Khoeli e ’ngoe le e ’ngoe re lebella ka tjantjello ho shebella mananeo le livideo tse lokolloang ho JW Broadcasting. Empa bara ba bo rona ba bangata ba Afrika ha ba khone ho fumana mananeo ana ka Inthanete. Hobane’ng?

 Libakeng tse ngata Afrika ha ho na Inthanete, ebile hangata moo eleng teng ea sokolisa kapa e turu haholo. Mohlala, molebeli oa potoloho oa Madagascar o ile a ea moo ho rekisoang Inthanete. O ile a patala chelete e ka bang M246 ha a dounloada broadcasting ba khoeli e le ’ngoe feela. Chelete eo e feta eo batho ba bang ba e kholang ka beke.

 Le har’a mathata ana, batho ba bangata ba Afrika hona joale ba se ba thabela ho shebella JW Broadcasting ba sa sebelise Inthanete. Ba khona joang?

 Ho tloha ka 2017, ho ile ha etsoa hore batho ba lulang ka boroa ho Sahara ba khone ho shebella JW Broadcasting lithelevisheneng ka sathelaete. Ke mahala ho e shebella ebile e fumaneha nako eohle ka lipuo tse 16.

 Bakeng sa hore tsena tsohle li khonehe, Lipaki Tsa Jehova li ile tsa patala konteraka ea ho hasa mananeo ka sathalaete. Sathalaete eo e sebelisoa linaheng tse 35 tse ka boroa ho Sahara. Konteraka eo e pataloa chelete e fetang M184 564 ka khoeli. Ka linako tse ling, ho pataloa chelete e fetang eo ha ho hasoa mananeo a itseng. Ka lebaka leo, batho ba bangata ba ka natefeloa ke likopano kapa mananeo a khethehileng a hasoang ha ho etetsoe lekala.

 Batho ba bangata esita le bao eseng Lipaki, ba shebella thelevishene ba sebelisa sathalaete ea JW ba ntse ba le malapeng. Ho ba nolofalletsa ho shebella, Liholong Tsa ’Muso tse fetang 3 670 ho kentsoe thepa e khonang ho hokela sathalaeteng e le hore bara le barali ba bo rona ba ka khona ho shebella JW Broadcasting ba le liholong. Haeba Holong ea ’Muso ho se ho ntse ho e-na le thelevishene kapa projector, litšenyehelo tsa thepa eo ho akarelletsa le ho e tlisa moo li ka etsa chelete e ka bang M1 080. Empa haeba holo e se na lintho tseo, thepa eo kaofela e ka rekoa ka cheleteng e ka bang M8 185.

 Bara le barali ba bo rona ba leboha haholo ka khaso ena. Moholo e mong oa Cameroon o re: “Lelapeng la rona, khaso ena e tšoana le manna a neng a le lefelleng.” Mora oa bo rona Odebode oa Nigeria o re: “Re shebella lintho tse hlahang moo re le lelapa hararo ka beke. Bana baka ba lula ba tatetse ho tla shebella. Ebile ka linako tse ling ha re ntse re shebeletse mananeo a mang, ba kopa hore re chenche ebe re shebella lintho tse hlahang sathalaeteng ea JW.” Rose ea lulang Nigeria le eena o re: “Ke thabile haholo hobane hona tjena ha ke sa qeta nako e ngata ke shebeletse litaba, empa ke se ke e qeta ke shebeletse lintho tse hlahang sathalaeteng ea JW. Ha ke shebelletse litaba, ke ne ke utloa bohloko hoo high blood eaka e neng e phahama. Khaso ea JW eona ea nkhatholla ebile e mpha khotso. Ke e rata hona hoo. Ke tlhohonolofatso e tsoang ho Jehova.”

 Molebeli oa potoloho oa Mozambique o re potolohong eo a leng ho eona, Liholo Tsa ’Muso li kentsoe thepa e khonang ho hokela sathalaeteng. Bara le barali ba bo rona ba liphuthehong tseo ba fihla hora pele liboka li qala e le hore ba ka shebella khaso ea JW.

 Ka 2019, libakeng tse robong, ho ile ha sebelisoa sathalaete ho hasa lipuo tsa sehlooho tse ileng tsa fanoa ke setho sa Sehlopha se Busang kopanong ea machaba e neng e le Johannesburg, Afrika Boroa. Mora oa bo rona Sphumelele ea sebetsang lefapheng la Broadcasting lekaleng la Afrika Boroa o re: “Nakong e fetileng, lipuo tseo li ne li lokela ho hasoa ka Inthanete. Empa ho ne ho hlokahala hore ebe moo Inthaneteng e sebetsang hantle ’me joale e ne e le turu. Empa ho hasa re sebelisa sathalaete ea JW ha ho bitse hakaalo ebile e sebetsa hantle.”

 Re leboha menehelo e ntšoang bakeng sa ho tšehetsa mosebetsi o etsoang lefatšeng lohle hobane e thusa bara le barali ba bo rona ho shebella khaso ea JW ba sebelisa sathalaete. Re leboha menehelo eo le faneng ka eona le sebelisa mekhoa e fapaneng e hlahang ho donate.pr418.com.