Seo Bibele E Se Rutang Mangeloi
Mangeloi
Ho tloha nakong e fetileng, mangeloi a ’nile a hlaha libukeng, litšoantšong le lifiliming. Empa, ha ele hantle mangeloi ke bo-mang, hona mosebetsi oa ona ke ofe?
Mangeloi ke bo-mang?
SEO BIBELE E SE RUTANG
Pele Molimo ea Matla ’ohle a bopa lintho tsohle, o ile a bopa li bopuoa tse bohlale, e leng mangeloi. Ha e le hantle, a matla ho feta batho ’me a lula le Molimo leholimong. (Jobo 38:4, 7) Bibele e li bitsa “meea” kapa “mangeloi” .—Pesaleme ea 104:4. *
Mangeloi a makae ka palo? Lentsoe la Molimo le hlalosa hore mangeloi a potolohileng terone ea Molimo ke “limiriade tsa limiriade” kapa “likete tsa likete.” (Tšenolo 5:11) Haeba re nka tlhaloso ena ka tsela eo eleng ka teng, palo ea mangeloi ke limilione tse makholo.
“Ka talima. . . mangeloi a mangata ho pota terone . . . ,’me palo ea ona e ne e le limiriade tsa limiriade le likete tsa likete..”—Tšenolo 5:11.
Mosebetsi oa mangeloi e ne e le ofe nakong e fetileng?
SEO BIBELE E SE RUTANG
Nakong e fetileng, Molimo o ne a sebelisa mangeloi ho fetisetsa molaetsa ho batho. * Bibele e boetse e re bolella hore Jehova o ne a a sebelisetsa ho etsa mehlolo. Ka mohlala, Jehova o ile a sebelisa lengeloi ho thiba Abrahama hore a se ke a etsa sehlabelo ka mora oa hae, Isaka. (Genese 22:11-18) Ka letsatsi le leng, ha Moshe a le thabeng ea Horebe lengeloi le ile hlaha ka pel’a hae le tlisitse molaetsa o neng o tsoa ho Jehova. (Exoda 3:1, 2) Ho feta moo, ha moprofeta Daniele a ne a lahletsoe ka sekoting sa litau, Jehova o ile a sebelisa lengeloi ho “koala melomo ea litau,” e le hore a ka sireletsa mohlanka oa hae.—Daniele 6:22.
“Joale lengeloi la Jehova la hlaha ho eena le le lelakabeng la mollo har’a sehlahla se meutloa—Exoda 3:2
Mosebetsi oa mangeloi ke ofe hona joale?
SEO BIBELE E SE RUTANG
Re ke ke ra tseba ka ho feletseng seo mangeloi a se etsang mehleng ena.Leha ho le joalo, Bibele e re bontša hore a kenya letsoho ho thusa batho ba lipelo li lokileng hore ba tsebe Jehova.—Liketso 8:26-35; 10:1-22; Tšenolo 14:6, 7.
Jakobo o ile a lora mangeloi a ntse a ea holimo le tlase a palame “lere” pakeng tsa leholimo le lefatše. (Genese 28:10-12) Ka ha toro ena e ne etsoa ho Jehova, ho ka etsahala hore ebe Jakobo o ile a nahana hore toro ena, e ne e bontša tsela eo Jehova a romelang mangeloi a hae lefatšeng e le hore a tl’o thusa bahlanka ba hae.—Genese 24:40; Exoda 14:19; Pesaleme ea 34:7.
“Ho ne ho ena le lere e emeng lefatšeng tlhoro ea eona e fihla maholimong; ‘me, bonang! ho ne ho ena le mangeloi a Molimo a ntseng a nyoloha ‘me a theoha ka eona.”—Genese 28:12.
^ ser. 6 Bibele e hlalosa hore mangeloi a mang a ileng a fetohela bobusi ba Molimo, a bitsoa “bademona.”—Luka 10:17-20.
^ ser. 11 Ha e le hantle lentsoe la Seheberu le la Segerike, “lengeloi” le hlalosoa e le morumuoa.
