Bibele e Re’ng ka Batho ba sa Jeng Nama?
Ho na le batho ba bangata lefatšeng ba thahasellang taba ea ho phela ba sa je nama.
“Batho ba khethang ho phela ka tsela ena ba leka ka hohle hore ba se ke ba sebelisa liphoofolo bakeng sa lijo, liaparo kapa ntho leha e le efe.”—The Vegan Society.
Batho ba bang ba khetha ho se je nama hobane ba batla ho ntlafatsa tikoloho, boemo ba bona ba bophelo kapa hobane bolumeli ba bona bo sa ba lumelle hore ba e je.
“Batho ba bang ba lumela hore ho se je nama ke mokhoa o molemo oa ho phela, tsela ea bolumeli ebile ba lebeletse hore ho phela ka tsela ena ho ntlafatse lefatše.”—Britannica Academic.
Na ho se je nama ho ka ntlafatsa lefatše? Bibele e re’ng ka taba ee?
’Mopi o ikutloa joang ka liphoofolo le batho
Bibele ea bontša hore ’Mopi e leng Jehova Molimo a o nka batho ba phahametse liphoofolo ebile o itse ba li laole. (Genese 1:27, 28) Hamorao, Molimo o ile a lumella batho hore ba je liphoofolo. (Genese 9:3) Leha ho le joalo, ha a thabele ho bona batho ba li sotla.—Liproverbia 12:10.
Bibele ea bontša hore batho ba ka iketsetsa qeto ea hore na ba tla ja nama kapa che. b Molimo o re nka re le batho ba bohlokoa ho sa tsotellehe hore na re ja eng. (1 Bakorinthe 8:8) Ha rea lokela ho ahlola batho ba bang ka seo ba khethang ho se ja.—Baroma 14:3.
Ke eng e tla ntlafatsa lefatše?
Bibele e bontša hore maemo a lefatše lena a ke ke a ntlafatsoa ke tsela eo re phelang ka eona. Mathata a mangata a teng kajeno ke ao batho ba ke keng ba khona ho a lokisa, a bakoa ke lipolotiki, tsela eo batho ba etsang lintho ka eona le maemo a moruo. Bibele e re:
“Lintho tse sothehileng li ke ke tsa otlolloa.”—Moeklesia 1:15.
’Mopi o tla felisa mathata a rona. Bibele ha e hlalosa kamoo a tla a felisa kateng e sebelisa mokhabo-puo.
“Ka bona leholimo le lecha le lefatše le lecha. Leholimo la pele le lefatše la pele li ne li se li fetile ’me leoatle le ne le se le le sieo.”—Tšenolo 21:1.
’Muso oa Molimo e leng “leholimo le lecha” o tla felisa mebuso ea batho e leng “leholimo la pele.” ’Muso oa Molimo o tla felisa batho ba khopo e leng “lefatše la pele” ’me o buse “lefatše le lecha” e leng batho ba tla be ba mamela Molimo feela.
Ke ka tlas’a ’Muso oa Molimo feela moo batho ba tla phela ka khotso le liphoofolo ba be ba khone ho hlokomela tikoloho.—Esaia 11:6-9.
a Jehova ke lebitso la Molimo.—Pesaleme ea 83:18.
b Bibele e re laela hore re “qobe . . . mali.” (Liketso 15:28, 29) Sena se bolela hore re se ke ra noa mali, ra ja nama e sa ntšoang mali kapa hona ho ja lijo tse tšetsoeng mali.
Mohlomong u ka Rata le
MOLULA-QHOOA
Na Batho ba Tla Senya Lefatše ka ho Feletseng?
Bibele e ile ea bolela esale pele hore tikoloho e ne e tla senngoa le hore na seo se tla fella ka’ng.
ESSENTIAL BIBLE TEACHINGS
Ke Hobane’ng ha Molimo a Bopile Lefatše?
Lefatše le na le lintho tse ngata tse ntle. Le sebakeng se lekaneng pakeng tsa lona le letsatsi, le sekame ka tsela e nepahetseng, le potoloha ka lebelo le loketseng. Ke hobane’ng ha Molimo a ile a bopa lefatše ka tsela e hlollang tjee?
