarelletsang ho ruta leshano ka Molimo le ka bafu. Empa Jehova o batla hore batho ba tsebe ’nete ka eena.—Bala Ezekiele 18:4; 1 Timothea 2:3-5.

Taba e thabisang ke hore Molimo a ke ke a thetsoa ke malumeli a ipolelang hore aa mo rata empa ha e le hantle a rata lefatše la Satane. (Jakobo 4:4) Lentsoe la Molimo le re malumeli ’ohle a bohata ke “Babylona e Moholo.” Babylona e ne e le motse oa boholo-holo oo ho oona bolumeli ba bohata bo qalileng teng ka mor’a Moroallo oa mehleng ea Noe. Haufinyane Molimo o tla timetsa ka tšohanyetso bolumeli bona bo thetsang le ho hatella batho.—Bala Tšenolo 17:1, 2, 5, 16, 17; 18:8.

Ho na le litaba tse ling tse molemo. Jehova ha aa lebala batho ba ratang ’nete, ba hasa-hasaneng malumeling a bohata a lefatšeng lohle. O bokanya batho bao ka ho ba ruta ’nete.—Bala Mikea 4:2, 5.

Jehova o tsotella batho ba ratang ’nete le toka. O ba khothalletsa hore ba tsoe bolumeling ba bohata. Batho ba ratang Molimo ba ikemiselitse ho fetoha e le hore ba mo khahlise.—Bala Tšenolo 18:4.

Lekholong la pele la lilemo, batho ba ratang ’nete ba ile ba thaba ha ba utloa litaba tse molemo ho baapostola. Ba ile ba ithuta ho Jehova tsela e ncha ea ho phela, e leng ho phela ba thabile, ba phela bophelo bo nang le morero le tšepo. Ba re behetse mohlala o motle, hobane ba ile ba amohela litaba tse molemo ’me ba etsa hore Jehova a tle pele bophelong ba bona.—Bala 1 Bathesalonika 1:8, 9; 2:13.

Jehova o amohela ka lelapeng la hae batho ba furallang bolumeli ba bohata. Haeba u amohela ho mengoa ke Jehova, u tla ba motsoalle oa hae, u be setho sa lelapa le lerato la barapeli ba Jehova, ’me u fumane bophelo bo sa feleng.—Bala Mareka 10:29, 30; 2 Bakorinthe 6:17, 18.

Kahlolo e tlang ea borapeli ba bohata ke litaba tse molemo. E tla lokolla lefatše lohle khatellong. Le ka mohla bolumeli ba bohata bo ke ke ba hlola bo khelosa batho le ho ba arola. Batho bohle ba phelang ka nako eo ba tla kopanngoa borapeling bo le bong feela ba Molimo oa ’nete.—Bala Tšenolo 18:20, 21; 21:3, 4.