Bacha Baa Botsa . . .

Ke Hobane’ng ha ke Lokela ho Phela ka Melao-motheo ea Bibele?

U KA phaposing ea ho jela le banana ba bang ba babeli ’me le ja lijo tsa motšehare sekolong. E mong oa banana bana o shebile moshanyana e mocha.

Ngoanana oa pele o re ho uena: “Ua tseba ke’ng, moshanyana eo oa u rata! Ke bona ka tsela eo a u shebang ka eona. O lula a ichebetse uena feela!”

Ngoanana oa bobeli oa u sebela, o re: “Le hona ua tseba ke’ng? O itja feela!”

Ngoanana oa pele o re: “Ke bomalimabe hore ebe ke na le mohlankana. Ke ne ke sa tl’o senya nako ho inkela eena!”

Joale ngoanana oa pele o bua ntho eo kamehla u sa rateng ho e utloa.

“Hantle-ntle, ho tla joang hore ebe ha u na mohlankana?”

U ne u se u ntse u lebeletse potso eo. Taba ke hore u ka rata ho ba le mohlankana. Empa u boleletsoe hore ho molemo hore u eme ho fihlela ha u le boemong ba ho kena lenyalong pele u ka qala ho intša le mohlankana. Hoja feela e ne e se . . .

Ngoanana oa bobeli o re: “E tlameha e le bolumeli bo mona ba hao, akere?”

Ua ipotsa: ‘O tsebile joang se ka kelellong ea ka?’

Ngoanana oa pele oa u tloka: “Sa hao ke Bibele, Bibele, Bibele, mehla ena. Ke hobane’ng ha ho se na mohla u keng u ithabise ho se hokae?”

Na u se u kile ua iphumana u le boemong bo tšoanang le boo—u songoa hobane u leka ho phela tumellanong le melao-motheo ea Bibele? U ile ua itšoara joang?

◼ Ka sebete u ile ua emela tumelo ea hao tabeng ea boitšoaro

◼ U ile ua soaba-soaba empa ua etsa sohle se matleng a hao ho hlalosa seo u se lumelang

◼ U ile ua etsa qeto ea hore metsoalle ea hao ea sekolong e nepile—u ne u fetoa ke menate!

Na u se u kile ua ipotsa: ‘Na ho na le melemo ho phela ka melao-motheo ea Bibele ea boitšoaro?’ Mocha e mong ea bitsoang Deborah o ile a nahana ka sena. O re: “Lithaka tsa ka li ne li etsa seo li se ratang. Ho ne ho bonahala eka ha ho motho eo ba tlamehang ho ’na ba mo tlalehela. Melao ea boitšoaro ea Bibele e ne e bonahala e le thata. Ke ne ke khahloa ke tsela e neng e bonahala e se na lithibelo eo metsoalle ea ka ea sekolong e neng e phela ka eona.” *

Na ho ba le Khoao ke Phoso?

Ho bile le nako eo mongoli oa Bibele, Asafe, a ileng a ba le khoao bophelong hore na ebe ho na le molemo ho phela ka tsela e thabisang Molimo na.  O ngotse: “Ke ile ka honohela baithorisi, ha ke ne ke bona khotso ea batho ba khopo.” O ile a ba a re: “Ka sebele ke ha lefeela hore ebe ke hloekisitse pelo ea ka le hore ebe ke hlatsoa matsoho a ka ka ho hloka molato.”—Pesaleme ea 73:3, 13.

Ho hlakile hore Jehova Molimo oa utloisisa hore ka linako tse ling batho ba ka ’na ba ipotsa hore na ebe ho na le molemo ho phela tumellanong le melao-motheo ea hae ea boitšoaro na. Etsoe o entse hore maikutlo a Asafe a tlalehoe ka Bibeleng. Qetellong, Asafe o ile a etsa qeto ea hore ho phela ka melao ea Molimo e ne e le ntho e molemo ka ho fetisisa bophelong. (Pesaleme ea 73:28) O ile a fihlela qeto eo joang? Asafe o ne a le bohlale. O ile a etsa qeto eo ka ho ithuta liphosong tsa ba bang, ha aa ka a e etsa hobane a utloile ka letlalo. (Pesaleme ea 73:16-19) Na u khona ho etsa se tšoanang?

Sekaseka Taba

Ho fapana le Asafe, Morena Davida o ile a ithuta habohloko hore ba sa mameleng melao ea Molimo ea boitšoaro ba kena mathateng. Davida o ile a etsa bofebe le mosali oa e mong oa bahlanka ba hae ’me a leka ho pata liketso tsa hae. Ka lebaka leo, o ile a utloisa ba bang bohloko, ho akarelletsa le Molimo, ’me o ile a ba le matšoenyeho a tebileng. (2 Samuele 11:1–12:23) Ka mor’a hore Davida a bake, Jehova o ile a mo susumelletsa hore a ngole maikutlo a hae pineng ’me Jehova a etsa hore mantsoe ao a bolokoe Bibeleng molemong oa rōna. (Pesaleme ea 51:1-19; Baroma 15:4) Ka hona, ke ntho e bohlale le e tumellanong le Mangolo hore re ithute ka liphoso tsa ba bang.

E le ho u thusa hore u etsise mohlala oa Asafe le hore u qobe phoso e tšoanang le ea Davida, hlahloba se builoeng ke bacha ba bang ba tsoang linaheng tse fapaneng bao ka nako e itseng ba kileng ba kheloha melao-motheo ea Bibele. Ha e le hantle, ba ile ba kopanela liphate pele ba kena lenyalong. Joaloka Davida, ba baketse libe tsa bona ’me ba boetse ba hloekile mahlong a Molimo. (Esaia 1:18; 55:7) Nahana ka seo ba se buang.

Tsoha!: Ke eng e ileng ea susumetsa monahano oa hao le boitšoaro ba hao?

Deborah: “Ha ke le sekolong ke ne ke bona ngoana e mong le e mong a e-na le mohlankana kapa kharebe, ’me ba ne ba bonahala ba thabile. Ha ke qeta nako le bona ’me ke bona ba sunana le ho hakana, ke ne ke ba honohela ’me ke ikutloa ke le bolutu. Ke ne ke atisa ho qeta lihora tse ngata ke lohotha ka moshanyana e mong eo ke neng ke mo rata. Sena se ile sa totisa takatso ea ka ea hore ke be le moshanyana eo le ho etsa ntho leha e le efe hore feela ke be le eena.”

Mike: “Ke ne ke bala boitsebiso bo tlotlisang ho kopanela liphate ke bile ke shebella mananeo a joalo. Ha ke ntse ke bua le metsoalle ka taba ena ea ho kopanela liphate, seo se ile sa etsa hore ke batle ho tseba ho eketsehileng le ho feta ka eona. Joale ha ke le mong le ngoanana, ke ne ke nahana hore nka mo atamela haholo ntle le hore re kopanele liphate, ke ne ke nahana hore nka khaotsa neng kapa neng ha ke batla.”

Andrew: “Ke ne ke tloaetse ho shebella litšoantšo tse manyala tse hlephisang boitšoaro Inthaneteng. Ke ile ka qala ho noa joala haholo. Hape ke ne ke ea liphathing le bacha ba neng ba sa hlomphe melao ea Bibele ea boitšoaro.”

Tracy: “Ha ke le lilemo li 16, ntho eo ke neng ke e nka e le ea bohlokoa feela e ne e le ho qeta nako le mohlankana oa ka. Ke ne ke tseba hore ho kopanela liphate pele ho lenyalo ho fosahetse, empa ke ne ke sa ho hloea. Ke ne ke sa rera ho kopanela liphate pele ke nyaloa, empa ke ile ka nkoa ke maikutlo ’me ka khaotsa ho nahana. Letsoalo la ka le ile la cha ka nakoana.”

Tsoha!: Na tsela eo u neng u phela ka eona e ne e u thabisa?

Deborah: “Qalong ke ile ka apareloa ke thabo ea hore ke lokolohile ’me ke ne ke thabile hore ebe qetellong ke tšoana le lithaka tsa ka. Empa boikutlo boo ha boa ka ba nka nako e telele. Ke ile ka qala ho ikutloa ke le litšila, ke sa hloeka, ’me ke se na thuso. Ke ile ka ikoahlaea haholo hore ebe ke lahlile boroetsana ba ka, e leng ntho eo nke keng ka hlola ke e khutlisa. Ho tloha ka nako eo, ke lula ke ipotsa, ‘E le hore ke ne ke nahana hore ke tla ba mokhelo?’ Hona ‘Ke hobane’ng ha ke ile ka hlokomoloha melao e lerato ea Jehova?’”

 Mike: “Ke ile ka qala ho utloa eka karolo e ’ngoe ea ka e shoele. Ke ile ka leka ho hlokomoloha tsela eo liketso tsa ka li neng li tla ama ba bang kateng, empa ke ne ke sitoa. Ke ile ka utloa bohloko ha ke lemoha hore ka ho lelekisa monyaka, ke ne ke utloisa ba bang bohloko. Ke ile ka hlobaela. Qetellong, monyaka oa boitšoaro bo bobe ba ho kopanela liphate o ile oa tapa ’me ka apareloa ke bohloko le ho hlajoa ke lihlong.”

Andrew: “Ho ile ha ’na ha e-ba bonolo le ho feta ho etsa lintho tse ling tse fosahetseng. Empa ka nako e tšoanang, ke ne ke jeoa ke maikutlo a ho ba molato le ho itsoafa.”

Tracy: “Ha hoa ka ha nkuka nako hore ’nete e nchabele habohloko. Boitšoaro bo bobe bo sentse bocha ba ka. Ke ne ke nahana hore ’na le mohlankana oa ka re tla thabela bophelo. Ha rea ka ra bo thabela. Re ile ra qetella re utloisana bohloko, re bakelana mahlomola le masisa-pelo. Ke qetile masiu a mangata ke lla, ke lakatsa eka nka be ke ile ka etsa lintho ka tsela ea Jehova.”

Tsoha!: Ke keletso efe eo u ka e fang bacha ba nahanang hore melao ea Bibele ea boitšoaro e amoha motho bolokolohi?

Deborah: “Bophelo ba hao bo ke ke ba ntlafala ha u furalla melao ea Bibele. Nahana hore na Jehova o tla ikutloa joang haeba u mamela keletso ea hae. Hape nahanisisa ka litholoana tse tlisoang ke ho se mamele keletso ea hae. Hopola hore hase feela taba ea hao le seo u se batlang. Liketso tsa hao li tla ama ba bang. Haeba u hlokomoloha keletso ea Molimo, u tla itematsa.”

Mike: “Ke ’nete hore tsela eo lithaka tsa hao li phelang ka eona e ka ’na ea bonahala e khahlisa ha u e habanya feela. Empa shebisisa boemo pele u nka khato. Har’a lintho tsa bohlokoahali tseo Jehova a u fileng tsona ke seriti le boikutlo ba ho ba le letsoalo le hloekileng. Ho lahla limpho tseo hobane feela u sitoa ho ithiba ke ho itheola seriti. Buisana le batsoali ba hao le batho ba bang ba hōlileng ka mathata a hao. Haeba u entse phoso, bua ka bothata boo ka potlako ’me u lokise boemo. Haeba u etsa lintho ka tsela ea Jehova, u tla ba le khotso ea sebele.”

Andrew: “Ha u se na phihlelo, u nahana hore tsela eo lithaka tsa hao li phelang ka eona e monate. Maikutlo a bona a tla u tšoaetsa. Ka hona, khetha metsoalle ea hao ka bohlale. Tšepa Jehova ’me u ke ke ua ikoahlaea.”

Tracy: “U se ke ua ipolella hore, ‘Sena se ke ke sa ntlhahela.’ ’Mè o ile a ntulisa fatše ’me a mpolella ka ho toba hore tsela eo ke e latelang e tla nkutloisa bohloko. Ke ile ka hlabeha haholo! Ke ne ke nahana hore ke tseba seo ke se etsang. Ke ne ke sa tsebe letho. Phela ka melao ea Jehova ’me u tloaelane le batho ba phelang ka eona. U tla thaba haholo ha u ka etsa joalo.”

Melao-motheo ea Bibele—Na e ea U Khina Kapa e ea U Sireletsa?

Haeba lithaka tsa hao li u soma hobane u leka ho phela ka melao-metheo ea Bibele, ipotse: ‘Ke hobane’ng ha ba sa batle khopolo ea ho phela ka melao ea Bibele ea boitšoaro? Na ba se ba kile ba bala Bibele le ho hlahloba melemo e tlisoang ke ho mamela melao ea Molimo? Na ba se ba kile ba hlahloba ka botebo liphello tse tlisoang ke ho hlokomoloha melao eo? Kapa ho e-na le hoo, ba mpa ba latela seo e mong le e mong a se etsang?’

E ka ’na eaba u tseba batho ba phelelang ho “latela bongata.” (Exoda 23:2) Na ha u batle ho etsa se molemo ho feta seo? U ka etsa joalo joang? Ka ho mamela keletso ea Bibele ea hore u ‘ipakele e le uena thato ea Molimo e molemo le e amohelehang le e phethahetseng.’ (Baroma 12:2) Jehova ke “Molimo ea thabileng,” ’me o batla hore le uena u thabe. (1 Timothea 1:11; Moeklesia 11:9) Melao e tlalehiloeng ka Bibeleng e molemong oa hao. Ke ’nete hore u ka ’na ua nka hore e ea u khina. Empa bonneteng, melao ea Bibele ea boitšoaro e tšoana le lebanta la pholoso le sireletsang mopalami hore a se ke a tsoa kotsi.

Ka sebele u ka tšepa Bibele. Haeba u khetha ho phela ka melao ea eona, u ke ke ua thabisa Jehova feela empa le uena u tla rua molemo.—Esaia 48:17.

Lihlooho tse ling tsa “Bacha Baa Botsa . . . ” li ka fumanoa mocheng oa boitsebiso oa Inthanete ho www.watchtower.org/ype

[Mongolo o botlaaseng ba leqephe]

SEO U KA NAHANANG KA SONA

◼ Ke eng e ka ’nang ea u thatafalletsa ho phela ka melao-motheo ea Bibele?

◼ Ke hobane’ng ha u lokela ho ipakela e le uena hore ho phela ka melao-motheo ea Molimo ke tsela e molemo ka ho fetisisa bophelong?