Ho ea ka lipalo-palo tsa Lekala la Temo tsa 2012, baahi ba United States ba etsang liphesente tse 14,5—e leng kakaretso ea batho ba limilione tse 49—“ba ne ba sa kholiseha hore na ba tla fumana lijo tse lekaneng bakeng sa ba malapa a bona kapa ba ne ba sa khone ho li fumana” ka nako e itseng har’a selemo seo.

Phuputsong e ’ngoe ea liithuti tsa univesithi ho fumanoe hore basali ba etsang liphesente tse 56 le banna ba etsang liphesente tse 41 baa lumela hore ba itlopa joala, e leng hore ho latela phuputso eo, bonyane monna a le mong o noa libotlolo tse robeli tsa joala kapa mosali a le mong o noa libotlolo tse tšeletseng ’mokeng o le mong.

Bo-rasaense ba ileng ba nka lisampole tsa khohlo ea Mariana e botebo ba limithara tse 11 000, ba ile ba fumana hore baktheria le likokoana-hloko li lula moo—ho sa tsotellehe lefifi, khatello e boima le lithempereichara tse batang haholo. Nakong e fetileng, ho ne ho nahanoa hore ho ke ke ha khoneha hore ho be le lintho tse phelang sebakeng se tebileng hakaalo.

Morao tjena ba boholong Dubai ba ile ba tšepisa ho fa baahi grama e le ’ngoe ea khauta eo ka nako eo e neng e ka ba liranta tse 390 bakeng sa k’hilograma e le ’ngoe ea boima ba ’mele eo ba e fokotsang, e le ka morero oa ho fokotsa palo ea batho ba batenya naheng eo. Ho fumana khauta eo, batho ba ne ba lokela ho ingolisa ’me ba fokotse bonyane lik’hilograma tse peli khoeling ea Ramadan.