Bara le Barali Babo Rōna ba Ratehang:

Ho tloha ka khatiso ea January 1, 2008, ea Molula-Qhooa oa batho ka kakaretso, ho ile ha e-ba le lihlooho tse monate tse neng li e-na le sehlooho se reng “Bontša Tumelo e Tšoanang le ea Bona.” Ho tloha ka nako eo, ho ne ho hatisoa sehlooho se secha ka mor’a likhoeli tse ling le tse ling tse tharo ’me re ile ra li thabela haholo!

Batho ba ile ba ikutloa joang ka lihlooho tsee? Ka mor’a hore a bale sehlooho se neng se bua ka Maretha, ’mali e mong o ile a re: “Ha ke ne ke se bala, ke ile ka tšeha hobane ke tšoana hantle le eena—ha ke e-na le baeti, ke lula ke phathahane ka ho ba hlokomela ’me ka linako tse ling ke lebala le ho khefutsa e le hore ke thabele setsoalle le bona.” Mocha e mong o ile a bua mantsoe ana a thahasellisang ha a qeta ho bala pale ea Esthere: “Ke ile ka ithuta hore re ka iphumana re se re rata liaparo le lifeshene tsa morao-rao ka ho feteletseng. Ke ’nete hore re lokela ho apara hantle; empa ha re batle ho etsa lintho ka tsela e feteletseng.” O ile a phaella ka ho re: “Jehova o sheba seo re leng sona ka hare.” Sehlooho se neng se bua ka moapostola Petrose se ile sa etsa hore morali’abo rōna e mong a bue ka cheseho, a re: “Sehlooho sena se ile sa nkotla botsekeng, ke ile ka ikutloa eka ke moo. Ke ne ke bona le ho utloa lintho tseo sehlooho sena se sa li qapoliseng!”

Babali bana—le ba bang ba bangata ba ileng ba re ngolla e le ha ba bontša kananelo ka lihlooho tsena—ba tiisa seo moapostola Pauluse a ileng a se ngola khale, ha a ne a re: “Lintho tsohle tse ileng tsa ngoloa nakong e fetileng li ile tsa ngolloa ho re laea.” (Bar. 15:4) Ka sebele, Jehova o ile a etsa hore lipale tsena li ngoloe ka Bibeleng e le hore a re rute lithuto tsa bohlokoa. Kaofela ha rōna li ka re tsoela molemo, ho sa tsotellehe hore na re na le lilemo tse kae re tseba ’nete.

Re u khothalletsa ka mofuthu hore u bale buka ena kapele kamoo u ka khonang. E baleng hammoho ha le etsa Borapeli ba Lelapa—bana ba tla e rata haholo! Ha e baloa Thutong ea Bibele ea Phutheho, u se ke ua fosoa ke thuto leha e le ’ngoe! Iketlele eona ’me u thuise ka seo u se balang. Nahana ka se etsahalang; ipone u le moo. Ikutloe kamoo batho bao u balang ka bona ba neng ba ikutloa kateng, bona seo ba neng ba se bona. Bapisa seo ba ileng ba se etsa ha ba tobane le boemo bo itseng le seo uena u neng u tla se etsa.

Re thabela ho bala buka ena hammoho le lōna. E se eka e ka ba tlhohonolofatso ho uena le ho ba lelapa la hao. Re le rata haholo ’me re le lakaletsa se molemo,

Sehlopha se Busang sa Lipaki Tsa Jehova