U Lokela ho Khetha Hore na U Tla Etsa se Nepahetseng Kapa se Fosahetseng
Melao ea boitšoaro eo re khethang ho phela ka eona e ka ama thabo ea rona. Jehova Molimo o tseba seo hantle. Ke kahoo a batlang hore re phele ka melao ea hae.
Jehova o batla hore re thabele bophelo bo nang le khotso.
“’Na Jehova ke Molimo oa hao ea u rutang lintho tse tsoelang uena molemo, ea u tataisetsang tseleng eo u lokelang ho tsamaea ho eona. Hoja u ka mamela melao ea ka, khotso ea hao e ne e tla tšoana le noka, ho loka ha hao ho tšoane le maqhubu a leoatle.”—Esaia 48:17, 18.
Joaloka ’Mopi oa rona, Molimo o tseba tsela e molemo ka ho fetisisa ea ho phela. O batla hore re mamele likeletso tsa hae hobane li molemong oa rona. Ha re mamela litaelo tsa Molimo re ka kholiseha hore re tla atleha. Kahoo, re tla lula re etsa liqeto tse nepahetseng tse tla re tlisetsa thabo le khotso.
Jehova ha a lebella hore re etse lintho tse ka holimo ho matla a rona.
“Taelo ena eo ke le laelang eona kajeno ha e thata haholo hore le ka e utloisisa kapa la e phetha.”—Deuteronoma 30:11.
E le hore re phele ka melao ea Molimo ea boitšoaro ho hlokahala hore re fetole tsela eo re nahanang ka eona le eo re etsang lintho ka eona. Leha ho le joalo, Jehova ha a lebella hore re etse lintho tse ka holimo ho matla a rona, ha e le hantle ’Mopi oa rona o tseba moo matla a rona a fellang. Ha re ntse re ithuta ka Jehova re tla hlokomela hore “litaelo tsa hae ha li boima.”—1 Johanne 5:3.
Jehova o tšepisa ho thusa batho ba batlang ho phela ka melao ea hae.
“’Na, Jehova Molimo oa hao, ke u tšoara ka letsoho la hao le letona, ke ’na ea reng ho uena, ‘U se ke oa tšoha. Ke tla u thusa.’”—Esaia 41:13.
Re ka khona ho phela ka melao ea Molimo ea boitšoaro hobane o tla re thusa. O tla re thusa a sebelisa Lentsoe la hae, Bibele, ho re khothatsa le ho re fa tšepo.
Batho ba limilione lefatšeng ba bone hore ho phela ka melao ea Bibele ho ntlafalitse bophelo ba bona. Ke hobane’ng ha u sa ithute keletso e molemo e hlahang ka Bibeleng le uena? U ka qala ka ho hlahloba bukana ea U ka Thaba ka ho sa Feleng! e fumanehang mahala websaeteng ea jw.org/st. E na le likhaolo tsena tse tharo:
-
Bibele e ka Ntlafatsa Bophelo ba Hao Joang?
-
Bibele e re Tšepisa Bokamoso bo Thabisang
-
Na U ka Tšepa Bibele?
Ha u ntse u ithuta Lentsoe la Molimo, e leng Bibele, u tla hlokomela hore ha lea felloa ke nako, re ka le “tšepa kamehla, hona joale le ka ho sa feleng.” (Pesaleme ea 111:8) Ho phela tumellanong le melao ea boitšoaro e hlahang ka Bibeleng, ke tsela e molemo ka ho fetisisa ea ho phela. Leha ho le joalo Molimo ha a re qobelle hore re mo mamele. (Deuteronoma 30:19, 20; Joshua 24:15) Ena ke khetho eo re lokelang ho iketsetsa eona.
