“Ha re ne re e-na le mathata, mosali oa ka o ile a bolella batsoali ba hae. Ka mo’ra moo, ntate oa hae o ile a ntetsetsa hore a mphe keletso ka bothata boo. Seo ha sea ka sa nthabisa!”—James. *

“Matsale oa ka o atisa ho re, ‘Ka tla ka hopola ngoan’a ka!’ O rata ho mpolella kamoo ba neng ba utloana kateng ’me seo se etsa hore ke ikutloe ke le molato ka hore ebe ke mo utloisitse bohloko ka ho nyalana le mor’a hae!”—Natasha.

Na hoa khoneha hore le qobe ho etsa hore ho se utloane le batsoali ba balekane ba lōna ho senye khotso ea lelapa la lōna?

Ha le nyalana le theha lelapa le lecha. Bibele e re ha monna a nyala “o tla siea ntat’ae le ’m’ae ’me o tla khomarela mosali oa hae.” Molao ona o sebetsa le ho mosali tabeng ea batsoali ba hae le monna oa hae. Bibele e re ha a nyaloa, eena le monna oa hae e ba “nama e le ’ngoe.” Ke lelapa le lecha.—Matheu 19:5.

Lenyalo la hao le lokela ho tla pele ho batsoali ba hao. Moeletsi e mong ea bitsoang John M. Gottman, o re: “E ’ngoe ea lintho tsa bohlokoa tseo banyalani ba lokelang ho ithuta tsona ke ho nahanelana nthong e ’ngoe le e ’ngoe eo ba e etsang. Ho etsa joalo ho akarelletsa ho arohana le batsoali ba bona le banab’abo bona.” *

Batsoali ba bang ba ka ’na ba thatafalloa ho amohela liphetoho. Monna e mong e mocha o re: “Pele ’na le mosali oa ka re nyalana, o ne a rata ho etsa sohle seo batsoali ba hae ba se batlang. Ha re se re nyalane, ’mè oa hae o ile a hlokomela hore ha a sa tla pele ho morali oa hae ’me o ile a thatafalloa ho amohela phetoho eo.”

Banyalani ba bacha le bona ba ka ’na ba thatafalloa ho etsa seo. James ea qotsitsoeng pejana o re: “Batsoali ba molekane oa hao ha ba tšoane le metsoalle eo u ikhethelang eona. Ho joalokaha eka motho o itse ho uena, ‘U na le metsoalle e ’meli e mecha, u rata kapa u sa rate.’ Le haeba ba ka u halefisa, le lelapa!”

Ha uena le molekane oa hao le sa utloane tabeng ea batsoali ba lōna, rarollang bothata boo le khobile matšoafo. Sebelisang keletso ea Bibele e reng “batlang ho fumana khotso, ’me le e phehelle.”—Pesaleme ea 34:14.

E le ho u thusa ho etsa joalo, ela hloko maemo a latelang. Boemong bo bong ho buuoa ka monna ho bo bong ka mosali. Leha ho le joalo, mathata a boletsoeng a ka ba ama ka bobeli ’me melao-motheo e tšohloang mona e ka u thusa ho rarolla mathata a ’maloa a amanang le batsoali ba molekane oa hao.

Ha mosali oa hao a re o lakatsa eka u ka be u utloana le ’mè oa hae. Empa uena u utloa ho le thata ho etsa joalo.

Leka sena: Buisana le mosali oa hao ka bothata bona ’me u mo bontše hore u ikemisetse ho mo nahanela. Taba hase hore na u ikutloa joang ka ’mè oa oa hae, empa ke hore na u ikutloa joang ka mosali oa hao—eo u ileng ua etsa kano ea hore u tla mo rata. Ha le ntse le buisana, nahana ka ntho e le ’ngoe kapa tse peli tseo u ka li etsang e le hore u ntlafatse kamano ea hao le mohoehali oa hao. Ha mosali oa hao a lemoha boiteko boo u bo etsang, ha ho pelaelo hore o tla u hlompha le ho feta.—Molao-motheo oa Bibele: 1 Bakorinthe 10:24.

Ha monna oa hao a re u amehile ka ho thabisa batsoali ba hao ho e-na le eena.

Leka sena: Buisana le monna oa hao ka taba ena ’me u leke ho ikenya lieteng tsa hae. Ke ’nete hore monna oa hao ha a lokela ho tletleba ha u etsa ntho e bontšang hore u hlompha batsoali ba hao. (Liproverbia 23:22) Leha ho le joalo, a ka ’na a hloka hore u mo kholise ka mantsoe le ka liketso hore o tla pele ho batsoali ba hao. Ha u etsa joalo, monna oa hao a ke ke a ikutloa eka u tlhōlisanong le batsoali ba hao hore u mo fe tlhokomelo.—Molao-motheo oa Bibele: Baefese 5:33.

Ha mosali oa hao a il’o kōpa keletso ho batsoali ba hae ho e-na le ho tla ho uena.

Leka sena: Buisana le mosali oa hao ’me le leke ho lumellana ka meeli eo le lokelang ho e beha. Bontša ho nahanela. Na kamehla ho fosahetse ho bolella motsoali ka bothata bo itseng? Ke neng ho loketseng ho etsa joalo? Haeba le lumellana ka meeli eo le tla e beha, le ke ke la ba le mathata.—Molao-motheo oa Bibele: Bafilipi 4:5.