Ke Hobane’ng ha re Hloka ’Muso oa Molimo?
Qalong ’Mopi oa rona eo lebitso la hae e leng Jehova, e ne e le eena feela ’Musi ’me o ne a busa ka tsela e lerato. O ile a etsetsa batho lehae le letle serapeng sa Edene. A boela a etsa hore batho ba be le lijo tse ngata. Hape O ile a fa batho mosebetsi o khotsofatsang. (Genese 1:28, 29; 2:8, 15) Batho ba ka be ba ntse ba phela ka khotso le hona joale hoja ebe ba ile ba lula ba busoa ke Molimo.
Adama le Eva ba ile ba hana ho busoa ke Molimo
Bibele e re lengeloi la lerabele leo hamorao le ileng la bitsoa Satane Diabolose le ile la re Molimo ha a na tokelo ea ho busa. Le ile la fana ka maikutlo a hore batho ba tla thaba haeba ba sa tataisoe ke Molimo kapa ba sa busoe ke eena. Ka masoabi batsoali ba rona ba pele e leng Adama le Eva ba ile ba mamela Satane eaba ba hlanohela Molimo.—Genese 3:1-6; Tšenolo 12:9.
Kaha Adama le Eva ha baa ka ba batla ho busoa ke Molimo, ba ile ba lahleheloa ke monyetla oa ho lula Paradeiseng le tšepo ea ho phela ka ho sa feleng ba sa kule. (Genese 3:17-19) Qeto ea bona e ile ea ama bana bao ba ileng ba ba le bona hamorao. Bibele e re kaha Adama o entse sebe, “sebe se ile sa kena lefatšeng ka motho a le mong le lefu la kena ka sebe.” (Baroma 5:12) Sebe se ile sa etsa hore ho be le masisa-pelo a mang: ‘Motho o busitse motho ho mo ntša kotsi.’ (Moeklesia 8:9) Ka mantsoe a mang, ha batho ba ipusa ho tla lula ho e-na le mathata.
BATHO BA QALA HO IPUSA
Nimrode o ile a ba khahlanong le Jehova
Motho oa pele oa ho busa batho ba bang ea boletsoeng ka Bibeleng e ne e le Nimrode. O ne a le khahlanong le puso ea Molimo. Ho tloha mehleng ea Nimrode, haesale batho ba nang le matla ba hatella ba tlas’a puso ea bona. Lilemong tse ka bang 3 000 tse fetileng, Morena Solomone o ile a re o bone “liketso tsohle tsa khatello tse ntseng li etsoa tlas’a letsatsi, ’me, bonang! meokho ea ba ntseng ba hatelloa, empa ba ne ba se na motšelisi, bahatelli ba bona ba ne ba e-na le matla.”—Moeklesia 4:1.
Lintho li ntse li le joalo le mehleng ena. Ka 2009 sengoloa sa Machaba a Kopaneng se ile sa re ho bonahala “mathata ’ohle a batho a bakoa ke hore batho ha ba buse ka tsela e nepahetseng.”
NAKO EA HO NKA KHATO
Batho ba hloka ’Muso le baeta-pele ba molemo ’me ke sona seo ’Mopi oa rona a se tšepisitseng.
Le mebuso eo ho bonahalang e etsa lintho hantle e hlolehile ho rarolla mathata a batho
Molimo o hlomme ’Muso o tla nkela mebuso eohle ea batho sebaka “ ’me o tla ema ho isa linakong tse sa lekanyetsoang.” (Daniele 2:44) Ona ke oona ’Muso oo esale batho ba limilione ba o rapella. (Matheu 6:9, 10) Ha se Molimo ea tla busa, ho e-na le hoo o khethile motho ea kileng a phela lefatšeng hore e be Morena. Molimo o khethile mang?
Mohlomong u ka Rata le
LIPOTSO TSA BIBELE LIA ARAJOA
Khotso e Tla Tla Joang Lefatšeng?
Ithute kamoo Molimo a tšepisang ho tlisa khotso lefatšeng ka ’Muso oa hae.
LIPOTSO TSA BIBELE LIA ARAJOA
Na ’Muso oa Molimo o ka Pelong ea Hao?
Bibele e bolela’ng ha e re “’muso oa Molimo o se o le ka hare ho lona”?
