Kosepele ea Luka e re Jesu o ile a bula moqolo oa Esaia, a o bala ’me a o thatela hape. Ha Johanne a qetella Kosepele ea hae, o ile a bua ka moqolo, a bolela hore a ke ke a khona ho kenyelletsa moqolong oo lipontšo tsohle tseo Jesu a neng a li entse.—Luka 4:16-20; Johanne 20:30; 21:25.

Meqolo e ne e etsuoa joang? Likarolo tsa letlalo kapa loli li ne li khomaretsoa hammoho hore ho etsoe moqolo. Ebe joale o thateloa molangoaneng, karolo e ngotsoeng mantsoe e e-ba ka hare. Mongolo o ne o hlahella lik’holomong tse lebang tlaase moqolong moo. Haeba moqolo o ne o le molelele, o ne o e-ba le melangoana qetellong, mahlakoreng ka bobeli, eo ’mali a neng a e sebelisa hore a bule mongolo ka letsoho le leng ebe ka le leng o thatolla moqolo, ho fihlela a fumana moo a batlang ho bala teng.

The Anchor Bible Dictionary e re: “Molemo oa moqolo ke hore o ne o le molelele ka ho lekaneng hore (hangata o le bolele ba limithara tse ka bang 10) buka kaofela e felle volumung e nyenyane, ha o se o thatetsoe.” Ka mohlala, ho hakanyetsoa hore Kosepele ea Luka e ne e ka hloka moqolo o bolelele ba limithara tse ka bang 10. Maemong a mang, karolo e ka holimo le e ka tlaase ea moqolo e ne e kutoa hanyenyane, e etsoe boreleli ka lejoe la pumice le ho tlotsoa ka dae.

Ha boprista bo qala sechabeng sa Iseraele, ho ne ho khethoa monna a le mong feela ka nako hore e be moprista ea phahameng, ’me o ne a e-ba boemong boo ho fihlela a e-shoa. (Numere 35:25) Arone ke eena oa pele oa ho ba boemong boo. Ka mor’a moo, ka tloaelo tokelo ena e ne e fetela ho mora oa letsibolo ha e tloha ho ntat’ae. (Exoda 29:9) Litloholo tse ngata tsa Arone e ne e le baprista, empa ke tse seng kae feela tseo e ileng ea e-ba baprista ba phahameng.

Ha Baiseraele ba busoa ke lichaba tse ling, babusi bao e seng Baiseraele ba ne ba tlosa le ho beha baprista ba phahameng ba Bajuda, ba batloang ke bona. Leha ho le joalo, ho bonahala eka ba neng ba khethoa, kamehla ba ne ba tsoa malapeng a itseng a hlaheletseng, boholo ba ’ona e le a leloko la Arone. Kamoo ho bonahalang kateng, poleloana ena “baprista ba ka sehloohong” e bolela litho tse ka sehloohong tsa baprista. E ka ’na eaba baprista ba ka sehloohong ba ne ba kopanyelletsa lihlooho tsa lihlopha tse 24 tsa baprista; bao e neng e le litho tse hlaheletseng malapeng a baprista ba phahameng le baprista ba phahameng ba neng ba theotsoe boemong boo, ba kang Anase.—1 Likronike 24:1-19; Matheu 2:4; Mareka 8:31; Liketso 4:6.