1. Re tla rua molemo joang haeba re rapela Molimo ka tsela e nepahetseng?

JEHOVA MOLIMO o re tsotella ka ho tebileng ’me o batla hore re ruoe molemo tataisong ea hae e lerato. Haeba re mo rapela ka tsela e nepahetseng, re tla thaba ebile re tla qoba mathata a mangata bophelong. Hape o tla re hlohonolofatsa ’me a re thuse. (Esaia 48:17) Leha ho le joalo, ho na le malumeli a makholo a ipolelang hore a ruta seo e leng ’nete ka Molimo. Empa a ruta lithuto tse fapaneng haholo ka Molimo le ka seo a se lebeletseng ho rōna.

2. Re ka etsa’ng ho ithuta tsela e nepahetseng ea ho rapela Jehova, hona ke mohlala ofe o re thusang ho utloisisa see?

² U ka etsa’ng e le hore u tsebe tsela e nepahetseng ea ho rapela Jehova? Ha ho hlokahale hore u ithute lithuto tsa malumeli ana ’ohle a mangata ebe ua li bapisa. Ho hlokahala feela hore u ithute seo ha e le hantle Bibele e se rutang ka borapeli ba ’nete. Ka mohlala: Linaheng tse ngata, ho na le bothata ba chelete ea maiketsetso. Haeba u ne u fuoe mosebetsi oa ho khetholla chelete eo ea maiketsetso, u ne u ka etsa’ng? Na u ne u tla tšoara ka hlooho mofuta o mong le o mong oa chelete ea maiketsetso? Che. U ne u tla sebelisa nako ea hao hamolemo haeba u ne u ka qeta nako u ithuta chelete ea sebele. Ha u se u tseba hore na chelete ea sebele e shebahala joang, u tla khona ho tseba ea maiketsetso. Ka ho tšoanang, ha re ithuta ho khetholla bolumeli ba ’nete, re tla khona ho tseba malumeli a mang a bohata.

3. Ho ea ka Jesu, re lokela ho etsa’ng haeba re batla ho amoheloa ke Molimo?

 ³ Ke habohlokoa hore re rapele Jehova ka tsela eo a e amohelang. Batho ba bangata ba lumela hore malumeli ’ohle a khahlisa Molimo, empa Bibele ha e rute seo. Esita le ho ipolela feela hore motho ke Mokreste ha hoa lekana. Jesu o ile a re: “Hase e mong le e mong ea reng ho ’na, ‘Morena, Morena,’ ea tla kena ’musong oa maholimo, empa ho tla kena ea etsang thato ea Ntate ea maholimong.” Ka hona, e le hore Molimo a re amohele, re lokela ho ithuta seo Molimo a se hlokang ho rōna ’me re se etse. Jesu o ile a re ba sa etseng thato ea Molimo ke “ba etsang tlōlo ea molao.” (Matheu 7:21-23) Bolumeli ba bohata ha bo na molemo oa sebele, bo tšoana le chelete ea maiketsetso. Ho hobe le ho feta ke hore ha e le hantle bolumeli boo bo kotsi.

4. Jesu o ne a bolela’ng ka litsela tse peli, hona tsela ka ’ngoe e lebisa hokae?

⁴ Jehova o fa motho e mong le e mong mona lefatšeng monyetla oa hore a fumane bophelo bo sa feleng. Empa e le hore re phele ka ho sa feleng Paradeiseng, re lokela ho rapela Molimo ka tsela e loketseng ’me hona joale re phele ka tsela eo a e amohelang. Ka masoabi, ba bangata ba hana ho etsa seo. Ke kahoo Jesu a ileng a re: “Kenang ka heke e moqotetsane; hobane tsela e isang timetsong e pharaletse ebile e khōlō, ’me ba kenang ka eona ba bangata; athe heke e isang bophelong e moqotetsane le tsela e isang teng e patisane, ’me ke ba seng bakae ba e fumanang.” (Matheu 7:13, 14) Bolumeli ba ’nete bo lebisa bophelong bo sa feleng. Bolumeli ba bohata bo lebisa timetsong. Jehova ha a batle hore leha e le mang a timele, ke kahoo a fang batho bohle monyetla oa hore ba ithute ka eena. (2 Petrose 3:9) Ka hona, tsela eo re rapelang Molimo ka eona e bolela lefu kapa bophelo ho rōna.

5. Re ka khetholla ba phelang ka bolumeli ba ’nete joang?

⁵ Batho ba ka fumana ‘tsela e isang bophelong’ joang? Jesu  o ile a re bolumeli ba ’nete bo tla bonahatsoa ke tsela eo batho ba leng ho bona ba phelang ka eona. O ile a re: “Le tla ba tseba ka litholoana tsa bona. . . . Sefate se seng le se seng se setle se hlahisa litholoana tse ntle.” (Matheu 7:16, 17) Ka mantsoe a mang, ba phelang ka bolumeli ba ’nete ba ne ba tla khetholloa ka seo ba se lumelang le ka boitšoaro ba bona. Le hoja ba sa phethahala ’me ba etsa liphoso, barapeli ba ’nete e le sehlopha ba leka ho etsa thato ea Molimo. A re hlahlobe litšobotsi tse tšeletseng tse khethollang ba phelang ka bolumeli ba ’nete.

6, 7. Bahlanka ba Molimo ba talima Bibele joang, hona Jesu o ile a beha mohlala joang tabeng ee?

⁶ Bahlanka ba Molimo ba theha lithuto tsa bona Bibeleng. Bibele e re: “Lengolo lohle le bululetsoe ke Molimo ’me le molemo bakeng sa ho ruta, bakeng sa ho khalemela, bakeng sa ho otlolla lintho, bakeng sa ho laea ka ho loka, e le hore motho oa Molimo a ka tšoaneleha ka botlalo, a hlomelloa ka ho feletseng bakeng sa mosebetsi o mong le o mong o molemo.” (2 Timothea 3:16, 17) Moapostola Pauluse o ile a ngolla Bakreste-’moho le eena a re: “Ha le amohela lentsoe la Molimo, leo le ileng la le utloa ho rōna, ha lea ka la le amohela e le lentsoe la batho, empa, feela joalokaha kannete le le joalo, e le lentsoe la Molimo.” (1 Bathesalonika 2:13) Kahoo, mekhoa le litumelo tsa bolumeli ba ’nete ha lia thehoa maikutlong kapa lineanong tsa batho. Li thehiloe Lentsoeng la Molimo le bululetsoeng, e leng Bibele.

⁷ Jesu Kreste o ile a beha mohlala o motle ka ho theha seo a se rutang Lentsoeng la Molimo. Thapelong ho Ntate oa hae oa leholimo, o ile a re: “Lentsoe la hao ke ’nete.” (Johanne 17:17) Jesu o ne a lumela Lentsoe la Molimo, ’me sohle seo a neng a se ruta se ne se lumellana le Mangolo. Jesu o ne a atisa ho re: “Ho ngoliloe.” (Matheu 4:4, 7, 10) Ebe ka mor’a moo Jesu o qotsa temana. Ka ho tšoanang, batho ba Molimo kajeno ha ba rute likhopolo tsa bona. Ba lumela hore Bibele ke Lentsoe la Molimo, ’me ba theha seo ba se rutang ka tieo ho seo e se buang.

8. Ho rapela Jehova ho akarelletsa eng?

 ⁸ Ba phelang ka bolumeli ba ’nete ba rapela Jehova a ’notši ’me ba tsebahatsa lebitso la hae. Jesu o ile a re: “Ke Jehova Molimo oa hao eo u tla mo rapela, ’me ke eena feela eo u tla mo etsetsa tšebeletso e halalelang.” (Matheu 4:10) Kahoo, bahlanka ba Molimo ba rapela Jehova a notši. Borapeli bona bo akarelletsa ho tsebisa batho lebitso la Molimo le seo a leng sona. Pesaleme ea 83:18 e re: “Uena, eo lebitso la hao e leng Jehova, uena u le mong u Ea Phahameng ka ho Fetisisa holim’a lefatše lohle.” Jesu o ile a beha mohlala ka ho thusa ba bang hore ba tsebe Molimo, joalokaha a ile a re thapelong: “Ke senotse lebitso la hao ho batho bao u mphileng bona lefatšeng.” (Johanne 17:6) Ka ho tšoanang, barapeli ba ’nete kajeno ba ruta ba bang lebitso la Molimo, merero ea hae le litšobotsi tsa hae.

9, 10. Bakreste ba ’nete ba bontšana lerato ka litsela life?

⁹ Batho ba Molimo ba bontšana lerato la sebele, le se nang boithati. Jesu o ile a re: “Bohle ba tla tseba ka sena hore le barutuoa ba ka, haeba le e-na le lerato har’a lōna.” (Johanne 13:35) Bakreste ba pele ba ne ba ratana ka tsela eo. Lerato le thehiloeng melao-motheong ea Molimo le hlōla mekoallo ea merabe, maemo a bophelo le bochaba ’me le kopanya batho hammoho ka tlamo e ke keng ea khaoha ea kutloano ea sebele ea bara ba motho. (Bakolose 3:14) Litho tsa malumeli a bohata ha li na kutloano e joalo e lerato ea bara ba motho. Re tseba seo joang? Lia bolaeana ka lebaka la likhohlano tsa bochaba kapa tsa merabe. Bakreste ba ’nete ha ba nke lihlomo ho ea bolaea barab’abo bona ba Bakreste kapa motho leha e le ofe e mong. Bibele e re: “Bana ba Molimo le bana ba Diabolose ba totobala ka ’nete ena: E mong le e mong ea sa tsoeleng pele ho etsa ho loka ha a simolohe ho Molimo, leha e le ea sa rateng mor’abo. . . . Re lokela ho ratana; eseng joaloka Kaine, ea ileng a simoloha ho ea khopo ’me a bolaea mor’abo.”—1 Johanne 3:10-12; 4:20, 21.

¹⁰ Ho hlakile hore ho ba le lerato la sebele ha ho bolele feela ho qoba ho bolaea ba bang. Bakreste ba ’nete ba sebelisa nako  ea bona, matla a bona le matlotlo a bona ka ho hloka boithati hore ba thusane le hore ba khothatsane. (Baheberu 10:24, 25) Baa thusana linakong tsa tsieleho, ’me ba sebelisana le ba bang ka botšepehi. Ha e le hantle, ba sebelisa keletso ea Bibele bophelong ba bona ea hore ba ‘sebetse se molemo ho bohle.’—Bagalata 6:10.

11. Ke hobane’ng ha e le habohlokoa ho amohela Jesu Kreste e le eo Molimo a mo sebelisang ho re pholosa?

¹¹ Bakreste ba ’nete ba amohela Jesu Kreste e le eo Molimo a mo sebelisang ho re pholosa. Bibele e re: “Ha ho poloko ho mang kapa mang e mong, kaha ha ho lebitso le leng tlas’a leholimo leo ho fanoeng ka lona har’a batho leo ka sebele re tla pholoha ka lona.” (Liketso 4:12) Joalokaha re bone Khaolong ea 5, Jesu o ile a tela bophelo ba hae e le thekollo bakeng sa batho ba mamelang. (Matheu 20:28) Ho feta moo, Molimo o khethile Jesu hore e be Morena oa ’Muso oa leholimo o tla busa lefatše lohle. Molimo o batla hore re mamele Jesu ’me re sebelise lithuto tsa hae haeba re batla bophelo bo sa feleng. Ke kahoo Bibele e reng: “Ea bontšang tumelo ho Mora o na le bophelo bo sa feleng; ea sa mameleng Mora a ke ke a bona bophelo.”—Johanne 3:36.

12. Ho se be karolo ea lefatše ho akarelletsa eng?

¹² Barapeli ba ’nete hase karolo ea lefatše. Ha Jesu a le nyeoeng ka pel’a ’musi oa Moroma, Pilato, o ile a re: “’Muso oa ka hase karolo ea lefatše lena.” (Johanne 18:36) Ho sa tsotellehe hore na balateli ba ’nete ba Jesu ba phela naheng efe, ke bafo ba ’Muso oa hae oa leholimo, kahoo ba lula ba sa nke lehlakore ka ho feletseng litabeng tsa lefatše lena tsa lipolotiki. Ha ba kenelle likhohlanong tsa lona. Leha ho le joalo, barapeli ba Jehova ha ba kena-kenane le seo ba bang ba khethang ho se etsa tabeng ea ho kena mekheng ea lipolotiki, ho ba bo-nkhetheng, kapa ho vouta. Le hoja barapeli ba ’nete ba Molimo ba sa nke lehlakore lipolotiking, ba boloka molao. Hobane’ng? Hobane Lentsoe la Molimo le ba laela hore ba “ipehe tlas’a balaoli ba phahameng” ba ’muso. (Baroma 13:1) Ha ho e-na le khohlano pakeng tsa seo Molimo a se hlokang le seo tsamaiso  ea lipolotiki e se hlokang, barapeli ba ’nete ba latela mohlala oa baapostola, ba ileng ba re: “Re tla mamela Molimo e le ’musi ho e-na le batho.”—Liketso 5:29; Mareka 12:17.

13. Balateli ba ’nete ba Jesu ba talima ’Muso oa Molimo joang, ka hona ba etsa’ng?

¹³ Balateli ba ’nete ba Jesu ba ruta hore ’Muso oa Molimo ke eona feela tšepo bakeng sa moloko oa batho. Jesu o ile a bolela esale pele, a re: “Litaba tsena tse molemo tsa ’muso li tla boleloa  lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.” (Matheu 24:14) Ho e-na le hore balateli ba ’nete ba Jesu Kreste ba khothalletse batho ho itšetleha ka babusi ba batho hore ba ba rarollele mathata a bona, ba phatlalatsa hore ’Muso oa Molimo oa leholimo ke eona feela tšepo bakeng sa moloko oa batho. (Pesaleme ea 146:3) Jesu o ile a re ruta hore re rapelle puso eo e phethahetseng ha a re: “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.” (Matheu 6:10) Lentsoe la Molimo le ile la bolela esale pele hore ’Muso ona oa leholimo “o tla silakanya o felise mebuso ena [e teng hona joale] kaofela, ’me o tla ema ho isa linakong tse sa lekanyetsoang.”—Daniele 2:44.

14. Ke sehlopha sefe sa bolumeli seo u lumelang hore se finyella se hlokahalang bakeng sa borapeli ba ’nete?

¹⁴ U ipapisitse le seo re sa tsoa se hlahloba, ipotse: ‘Ke sehlopha sefe sa bolumeli se thehang lithuto tsohle tsa sona Bibeleng se bileng se tsebahatsang lebitso la Jehova? Ke sehlopha sefe se bonahatsang lerato ka tsela eo Molimo a e laetseng, se bontšang tumelo ho Jesu, seo e seng karolo ea lefatše se bileng se phatlalatsang hore ’Muso oa Molimo ke eona feela tšepo ea sebele bakeng sa moloko oa batho? Lihlopheng tsohle tsa malumeli tse teng lefatšeng, ke sefe se etsang lintho tsee kaofela tse hlokahalang?’ Linnete li bontša ka ho hlaka hore ke Lipaki Tsa Jehova.—Esaia 43:10-12.

15. Molimo o hloka eng ho phaella ntlheng ea ho lumela hore o teng?

¹⁵ Ho lumela feela hore Molimo o teng ha hoa lekana hore motho a khahlise Molimo. Etsoe Bibele e re esita le bademona baa lumela hore Molimo o teng. (Jakobo 2:19) Empa ho hlakile hore ha ba etse thato ea Molimo ebile Molimo ha a ba amohele. E le hore Molimo a re amohele, ha rea lokela feela ho lumela hore o teng empa hape re lokela ho etsa thato ea hae. Hape re lokela ho ikarola bolumeling ba bohata ’me re kene borapeling ba ’nete.

16. Motho o lokela ho etsa’ng haeba a le bolumeling ba bohata?

 ¹⁶ Moapostola Pauluse o ile a bontša hore ha rea lokela ho kopanela borapeling ba bohata. O ile a ngola a re: “‘Tsoang har’a bona, ’me le ikarole,’ ho bolela Jehova, ‘le khaotse ho ama ntho e sa hloekang’; ‘’me ke tla le amohela.’” (2 Bakorinthe 6:17; Esaia 52:11) Kahoo Bakreste ba ’nete ba qoba ntho leha e le efe e amanang le borapeli ba bohata.

17, 18. “Babylona e Moholo” ke eng, hona ke hobane’ng ha ho potlakile hore u ‘tsoe ho eona’?

¹⁷ Bibele e bontša hore mefuta eohle e mengata ea bolumeli ba bohata ke karolo ea “Babylona e Moholo.” * (Tšenolo 17:5) Lebitso leo le re hopotsa motse oa Babylona ea boholo-holo, e leng moo bolumeli ba bohata bo qalileng teng ka mor’a Moroallo oa mehleng ea Noe. Lithuto tse ngata le mekhoa e mengata e atileng bolumeling ba bohata kajeno li simolohile khale koana Babylona. Ka mohlala, Bababylona ba ne ba rapela lihlopha tsa melimo e meraro. Kajeno, Boraro-bo-bong ke thuto ea motheo malumeling a mangata. Empa Bibele e ruta ka ho hlaka hore ho na le Molimo a le mong feela oa ’nete, Jehova, ’me Jesu Kreste ke Mora oa hae. (Johanne 17:3) Bababylona ba ne ba boetse ba lumela hore batho ba na le moea o sa shoeng o tsoelang pele o phela ha ’mele o shoa le o ka hlokofatsoang sebakeng se itseng sa tlhokofatso. Kajeno, malumeli a mangata a ruta thuto ea hore moea o sa shoeng o ka hlokofatsoa mollong oa lihele.

¹⁸ Kaha borapeli ba Bababylona ba boholo-holo bo nametse likarolong tsohle tsa lefatše, ho ka boleloa ka ho loketseng hore Babylona e Moholo ea kajeno ke ’muso oa lefatše oa bolumeli ba bohata. Molimo o boletse esale pele hore ’muso ona oa bolumeli ba bohata o tla felisoa ka tšohanyetso. (Tšenolo 18:8) Na ua bona hore na ke hobane’ng ha e le habohlokoa hore u ikarole karolong e ’ngoe le e ’ngoe ea Babylona e Moholo?  Jehova Molimo o batla hore u ‘tsoe ho eona’ ka potlako nako e sa le teng.—Tšenolo 18:4.

19. U tla fumana eng ha u sebeletsa Jehova?

¹⁹ Ba bang ba ka ’na ba khetha hore ba ke ke ba hlola ba tsamaea le uena kahobane u entse qeto ea ho khaotsa ho kopanela bolumeling ba bohata. Empa ha u sebeletsa Jehova le batho ba hae, u tla fumana melemo e mengata ho feta ntho leha e le efe e ka u lahlehelang. Joaloka barutuoa ba Jesu ba pele ba ileng ba siea lintho tse ling ba mo latela, u tla fumana bara le barali beno ba bangata ba moea. U tla ba karolo ea lelapa le leholo la Bakreste ba ’nete ba limilione lefatšeng ka bophara ba u bontšang lerato la sebele. U tla ba le tšepo e hlollang ea ho phela ka ho sa feleng “tsamaisong ea lintho e tlang.” (Mareka 10:28-30) Mohlomong ka mor’a nako, bao ba ileng ba u furalla ka lebaka la seo u se lumelang ba tla hlahloba seo Bibele e se rutang ’me le bona e be barapeli ba Jehova.

20. Ba phelang ka bolumeli ba ’nete ba letetsoe ke bokamoso bofe?

²⁰ Bibele e ruta hore haufinyane Molimo o tlil’o felisa tsamaiso ena e khopo ea lintho ’me a e nkele sebaka ka lefatše le lecha la ho loka le busoang ke ’Muso oa hae. (2 Petrose 3:9, 13) Leo e tla ba lefatše le hlollang hakaakang! ’Me tsamaisong eo e ncha ea ho loka, ho tla ba le bolumeli bo le bong feela, borapeli bo le bong feela ba ’nete. Na hase bohlale hore u nke mehato e hlokahalang e le hore u kopanele le barapeli ba ’nete hona joale?