PONO EA BIBELE
Pefo
Histori ea batho e tletse ka pefo. Na tlaleho ee e bohloko e tla tsoela pele ka ho sa feleng?
Molimo o ikutloa joang ka pefo?
SEO BATHO BA SE BUANG
Batho ba bangata, ho akarelletsa le ba bolumeli, ba nka hore ho loketse hore motho a be mabifi ha a halefisoa ke ba bang. Ho phaella moo, batho ba limilione ba talima pefo e hlahang mecheng ea phatlalatso e le boithabiso bo amohelehang.
SEO BIBELE E SE BUANG
Haufi le motse oa Mosul, o ka leboea ho Iraq, ho na le lithako tsa motse o kileng oa e-ba moholo oa Ninive—oo e neng e le motse-moholo oa ’Muso oa Assyria ea boholo-holo. Ha motse oo o sa ntse o atlehile, Bibele e ile ea bolela esale pele hore Molimo o tla “etsa Ninive lesupi.” (Sofonia 2:13) Molimo o ile a re: “Ke tla u etsa sebonoang.” Ke hobane’ng ha a ne a bua joalo? Ke hobane Ninive e ne e le “motse oa tšollo ea mali.” (Nahume 1:1; 3:1, 6) Ho ekelletsa moo, Pesaleme ea 5:6 e re: “Jehova o hloile motho ea tšollang mali.” Joalokaha lithako tsa Ninive li bontša, Molimo o ile a phethahatsa mantsoe a hae.
Pefo e qaliloe ke Satane Diabolose, e leng mohanyetsi ea ka sehloohong oa Molimo le batho, eo Jesu Kreste a ileng a re ke “’molai.” (Johanne 8:44) Ho feta moo, kaha “lefatše lohle le rapaletse matleng a ea khopo,” mekhoa ea hae e mebe e bonahala ka ho hlaka tseleng eo batho ba talimang pefo ka eona, le kamoo ba ratang ho e shebella kateng. (1 Johanne 5:19) E le hore re khahlise Molimo, re lokela ho hloea pefo ’me re rate seo a se ratang. * Empa na re ka khona ho etsa seo?
“Jehova . . . o hloile mang kapa mang ea ratang pefo.” —Pesaleme ea 11:5.
Na batho ba ratang pefo ba ka fetoha?
SEO BATHO BA SE BUANG
Pefo e mpa feela e bontša seo batho ba leng sona, ’me seo se ke ke sa fetoha.
SEO BIBELE E SE BUANG
Tlosang “khalefo, bohale, bobe, puo e nyefolang, le puo e nyonyehang.” E boetse e re: “Hlobolang botho ba khale le litloaelo tsa bona, ’me le ikapese botho bo bocha.” (Bakolose 3:8-10) Na Molimo o batla seo re ke keng ra se khona? Che. Batho ba ka fetoha. * Empa joang?
Bohato ba pele ke ho fumana tsebo e nepahetseng ka Molimo. (Bakolose 3:10) Ho ithuta ka melao le litšobotsi tse babatsehang tsa ’Mōpi ho tla susumelletsa motho ea pelo e ntle hore a atamele ho Molimo ’me a ikemisetse ho mo khahlisa.—1 Johanne 5:3.
Bohato ba bobeli bo amana le batho bao re khethang ho tloaelana le bona. “U se ke ua ba le setsoalle le mang kapa mang ea ineheletseng bohale; ’me u se ke ua kena setsoalleng le motho ea tlakolohang ka bohale, e le hore u se ke ua tloaela litsela tsa hae eaba ka sebele u nkela moea oa hao leraba.”—Liproverbia 22:24, 25.
Bohato ba boraro bo amana le kutloisiso. Re lokela ho utloisisa seo pefo e hlileng e leng sona—hore ke bofokoli bo tebileng bo bontšang ho hloka boitšoaro. Ho fapana le hoo, ba ratang khotso ba khona ho laola maikutlo a bona. Liproverbia 16:32 e re: “Ea liehang ho halefa o molemo ho feta monna ea matla.”
“Phehellang khotso le batho bohle.”—Baheberu 12:14.
Na pefo e sa tla ke e fele?
SEO BATHO BA SE BUANG
Esale pefo e le teng ’me e tla ’ne e be teng.
SEO BIBELE E SE BUANG
“Ho setse nakoana e seng kae, ’me ea khopo ha a sa tla hlola a e-ba teng . . . Empa ba bonolo ba tla rua lefatše, ka sebele ba tla fumana thabo e phethehileng khotsong e ngata.” (Pesaleme ea 37:10, 11) E le hore Molimo a sireletse batho ba bonolo le ba ratang khotso, o tla felisa ba ratang pefo joalokaha a ile a felisa Ninive ea boholo-holo. Ka mor’a moo, ha ho mohla pefo e tla luka khotso lefatšeng!—Pesaleme ea 72:7.
“Ba maikutlo a bonolo . . . ba tla rua lefatše.”—Matheu 5:5
Kahoo, hona joale ke nako ea ho batla ho amoheloa ke Molimo ka hore re phehelle khotso. Petrose oa Bobeli 3:9 e re: “Jehova . . . ha a le felle pelo hobane ha a lakatse hore leha e le mang a timetsoe empa o lakatsa hore bohle ba fihle pakong.”
“Ba tla lokela ho tea lisabole tsa bona hore e be mehoma le marumo a bona hore e be likere tse faolang limela.”—Esaia 2:4.
^ ser. 7 Molimo o ile a lumella Baiseraele ba boholo-holo ho loana e le hore ba sireletse naha ea bona. (2 Likronike 20:15, 17) Leha ho le joalo, boemo boo bo ile ba fetoha ha Molimo a felisa selekane seo a neng a e-na le sona le Baiseraele ’me a theha phutheho ea Bokreste, e likarolong tsohle tsa lefatše.
^ ser. 11 Mehlala ea batho ba ileng ba fetola tsela eo ba phelang ka eona e fumaneha lihloohong tse hlahang khafetsa Molula-Qhooeng, tse reng “Bibele e Fetola Batho.”
Mohlomong u ka Rata le
TSOHA!
Tlhekefetso ea Malapeng e Tla Fela
Melao-motheo ea Bibele e ka thusa batho ba mabifi haholo joang hore ba fetole boitšoaro ba bona?
MOLULA-QHOOA
Ke ne ke Lula ke Tsamaea ke Nkile Sethunya sa ka
Annunziato Lugarà e ne e le setho sa kenke e kotsi, empa ho etela Holong ea ’Muso ho ile ha fetola bophelo ba hae.
HO THUSA BATHO
Ho Sokolla Motšoaruoa a le Mong ka Nako
Lipaki Tsa Jehova tsa Spain li ithuta Bibele le batšoaruoa ba ka bang 600. Bala kamoo mosebetsi ona oa ho ruta batho Bibele o ileng oa thusa motšoaruoa e mong kateng.
MOLULA-QHOOA
Re ka Etsa’ng Hore re Hlole Lehloeo?—U ka Hlola Lehloeo ka Thuso ea Molimo
Moea oa Molimo o halalelang o ka u thusa hore u be le makhabane a ka u thusang hore u hlole lehloeo.
