PONO EA BIBELE
Lefu
Bafu ba hokae?
“U lerōle ’me u tla khutlela lerōleng.”—Genese 3:19.
SEO BA BANG BA SE BUANG
Batho ba bang ba nahana hore ho na le bophelo ka mor’a lefu, e leng ba leholimo, lihele, pelekatori kapa balimo. Ba bang ba lumela ho tsoaloeng hape e se e le libōpuoa tse fapaneng. Ka lehlakoreng le leng, ba sa lumeleng Bibeleng bona ba nahana hore ha motho a e-shoa ho felile ka eena.
SEO BIBELE E SE BUANG
Moeklesia 9:10 e re “ha ho mosebetsi kapa morero kapa tsebo kapa bohlale [Lebitleng], e leng sebaka seo u eang ho sona.” Bibele e boetse e hlalosa se etsahalang ha motho a e-shoa leha phoofolo e e-shoa. E re: “Bohle ba ea sebakeng se le seng. Bohle ba bile teng ba tsoa lerōleng, ’me bohle ba khutlela lerōleng.”—Moeklesia 3:20.
Boemo ba bafu ke bofe?
“Moea oa hae oa tsoa, eena o khutlela lerōleng la hae; ka letsatsi leo menahano ea hae ea timela.”—Pesaleme ea 146:4.
SEO BA BANG BA SE BUANG
Ba bang ba rutiloe hore se etsahallang motho ka mor’a lefu se itšetlehile ka lintho tseo a neng a li etsa ha a ne a sa phela lefatšeng. Haeba o ne a etsa lintho tse molemo, moputso oa hae e tla ba thabo e fetisisang; haeba o ne a etsa tse mpe, qetello ea hae e tla ba tlhokofatso ea ka ho sa feleng. Ho boleloa hore batho ba lokela ho hloekisoa libe, pele ba ka lumelloa ho kena leholimong ka mor’a lefu. Bao ba sa hloekisoang, hothoe ba ke ke ba fumana thabo ea ka ho sa feleng.
SEO BIBELE E SE BUANG
Bafu ha ba thabe kapa ho utloa bohloko. Ka sebele, kaha ha ba utloe letho, ha ba tsebe letho ho hang; ba ke ke ba khona ho thusa ba phelang kapa ho ba utloisa bohloko. Ho ea ka Moeklesia 9:5, 6: “ba phelang baa tseba hore ba tla shoa; empa ha e le ba shoeleng, ho hang ha ba tsebe letho, . . . Hape, lerato la bona le lehloeo la bona le poulelo ea bona li se li timetse, ’me ha ba sa hlola ba e-ba le kabelo nthong leha e le efe e lokelang ho etsoa tlas’a letsatsi ho isa nakong e sa lekanyetsoang.”
Na ho na le tšepo leha e le efe ka bafu?
“Haeba monna ea shahlileng a shoa na a ka phela hape? Ke tla leta ka matsatsi ’ohle a mosebetsi oa ka o qobelloang, ho fihlela phomolo ea ka e fihla.”—Jobo 14:14.
SEO BA BANG BA SE BUANG
Batho ba bangata ba lumela hore hang ha motho a ea liheleng, ha ho sa na tšepo bakeng sa hae. Ba re litlhokofatso tsa liheleng ke tsa ka ho sa feleng. Ka lehlakoreng le leng, ba leng pelekatoring ba thabela ho phela leholimong hang ka mor’a hore libe tsa bona li chesoe mollong.
SEO BIBELE E SE BUANG
Ka mor’a ho robala lefung, ba seng ba shoele hona joale ba tla tsosoa kapa ba tla khutlisetsoa bophelong, lefatšeng ke Mor’a Molimo. Bibele e re: “Le se ke la hlolloa ke sena, hobane hora ea tla eo ka eona bohle ba mabitleng a khopotso ba tla utloa lentsoe la hae ’me ba tsoe.” (Johanne 5:26, 28, 29) Boitšoaro ba motho ka mor’a moo ke bona bo tla paka hore na o fumana bophelo ba sa feleng kapa che. *
^ ser. 14 Ho fumana lintlha tse eketsehileng mabapi le tsoho ea bafu, sheba khaolo ea 7 bukeng ea Ha e le Hantle ke Eng Seo Bibele e se Rutang? e hatisitsoeng ke Lipaki Tsa Jehova
Mohlomong u ka Rata le
LIPOTSO TSA BIBELE LIA ARAJOA
Lihele ke Eng? Na ke Sebaka Seo ho Hlokofatsoang Batho ka ho sa Feleng ho Sona?
Na batho ba khopo ba hlokofatsoa mollong oa lihele? Na ke kotlo ea sebe? Bala likarabo tse tsoang ka Bibeleng tsa lipotso tsena.
