Jesu o ile a bolella barutuoa ba hae a re: “Le tla ba lipaki tsa ka . . . ho isa karolong e hole-hole ea lefatše.” (Liketso 1:8) Kajeno Lipaki Tsa Jehova li etsa mosebetsi oo ka mafolo-folo. Leha ho le joalo likarolong tse ling tsa lefatše ho akarelletsa le moo ho nang le batho ba bangata, batho ha ba e-s’o ka ba fumana litaba tse molemo ka botlalo. Linaheng tse ling ho na le Lipaki tse fokolang ka palo. (Matheu 9:37, 38) Ke’ng eo re e etsang e le hore re fumane batho ba bangata kamoo ho ka khonehang?

 Komiti ea Tšebeletso ea Sehlopha se Busang sa Lipaki Tsa Jehova e abetse baromuoa hore ba il’o sebetsa moo ho nang le tlhoko ea bahoeletsi lefatšeng lohle, e le hore ho mameloe taelo ea Jesu. Hona joale ho na le baromuoa ba 3 090 lefatšeng lohle. a Bongata ba bona ba fumane koetliso sekolong sa Bibele, mohlala Sekolo sa Baevangeli ba ’Muso. Baromuoa ba ikemiselitse ho tloha hae ’me ba ee libakeng tse ling. Ka lebaka la tsebo eo ba nang le eona le koetliso eo ba e fumaneng, baromuoa bana ba tšepahalang ba bolela litaba tse molemo ’me ba behela barutuoa ba sa tsoa fihla ka phuthehong mohlala o motle.

 Lekaleng le leng le le leng, Ofisi e Hlokomelang Baboleli ea Lefapha la Tšebeletso e sebetsa le Komiti ea Lekala ho thusa baromuoa ka lintho tseo ba li hlokang, tse kang bolulo bo hantle, tsa bongaka le chelete e nyenyane e ka ba thusang hore ba koale litšenyehelo tsa bona. Nakong ea selemo sa tšebeletso sa 2020, Lipaki Tsa Jehova li sebelisitse chelete e ka etsang M370 980 000 ho hlokomela baromuoa. Ka lebaka la thuso eo ba e fumanang, baromuoa ba khona ho tsepamisa mohopolo le ho sebelisa matla a bona mosebetsing oa bona oa ho bolela litaba tse molemo le ho matlafatsa liphutheho tseo ba sebeletsang ho tsona.

 Baromuoa ba tlatsetsa joang mosebetsing oa boboleli? Mora oa bo rona Frank Madsen, e leng setho sa Komiti ea Lekala la Malawi o re: “Ka sebete le tsebo eo ba nang le eona, baromuoa ba khona ho thusa liphutheho ho bolela litaba tse molemo moo ho neng ho le thata ho li bolela, e leng libakeng tse kang metse e kampetsoeng le moo ho sa buuoeng puo ea bona. Kaha ba sebetsa ka thata ho ithuta puo le setso sa moo ba leng teng, sena se khothatsa batho ba bang ebile ba thusa bacha hore ba nahane ka ho kenela tšebeletso ea nako e tletseng. Re leboha Jehova ka hore ebe ho na le baromuoa.”

 Mora oa bo rona e mong oa Komiti ea Lekala naheng e ’ngoe o re: “Baromuoa ba bontša hore bahlanka ba Jehova ba momahane lefatšeng lohle. Le batho bao e seng Lipaki Tsa Jehova ba khona ho bona hore ha re khethollane ka setso, ho e-na le hoo lintho tseo re ithutileng tsona ka Bibeleng li re thusitse hore re be mokhatlo oa bara ba motho o momahaneng.”

 Baromuoa ba thusa bahoeletsi ba leng liphuthehong tsa bona joang? Mora oa bo rona Paulo ea lulang Timor-Leste, o ananela banyalani ba baromuoa ba sebeletsang phuthehong ea habo. O re: “Baromuoa bana ba tsoa sebakeng se batang haholo ’me mona hoa chesa. Leha ho le joalo, ba ntse ba tsoela pele ba bolela litaba tse molemo. Ba lula ba le teng hoseng ho hong le ho hong sebokeng sa tšimo. Hangata ke ne ke ba bona ba ea maetong a ho boela motšehare ho chesa haholo hape ba ne ba ea mantsiboea. Ba thusitse batho ba bangata ho ithuta ’nete, ho akarelletsa le ’na. Ho sebetsa ka thata le ho fa Jehova nako ea bona ho thusitse batho bohle ka phuthehong hore ba batle ho tseba Jehova haholoanyane.”

 Morali oa bo rona Ketti e leng pula-maliboho ea kamehla Malawi, ha a hopola kamoo banyalani ba baromuoa ba ileng ba thusa lelapa la hae o re: “E ne e le ’na feela Paki lapeng, ha banyalani ba baromuoa ba romeloa hore ba tl’o sebeletsa phuthehong ea heso. Banyalani bao ba ile ba re tšehetsa ’me e ile ea e-ba metsoalle e haufi ea lelapa la ka. Mohlala oa bona o motle o ile oa thusa bana ba ka ho bona hore ho sebeletsa Jehova ho tlisa thabo le bophelo bo khotsofatsang. Ka lebaka la tšusumetso e ntle ea baromuoa bana, hona joale barali ba ka ba bararo ke bo-pula-maliboho ba kamehla ’me monna oa ka o se a qalile ho ea libokeng.”

 Chelete e hlokomelang baromuoa etsoa hokae? E tsoa ho menehelo e ntšoang bakeng sa mosebetsi o etsoang lefatšeng lohle ’me bongata ba eona ke e ntšoang ho sebelisoa mekhoa e hlahang ho donate.pr418.com. Monehelo ona o ntšoang ka boithatelo o ananeloa haholo.