Sebokeng seo, ho ile ha boeloa ha fihleloa qeto ea hore ho be le Mokhatlo oa Machaba. Sepheo sa mokhatlo oo e ne e le “ho khothalletsa tšebelisano ’moho ea machaba le ho finyella khotso le tšireletseho.” Malumeli a mangata a bohata a ne a tšehetsa mokhatlo ona. Lekhotla la Amerika la Likereke Tsa Kreste le ile la rorisa Mokhatlo oa Machaba ka hore o joaloka ’Muso oa Molimo lefatšeng. Lekhotla leo le ile la bontša hore le tšehetsa mokhatlo oo ka ho romela baemeli ba lona sebokeng se neng se tšoaretsoe Paris sa ho bopa khotso. E mong oa baemeli bao o ile a re seboka seo e ile ea e-ba qaleho ea histori ea moloko oa batho.

Ho ile ha ba le ntho e ileng ea etsahala empa e sa susumetsoe ke seboka seo sa ho bopa khotso. Ntho eo e ile ea e-ba ho boleloa ha litaba tse molemo tseo Jehova a ileng a fa bahlanka ba hae matla a hore ba li bolele ka sekhahla ho feta leha e le neng pele ka selemo sa 1919. Empa pele ho moo, Liithuti Tsa Bibele li ile tsa hlokomela hore ho na le ntho ea bohlokoa e lokelang ho etsoa.

Ho ile ha reroa hore ho tle ho be le seboka sa ho khetha baeta-pele ba Watch Tower Bible and Tract Society ka Moqebelo oa la 4 January, 1919. Mor’abo rona Joseph F. Rutherford, eo e neng e le moeta-pele ka nako eo, o ne a koaletsoe a se na molato teronkong e Atlanta, Georgia, U.S.A. hammoho le barab’abo rona ba bang ba supileng. Barab’abo rona ba ne ba lokela ho etsa qeto ea hore na baeta-pele ba neng ba le teronkong ba ne ba ka boela ba khethoa hore e be baeta-pele hape.

Ha mor’abo rona Rutherford a ntse a le teronkong o ne a tšoenyehile haholo ka hore na ho tla etsahala’ng ka mokhatlo oa Jehova nakong e tlang. O ne a tseba hore barab’abo rona ba bang ba ka ’na ba bona ho le molemo hore ho khethoe motho e mong hore e be mopresidente. Kahoo, o ile a ngola lengolo le neng le khothaletsa hore mor’abo rona Evander J. Coward e be mopresidente. Mor’abo rona Rutherford o ile a hlalosa mor’abo rona Coward e le motho ea ikokobelitseng, ea bohlale le ea tšepahallang morena. Leha ho le joalo, batho ba bangata ba ne ba e-na le maikutlo a fapaneng a hore seboka seo se chechisoe ’me se tšoaroe ka mor’a likhoeli tse tšeletseng. Maqoetha a neng a sireletsa barab’abo rona ba neng ba le teronkong ba ile ba lumellana le qeto eo. Ha ba ntse  ba leka ho shebisana litaba, barab’abo rona ba bang ba ile ba koata haholo.

Ho na le bothata bo ileng ba hlaha boo mor’abo rona Richard Barber a ileng a re ho ne ho le thata ho bo rarolla. E mong oa barab’abo rona ea neng a le sebokeng seo o ile a re: “Ha ke leqoetha empa ha ho tluoa litabeng tsa molao teng, kea tseba hore na ho sebetsa litaba ka toka ho bolela’ng. Tsela e molemo eo ka eona re ka bontšang hore re tšepahalla Molimo ke ka hore re khethe mor’abo rona Rutherford hore e be mopresidente.”​—Pes. 18:25.

Mor’abo rona A. H. Macmillan oa hopola hore letsatsing le hlahlamang mor’abo rona Rutherford o ile a tla ho eena seleng eaba o re: “Hlahisa letsoho la hao.” Mor’abo rona Rutherford o ile a mo fa lengolo la mohala. Mor’abo rona Macmillan o ile a utloisisa hang-hang hore na molaetsa oo o ne o bolela’ng. Molaetsa oa lengolo leo o ne o bontša hore barab’abo rona ba neng ba ntse ba etella Mokhatlo pele ba khethiloe hape le hore Mor’abo rona Joseph Rutherford le William Van Amburgh e ntse e le baokameli. Ha Mor’abo rona Rutherford a tla tsoela pele e le mopresidente.

Liithuti Tsa Bibele li ile tsa kopa batho hore ba saene tokomane e eang ’musong ea hore barab’abo rona ba lokolloe. Li ile tsa e-ba sebete hore li tsamaise tokomane eo. ’Me li ile tsa fumana batho ba ka holimo ho 700 000 ba ileng ba saena. Ka Laboraro la la 26 March 1919, pele tokomane eo e ka isoa ’musong, mor’abo rona Rutherford le ba neng ba e-na le eena ba ile ba lokolloa.

Puong eo a neng a e fana ho batho ba neng ba mo amohela, mor’abo rona Rutherford o ile a re: “Ke kholisehile hore boemo bona boo re qetang ho feta ho bona bo re lokisetsa mathata a boima a larileng ka pele. . . . Mosebetsi oa lona o boima e ne e se ho re ntša teronkong. Sena e ne e se sona sepheo se ka se hloohong sa mosebetsi oo.  . . Empa sepheo sa mosebetsi oo o boima e ne e le ho tlotlisa Jehova ’me batho ba bangata ba kentseng letsoho ho o etsa ba hlohonolofalitsoe.”

Lintho tse ileng tsa etsahala mabapi le nyeoe eo, li ile tsa bontša hore li susumetsoa ke Jehova hore li etsahale. Mohlala, ka la 14 May 1919, lekhotla la maipiletso le ile la liha kahlolo e reng: “Baqosuoa nyeoeng ena ba ne ba ahlotsoe ka ho hloka toka . . . ’me ka lebaka leo lekhotla le ba fumana ba se na molato.” Kaha barab’abo rona ba ile ba fumanoa ba le molato oa litlolo tsa molao tse tebileng, tlaleho eo e ne e tla lula e ba setse morao haeba lekhotla le ne le ka ba tšoarela feela kapa la fokotsa likotlo tsa bona. E ile eaba ha ba sa qosoa hape ka mor’a moo. Ka lebaka leo, Moahloli Rutherford o ile a boela a fumana litokelo tsa hae tsa molao ’me a tsoela pele ho sireletsa bahlanka ba Jehova Lekhotleng le Phahameng la United States, e leng ntho eo a ileng a e etsa ka makhetlo ka mor’a hore a lokolloe.

Mor’abo rona Macmillan o re: “Re ne re sa tl’o lula feela ebe ha re etse letho re emetse hore  morena a tl’o re nkela leholimong. Re ile ra hlokomela hore re lokela ho etsa ho hong e le hore re bone hore na thato ea Morena e ne e le efe.”

Leha ho le joalo, barab’abo rona ba ntlo-kholo ba ne ba sa khone ho tsoela pele ka mosebetsi oo esale ba o etsa ka lilemo-lemo. Hobane’ng? Ha barab’abo rona ba ntse ba le teronkong, karolo e ’ngoe ea thepa e neng e sebelisoa ha ho hatisoa e ne e sentsoe. Ntho ena e ne e nyahamisa ’me barab’abo rona ba bang ba ne ba ipotsa hore na mosebetsi oa boboleli o se o phethiloe.

Na batho ba ne ba ntse ba thahasella ho mamela molaetsa oa ’Muso oo Liithuti Tsa Bibele li neng li o bolela? E le hore li fumana karabo ea potso eo, mor’abo rona Rutherford o ile a etsa qeto ea ho fana ka puo. Motho e mong le e mong o ne a lokolohile hore a ka tla e mamela. Mor’abo rona Macmillan o ile a re: “Haeba ho ne ho ke ke ha e-ba le motho ea tlang, re ne re tla tseba hore mosebetsi oa boboleli o felile.”

Le hoja a ne a kula hampe, mor’abo rona Rutherford o ile a fana ka puo e nang le sehlooho se reng: “Tšepo Bakeng sa Batho ba Tsietsing” Los Angeles, California ka Sontaha sa la 4 May, 1919. Batho ba ka bang 3 500 ba ile ba tla ho tla mamela puo eo ’me ba bang ba makholo-kholo ba ile ba khutlisoa hobane ho tletse. Letsatsing le hlahlamang ho ile ha boela ha tla batho ba ka bang 1 500. Barab’abo rona ba ne ba fumane karabo eo ba neng ba e hloka e leng ea hore batho ba bangata ba ne ba ntse ba thahasella molaetsa.

Ntho eo barab’abo rona ba ileng ba e etsa ka mor’a moo e ile ea ama tsela eo Lipaki Tsa Jehova li etsang mosebetsi oa boboleli ho tla fihlela lena le holimo.

Molula Qhooa oa August, 1919 o ile oa phatlalatsa hore maqalong a September, ho tla tšoaroa kopano e akaretsang e neng e tla tšoareloa Cedar Point, Ohio. Clarence B. Beaty e leng Seithuti sa Bibele se neng se lula Missouri o re: “Motho e  mong le e mong o ne a ipatla moo.” Bara le barali babo rona ba fetang 6 000 ba ile ba tla kopanong eo, e leng palo e fetang hole e neng e lebeletsoe. Ntho e ileng ea etsa hore kopano eo e be monate le ho feta ke hore ho ile ha kolobetsoa batho ba fetang 200 letšeng le haufi la Erie.

Letsatsing la bohlano la kopano, e leng la la 5 September 1919, puong e nang le sehlooho se reng: “Puo ho Basebetsi-’moho,” mor’abo rona Rutherford o ile a lokolla makasine ea The Golden Age. * E ne e tl’o bua ka litaba tsa bohlokoa tsa morao-rao, e fane ka litlhaloso tsa Mangolo tsa hore na ke hobane’ng ha liketsahalo tseo li etsahala.

Liithuti Tsa Bibele li ile tsa khothalletsoa hore li bolele ka sebete li sebelisa makasine ena e ncha. Lengolo le neng le hlalosa hore na mosebetsi ona o lokela ho etsoa joang le ile la re: “Motho e mong le e mong ea kolobelitsoeng o lokela ho nka mosebetsi ona e le tlotla hape e le monyetla oa hore a sebetse ka hohle kamoo a ka khonang ho bolela litaba tse molemo.” Batho ba bangata ba ile ba amohela memo ena. Ka December, bahoeletsi ba chesehang ba ne ba se ba fumane lipeheletso tse ka holimo ho 50 000 tsa makasine ona.

Ho elella qetellong ea selemo sa 1919, bahlanka ba Jehova ba ne ba se ba hlophisitsoe bocha hape ba e-na le matla a ho sebetsa. Ho phaella moo, boprofeta bo bong ba bohlokoa bo amanang le matsatsi a ho qetela bo ne bo se bo phethahetse. Boprofeta bo ho Malakia 3:​1-4 bo buang ka ho lekoa le ho hloekisoa ha batho ba Molimo bo ne bo phethahetse. Bahlanka ba Jehova ba ne ba lokollotsoe botlamuoeng ba “Babylona e Moholo,” hape Jesu o ne a khethile “lekhoba le tšepahalang le le masene.” * (Tšen. 18:​2, 4; Mat. 24:​45) Kahoo, liithuti tsa Bibele li ne li se li le malala-a-laotsoe hore li etse mosebetsi oo Jehova a li fileng oona.