PONO EA BIBELE
Bohloeki
Na Molimo oa tsotella hore na re hloekile ’meleng kapa che?
“A re itlhatsoeng litšila tsohle tsa nama le tsa moea.”—2 Bakorinthe 7:1.
SEO BIBELE E SE BUANG
’Mōpi oa rōna oa re rata ’me o batla hore re phele nako e telele. Molimo o re: “E se eka pelo ea hao e ka boloka litaelo tsa ka, hobane u tla ekelletsoa bolelele ba matsatsi le lilemo tsa bophelo le khotso.” (Liproverbia 3:1, 2) Molimo o ile a bontša hore o rata batho ha a ne a fa Baiseraele melao, e neng e akarelletsa litaelo tse tobileng tse mabapi le bohloeki le mokhoa oa ho tsamaisa likhoerekhoere. (Deuteronoma 23:12-14) Ha Baiseraele ba ne ba mamela melao eo, ba ne ba phela hantle ’meleng ’me ba ne ba sireletseha khahlanong le maloetse a neng a le teng lichabeng tse ling, tse kang tsa Baegepeta, tse neng li se na molao oo.—Deuteronoma 7:12, 15.
Ka ho tšoanang le kajeno batho ba ‘itlhatsoang litšila tsohle tsa nama,’ tse akarelletsang ho tsuba, ho noa joala ho tlōla le ho sebelisa lithethefatsi, ba fokotsa menyetla ea ho tšoaroa ke mafu a itseng—ebang ke ’meleng kapa kelellong—hammoho le ho khaoletsoa ke lefu. Hape, kaha re phela le batho ba bang, ha re mamela melao ea Molimo e mabapi le bohloeki re bontša hore rea ba nahanela.—Mareka 12:30, 31.
Na Molimo oa tsotella hore na re hloekile boitšoarong le moeeng?
“Le bolaee litho tsa ’mele ea lōna tse . . mabapi le bohlola, ho se hloeke, takatso ea botona kapa ea botšehali, takatso e kotsi, le ho chacheha ka mohono, e leng borapeli ba litšoantšo. Ka lebaka la lintho tseo khalefo ea Molimo ea tla.”—Bakolose 3:5, 6.
SEO BIBELE E SE BUANG
Joalokaha ho bontšitsoe pejana, Bibele e re eletsa hore re ‘itlhatsoe litšila tsohle tsa nama le tsa moea.’ Ha Jesu Kreste a ntse a le lefatšeng, batho ba bangata ho akarelletsa le baeta-pele ba bolumeli ba Bajuda, ba ne ba leka kahohle hore ba hloeke ’meleng empa ba ne ba sa natse melao ea Molimo. (Mareka 7:1-5) E le ho ba thusa hore ba utloisise taba ena ka tsela e nepahetseng, Jesu o ile a re: “Ha ho letho le tsoang ka ntle le fetelang ka ho motho le ka mo silafatsang, kaha . . . le fetela ka maleng a hae, ’me le fetela ka ntle ka sekoting se koahetsoeng sa likhoere-khoere.” Eaba o phaella ka ho re: “Se tsoang ka ho motho ke sona se silafatsang motho; etsoe ka hare, ka lipelong tsa batho, ho hlaha menahano e kotsi: bohlola, bosholu, lipolao, bofebe, ho chacheha ka mohono, liketso tsa bokhopo, thetso, boitšoaro bo hlephileng, leihlo le mohono, . . . ho se be le kahlolo e molemo. Lintho tsena tse khopo kaofela . . . li silafatsa motho.”—Mareka 7:18-23.
Ho latela seo Jesu a se buileng, ha batho ba ameha ka ho feteletseng ka ho hloeka ’meleng empa ba hlokomoloha melao ea Molimo, ba tšoana le sejana se hloekileng ka ntle empa se le litšila ka hare.—Matheu 23:25, 26.
Na melao ea Bibele e boima?
“Se boleloang ke lerato la Molimo ke sena, hore re boloke litaelo tsa hae; leha ho le joalo litaelo tsa hae ha li boima.”—1 Johanne 5:3.
SEO BIBELE E SE BUANG
Mikea 6:8 e re: “Jehova o batla eng ho uena haese hore u sebelise toka u rate mosa ’me u inyenyefatse ha u tsamaea le Molimo oa hao?” Ka sebele, seo Molimo a se batlang ho rōna hase boima. Ho feta moo, ’Mōpi oa rōna o batla hore re mo mamele hobane re mo rata. Re tla thaba haholo ha re etsa joalo. (Pesaleme ea 40:8) Hape, haeba re etsa liphoso, re ka tšelisoa ke ho tseba hore Molimo o mohau. Bibele e re: “Joalokaha ntate a bontša mohau ho bara ba hae, Jehova o bontšitse mohau ho ba mo tšabang. Etsoe o tseba sebōpeho sa rōna hantle, Oa hopola hore re lerōle,” kapa rea fokola ebile ha rea phethahala.—Pesaleme ea 103:13, 14.
Ka bokhutšoanyane, melao ea Molimo e mabapi le ho hloeka ’meleng, boitšoarong le moeeng e bontša hore o molemo ebile oa re rata. Ha re ikemisetsa ho mamela melao ea Molimo, re bontša hore re bohlale ebile rea mo rata.
Mohlomong u ka Rata le
MOLULA-QHOOA
Molimo o Ikutloa Joang ka ho Tsuba Koae?
Ha ho moo Bibele e buang ka koae, joale re ka tseba joang?
MOLULA-QHOOA
Bibele e Fetola Batho—October 2012
Ho tlile joang hore batho ba babeli ba khaotse mekhoa e mebe, e kopanyelletsang bokhoba ba tahi le lithethefatsi ’me ba fetohe batho ba thabileng e le kannete?
