Seo Bibele e se Rutang ka se Nepahetseng le se Fosahetseng se ka re Thusa Haholo
Bibele e thusitse batho ba limilione maemong ana a mane a fapaneng a bophelo ’me re ka e tšepa.
1. Lenyalo
Batho ba na le maikutlo a fapaneng ka lenyalo le ka seo ba se hlokang e le hore ba be le lenyalo le thabileng.
BIBELE E RE: “E mong le e mong oa lona o lokela ho rata mosali oa hae joalokaha a ithata. Mosali le eena o lokela ho hlompha monna oa hae haholo.”—Baefese 5:33.
SEO TEMANA ENA E SE BOLELANG: Molimo ke Moqapi oa lenyalo, kahoo oa tseba hore na banyalani ba hloka’ng e le hore ba thabe. (Mareka 10:6-9) Banyalani ba tla thaba haeba e mong le e mong a amehile ka seo e mong a se hlokang. Monna ea ratang mosali oa hae o mo tšoara hantle ebile oa mo hlokomela. Mosali eena o bontša hore o hlompha monna oa hae ka tsela eo a buang le eena ka eona le ka tsela eo a itšoarang ka eona.
KELETSO E TSOANG KA BIBELENG E THUSITSE BATHO BA BANG: Quang le Thi, ba tsoang Vietnam ba ne ba ikutloa ba sa thaba lenyalong la bona. Quang o ne a tšoara mosali oa hae hampe, o re: “Ke ne ke sa tsotelle maikutlo a Thi ebile ke lula ke mo utloisa bohloko.” Thi o ne a batla ho hlala monna oa hae, o re: “Ke ne ke sa nahane hore nka hlola ke tšepa monna oa ka le ho mo hlompha.”
Hamorao, Quang le Thi ba ile ba ithuta seo Bibele e se rutang ka lenyalo ho Baefese 5:33 le ka mokhoa oo ba ka sebelisang keletso eo kateng. Quang o re: “Temana ena e nthusitse haholo hore ke be mosa ebile ke khona ho etsa hore Thi a ikutloe a ratoa, a tsotelloa maikutlong hape a lule a e-na le lintho tseo a li hlokang. Ha ke mo tšoara joalo Thi oa nthata ebile oa ntlhompha.” Thi o re: “Ha ke sebelisa keletso e hlahang ho Baefese 5:33 ke bontša monna oa ka hore kea mo hlompha, sena se etsa hore a nthate le ho feta ’me ke ikutloa ke sireletsehile ebile ke e-na le khotso.”
Ho ithuta lintlha tse eketsehileng ka lenyalo, bala makasine ea Tsoha! ea No. 2 2018, eo sehlooho sa eona se reng: “Lintho Tse 12 Tse ka Thusang Malapa ho Thaba” websaeteng ea jw.org/st.
2. Re ka Tšoara Batho ba Bang Joang?
Hangata batho ba tšoara ba bang hampe ka lebaka la morabe, bochaba, tsela eo ba shebahalang ka eona, bolumeli kapa hore na ke ba bong bofe.
BIBELE E RE: “Le hlomphe batho ba mefuta eohle.”—1 Petrose 2:17.
SEO TEMANA ENA E SE BOLELANG: Bibele ha e re rute hore re hloee batho ba bang hobane ba tsoa linaheng tse ling, e le ba morabe o mong kapa ba ratana le batho ba bong bo tšoanang. Ho e-na le hoo, Bibele e re khothaletsa ho hlompha batho bohle ho sa tsotellehe hore na ke ba morabe ofe, ba tsoa naheng efe, hore na ba ruile kapa ba futsanehile. (Liketso 10:34) Le haeba re sa lumellane le seo batho ba bang ba se lumelang kapa tsela eo ba itšoarang ka eona, re lokela ho ba tšoara ka mosa le ho ba hlompha.—Matheu 7:12.
KELETSO E TSOANG KA BIBELENG E THUSITSE BATHO BA BANG: Daniel o rutiloe hore batho ba tsoang Asia ba kotsi naheng ea habo. O ile a qetella a se a hloile motho e mong le e mong ea tsoang Asia ’me hangata o ne a lula a ba rohaka har’a batho ba bang. O re: “Ka ho etsa joalo ke ne ke utloa eka ke sireletsa naha ea heso. Ke ne ke sa nahane le hore ntho eo ke e etsang e mpe.”
Daniel o ile a qetella a ithutile Bibele, o re: “Ke ile ka lokela ho fetola tsela eo ke nahanang ka eona. Ke shebe batho ka tsela eo Molimo a ba shebang ka eona. Ke ithutile hore batho bohle baa tšoana ho sa tsotellehe moo ba tsoang teng.” Daniel o hlalosa kamoo a ikutloang kateng ha a kopana le batho hona joale. O re: “Ha ke sa nahana haholo ka hore na motho o tsoa hokae. Ke se ke rata batho bohle ebile ke na le metsoalle hohle lefatšeng.”
Ho ithuta lintlha tse eketsehileng, bala makasine ea Tsoha! ea No. 3 2020, e nang le sehlooho se reng “Na Pheko e Teng Bakeng sa Khethollo?” websaeteng ea jw.org/st.
3. Chelete
Batho ba bangata ba hahamalla ho ba le chelete e le hore ba thabe bophelong le hore ba be le bokamoso bo chabileng.
BIBELE E RE: “Bohlale boa sireletsa feela joalokaha chelete e sireletsa empa bohlale bo boloka bophelo ba motho ea nang le bona.”—Moeklesia 7:12.
SEO TEMANA ENA E SE BOLELANG: Re hloka chelete empa ha se motheo oa thabo kapa bokamoso ba rona. (Liproverbia 18:11; 23:4, 5) Ho e-na le hoo, re tla thaba e le kannete re boele re be le bokamoso bo sireletsehileng haeba re sebelisa bohlale bo tsoang ho Molimo bo ka Lentsoeng la hae e leng Bibele.—1 Timothea 6:17-19.
KELETSO E TSOANG KA BIBELENG E THUSITSE BATHO BA BANG: Cardo ea tsoang Indonesia o ne a amehile haholo ka ho ba le maruo. O re: “Ke ne ke e-na le lintho tse ngata tseo batho ba bangata ba neng ba labalabela ho ba le tsona, ke khona ho ea moo ke batlang, ke reka lintho tse turu, likoloi le matlo.” Empa chelete ea hae e ile ea fela. Cardo o re: “Motho e mong o ile a nkutsoetsa ’me chelete eo ke e sebelelitseng ka thata lilemo tsena kaofela e ile ea fela ka ho panya ha leihlo. Ke qetile bophelo bohle ba ka ke lelekisa maruo empa qetellong ke ile ka ikutloa ke le motho ea se nang thuso hobane ke se ke se na letho.”
Cardo o ile a qalella ho sebelisa keletso e tsoang ka Bibeleng e buang ka chelete. Ha a sa sebelisa matla a hae le nako ho ipokelletsa ka maruo empa o khethile ho nolofatsa bophelo ba hae. O re: “Hona joale ke thabile hobane ke se ke le motsoalle oa Molimo. Ke khona ho robala hamonate bosiu ke sa tšoenyeha ’me kannete ke thabile.”
Ho ithuta lintlha tse eketsehileng ka seo Bibele e se buang ka chelete, bala sehlooho se reng: “Na Thuto e Phahameng le Chelete li ka Etsa Hore U Lule U Phela Hamonate?” makasineng oa Molula-Qhooa oa No. 3 2021, websaeteng ea jw.org/st.
4. Thobalano
Batho ba na le maikutlo a fapaneng ka thobalano.
BIBELE E RE: “Le se ke la etsa boitšoaro bo bobe bo amanang le thobalano. E mong le e mong a tsebe ho laola ’mele oa hae e le hore o lule o halalela ebile o hlompheha. Le se ke la etsisa batho ba lichaba ba sa tsebeng Molimo, ba laoloang ke litakatso tsa bona tse feteletseng tsa ho etsa thobalano.”—1 Bathesalonika 4:3-5.
SEO TEMANA ENA E SE BOLELANG: Bibele e re fa meeli eo re lokelang ho fella ho eona ha re bontšana lerato ka thobalano. “Boitšoaro bo bobe bo amanang le thobalano” bo akarelletsa bofebe, botekatse, thobalano pakeng tsa batho ba sa nyalanang, banna ba etsang thobalano le banna ba bang le batho ba etsang thobalano le liphoofolo. (1 Bakorinthe 6:9, 10) Thobalano ke mpho e tsoang ho Molimo eo a e fileng monna le mosali ba nyalaneng feela.—Liproverbia 5:18, 19.
KELETSO E TSOANG KA BIBELENG E THUSITSE BATHO BA BANG: ’Mè e mong ea lulang Australia ea bitsoang Kylie o re: “Ha ke ne ke le lesoha, ke ile ka nahana hore ha nka etsa thobalano ke tla ikutloa ke ratoa ebile ke sireletsehile empa ho ile ha etsahala seo ke sa se lebellang. Ke ile ka ikutloa ke sa sireletseha ebile ke utloile bohloko.”
Hamorao Kylie o ile a ithuta Bibele ’me a sebelisa seo a ithutileng sona ka thobalano. O re: “Ke hlokometse hore melao ea Molimo ea re sireletsa e le hore re se ke ra utloa bohloko. Hona joale ke ikutloa ke sireletsehile ebile ke ratoa hobane ke etsa lintho ka tsela eo Jehova a batlang hore ke li etse ka eona. Ho sebelisa keletso ea Bibele ho nthusitse haholo hore ke se ke ka iphumana ke utloile bohloko.”
Ho ithuta lintlha tse eketsehileng, bala sehlooho se reng: “Bibele e Re’ng ka Batho ba Lulang Hammoho Pele ba Nyalana?” se hlahang websaeteng ea jw.org.
’Mopi oa rona o re thusa ho tseba se nepahetseng le se fosahetseng. Le hoja ho se bonolo kamehla ho mo mamela empa ho etsa joalo ho re tsoela molemo. Re ka kholiseha hore haeba re mo mamela re tla ba le thabo e sa feleng.
