SEO BATHO BA SE BUANG

Batho ba bang ba lumela hore batho ba ka sebelisa liphoofolo ka tsela leha e le efe eo ba e batlang. Athe ba bang bona ba re liphoofolo li lokela ho tšoaroa ka tsela e tšoanang le eo batho ba tšoaroang ka eona.

• Motho e mong ea hlaheletseng ea loanelang litokelo tsa liphoofolo o ile a re liphoofolo li lokela “ho ba le tokelo ea motheo ea hore li se ke tsa sebelisoa e le thepa feela tjee kapa lintho tsa ho ithuisa.” O eketsa ka ho re: “Re lokela ho khaotsa ho tšoara liphoofolo joaloka thepa ea rōna.”

• Athe boemong bo bong boo batho ba bangata ba ka bo talimang e le bo feteletseng, moruihali e mong ea bitsoang Leona Helmsley o ile a siela ntja ea hae lefa le etsang R129 600 000 ’me a bolela hore ha ntja eo e shoa, e patoe pel’a hae.

Seo u ka nahanang ka sona: U nahana hore liphoofolo li lokela ho tšoaroa joang?

SEO BIBELE E SE BUANG

’Mōpi oa lintho tse phelang, e leng Jehova Molimo, o ile a bolella batho hore ba “laole litlhapi tsa leoatle le libōpuoa tse fofang tsa maholimo le sebōpuoa se seng le se seng se phelang se hahabang lefatšeng.” (Genese 1:28) Kahoo, ke ho utloahalang ho fihlela qeto ea hore Molimo o talima batho ba phahametse liphoofolo.

Qeto ena e tšehetsoa ke polelo ea bohlokoa e boletsoeng temaneng e qotsitsoeng ka holimo. Bibele e re “Molimo [o ile] a bōpa motho ka setšoantšo sa hae, a mo bōpa ka setšoantšo sa Molimo; a ba bōpa e le e motona le e motšehali.”—Genese 1:27.

Kaha batho ba bōpiloe “ka setšoantšo sa Molimo,” tsela eo re bonahatsang litšobotsi tsa Molimo ka eona, tse kang bohlale, toka le lerato, e ea ikhetha. Ka tlhaho batho ba boetse ba na le bokhoni ba ho bontša boitšoaro le ho ba le kamano e haufi le Molimo. Liphoofolo ha li na bokhoni boo hobane ha lia bōptjoa “ka setšoantšo sa Molimo.” Li tlaasana ho batho ebile ha lia etsetsoa ho tšoaroa ka tsela e tšoanang le eo batho ba tšoaroang ka eona.

Na see se bolela hore batho ba lokela ho tšoara liphoofolo hampe? Che.

• Molaong oo Molimo a neng a o file Baiseraele, o ile a etsa bonnete ba hore liphoofolo lia phomotsoa, lia feptjoa, lia thusoa ha li le tsietsing ebile li sireletsoa likotsing.—Exoda 23:4, 5; Deuteronoma 22:10; 25:4.

“U tla etsa mosebetsi oa hao ka matsatsi a tšeletseng; empa u khaotse ka letsatsi la bosupa, e le hore poho ea hao le esele ea hao li phomole.”—Exoda 23:12.

SEO BATHO BA SE BUANG

Litsomi tse ling le batšoasi ba litlhapi ba bolaea liphoofolo e le papali, ba thabisoa ke ho li lelekisa le ho li tšoara. Batho ba bang ba lumellana le mongoli oa libuka tsa lipale oa Morussia, ea bitsoang Leo Tolstoy, ea ileng a ngola hore ho bolaea liphoofolo le ho li ja “ehlile ke phoso.”

SEO BIBELE E SE BUANG

Molimo o lumella batho ho bolaea liphoofolo hore ba itšireletse kapa ba iketsetse liaparo. (Exoda 21:28; Mareka 1:6) Bibele e boetse e re batho ba ka bolaea liphoofolo hore ba fumane lijo. Genese 9:3 e re: “Phoofolo e ’ngoe le e ’ngoe e hahabang e phelang e tla ba lijo tsa lōna.” Esita le Jesu o ile a thusa barutuoa ba hae ho tšoasa litlhapi tseo ba ileng ba li ja hamorao.—Johanne 21:4-13.

Leha ho le joalo, Bibele e re Molimo “o hloile mang kapa mang ea ratang pefo.” (Pesaleme ea 11:5) Kahoo ho hlakile hore Molimo ha a batle hore re ntše liphoofolo kotsi kapa re li bolaele ho ithabisa feela kapa papali.

Bibele e bontša hore Molimo o nka bophelo ba liphoofolo e le ba bohlokoa.

• Bibele e re nakong ea pōpo, ‘Molimo o ile a etsa libata tsa lefatše ho ea ka mofuta oa tsona le liphoofolo tse ruuoang ho ea ka mofuta oa tsona le phoofolo e ’ngoe le e ’ngoe e hahabang ea lefatše ho ea ka mofuta oa eona. ’Me Molimo a bona hore ho molemo.’—Genese 1:25.

• Ha Bibele e bua ka Jehova, e re: “O fa liphoofolo lijo tsa tsona.” (Pesaleme ea 147:9) Molimo o entse tikoloho e nang le lijo tse lekaneng le tšireletseho bakeng sa liphoofolo.

• Morena Davida oa Iseraele o ile a rapela a re: “Jehova, u pholosa motho le phoofolo.” (Pesaleme ea 36:6) Ka mohlala, nakong ea Moroallo, Jehova o ile a sireletsa batho ba robeli le liphoofolo tsa mefuta eohle pele a felisa batho ba khopo.—Genese 6:19.

Ho hlakile hore Jehova o ananela liphoofolo tseo a li bōpileng, ’me o lebeletse hore batho le bona ba li tšoare ka tsela e loketseng.

“Ea lokileng o hlokomela moea oa phoofolo ea hae e ruuoang.” —Liproverbia 12:10.