LULANG LE LEBETSE!
Selemo sa 2022 se Neng se Tletse Mathata—Bibele e Re’ng ka Sona?
Selemong sa 2022 ho bile le litlaleho tsa litaba tse bongata bo thibang letsatsi tse buang ka lintoa, mathata a lichelete le likoluoa tsa tlhaho. Ke Bibele feela e hlalosang hore na liketsahalo tsena li bolela’ng.
Liketsahalo tsa selemo sa 2022 li bolela’ng?
Liketsahalo tsa selemo se fetileng ke bopaki bo eketsehileng ba hore re phela nakong eo Bibele e e bitsang ‘mehla ea bofelo.’ (2 Timothea 3:1) Mehla eo e qalile ka 1914. Hlokomela hore na liketsahalo tsa morao-rao li lumellana hakae le seo Bibele e se buileng ka mehla ea rona:
“Lintoa.”—Matheu 24:6.
“2022 e Bile Selemo Seo ka Sona Lintoa Tse Mahlo-mafubelu li Ileng Tsa Ipheta Europe.” a
Bala sehlooho se reng “Russia e Hlasela Ukraine.”
“Tlala.”—Matheu 24:7.
“Ka 2022 ho Bile le Tlala e E-s’o Bonoe.” b
Bala sehlooho se reng “Ntoa ea Ukraine e Etsa Hore Khaello ea Lijo e Mpefale Lefatšeng Lohle.”
“Mafu a seoa.”—Luka 21:11.
“Lefu la polio le ile la khutla hape, monkeypox le eona ea ata ka sekhahla ha ka nako e tšoanang COVID-19 e tsoela pele ho baka mathata a mangata. Maemo ana a bontša ka ho hlaka hore na mafu a tšoaetsanoang a kotsi hakae le hore na batho ba tlokotsing e kae.” c
Bala sehlooho se reng “Batho ba Limilione Tse Tšeletseng ba Bolailoe ke Seoa sa COVID-19.”
“Lintho tse tšosang.”—Luka 21:11.
“Ho bile le mocheso o feteletseng, komello, mello ea tlhaho le likhohola. Lehlabula la 2022 le tla lula le hopoloa ka lebaka la maemo a leholimo a neng a feto-fetoha ka tsela e feteletseng. Maemo ao a leholimo a ile a baka tšenyo e tšabehang, a etsa hore batho ba likete-kete ba shoe a ba a etsa hore batho ba limilione lefatšeng lohle ba tlohe mahaeng a bona.” d
Bala sehlooho se reng “Bibele e Re’ng ka Mocheso o Ntseng o Hloa Mekoalaba Lefatšeng Lohle?”
“Merusu [kapa “meferefere,” nal.].”—Luka 21:9.
“Ka 2022 matšolo a boipelaetso a ile a eketseha ka tsela e makatsang hobane batho ba ne ba tuka ke bohale ka lebaka la mathata a lichelete, haholo-holo bothata ba ho nyoloha ha theko ea lintho.” e
Bala sehlooho se reng “Bibele e Re’ng ka ho Phahama ha Theko ea Lintho Lefatšeng Lohle?”
Selemo sa 2023 se re tlela ka life?
Ha re tsebe hore na selemo sa 2023 se re tšoaretse’ng. Empa ntho eo re e tsebang ke hore haufinyane ’Muso oa Molimo o leholimong o tl’o fetola lefatše. (Daniele 2:44) ’Muso oo o tl’o felisa lintho tsohle tse bakelang batho mathata le ho etsa bonnete ba hore thato ea Molimo ea etsoa lefatšeng.—Matheu 6:9, 10.
Re u khothaletsa hore u mamele keletso ea Jesu ha a re re ‘lule re falimehile’ e le hore u bone hore na lintho tse etsahalang lefatšeng li phethahatsa boprofeta ba Bibele joang. (Mareka 13:37) Re kopa u bue le rona e le hore u ithute haholoanyane ka hore na Bibele e ka u thusa joang hona joale le hore na e ka thusa uena le lelapa la hao joang hore le be le tšepo ea hore le tla ba le bokamoso bo chabileng.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.
Mohlomong u ka Rata le
MOLULA-QHOOA
Haufinyane Molimo o Tla Felisa Mahlomola ’Ohle
Re tseba joang hore Molimo o tla felisa lintho tsohle tse re bakelang mahlomola?
ESSENTIAL BIBLE TEACHINGS
’Muso oa Molimo ke Eng?
Jesu o rutile ka ’Muso oa Molimo ho feta eng kapa eng. Haesale ka lilemo-lemo balateli ba hae ba rapella hore ’Muso oa Molimo o tle.
MABAPI LE RŌNA
Kōpa Thuto ea Bibele
U ka rutoa Bibele ka nako ea hao le sebakeng seo u se khethang ntle ho tefo.
