U KHA apole e hlabosang sefateng. U utloa monko oa eona o monate pele u e tšela ka basketeng e ntseng e tlala. U se u qetile lihora tse ngata u ntse u sebetsa, empa u ntse u le mahlahahlaha hore u ka ’na ua tsoela pele. ’Mè oa hao o ntse a sebetsa sefateng se pel’a hao a thabile ’me a ntse a qoqa le beng ka lōna ba bang ba ntseng ba le thusa ho kotula. O bonahala a le mocha—joaloka kamoo u neng u mo tseba kateng ha u sa le ngoana. Ho thata ho lumela hore u ile ua mo bona a tsofala ha le sa phela lefatšeng le seng le fetile. U ile ua mo bona ha a ntse a thefuloa ke bokuli, u ne u mo tšoere ka letsoho ha a hlokahala ’me u ile ua lla ha a ne a epeloa mabitleng. Empa, ke enoa hammoho le ba bang ba bangata, baa phela ’me ba mafolofolo!

Rea tseba hore nako eo ea tla. Re tseba seo hobane kamehla litšepiso tsa Molimo lia phethahala. Karolong ena, re tla tšohla kamoo tse ling tsa litšepiso tsa ’Muso li tla phethahala kateng haufinyane, ha ntoa ea Armagedone e ntse e atamela. Re tla boela re tšohle tse ling tsa litšepiso tsa ’Muso tse thabisang tse tla phethahala ka mor’a moo. Re tla thaba hakaakang ha re bona ’Muso oa Molimo o busa lefatše lohle, o etsa hore lintho tsohle li be ncha!