Haeba ha ho joalo, ho ka etsahala hore u kile oa bona ha batho ba bang ba hlouoa. Hangata re utloa litlaleho tsa batho ba hlorisoang ka lebaka la hobane ba tsoa linaheng tse ling kapa hobane e le ba morabe o mong kapa ba ratana le batho ba bong bo tšoanang. Ka lebaka la sena, mebuso e mengata e beha melao ea hore ho fanoe ka kotlo ho batho ba etsang lintho tse bontšang hore ba hloile batho ba bang.

Hangata batho ba hloiloeng le bona ba hloea ba bang, ebe ba iphetetsa ka hore le bona ba ba etse lintho tse bohloko. Sena se etsa hore lehloeo le se ke la fela ntle le haeba ho e-na le motho ea ka le thibelang.

Mohlomong u kile oa utloa bohloko ka lebaka la ho khetholloa, ho sonngoa, ho rohakoa kapa ho tšosoa ke motho ea reng o tla u etsa ntho e itseng. Maemong a mang, lehloeo le bontšoa ka litsela tse kang ho senya thepa ea batho ba bang, ho ba beta le ho ba bolaea.

Makasine ena e tla araba lipotso tsena tse latelang ’me e bontše kamoo re ka khonang ho hlola lehloeo kateng:

• Ke Hobane’ng ha lehloeo le atile hakaale?

• Ke joang re ka hlolang lehloeo?

• Na ho na le nako eo lehloeo le tla ke le fele?