1. Puo e neng e fanoa kopanong ka selemo sa 1935 e ile ea ama moshanyana e mong joang?

MOSHANYANA e mong o ne a le lilemo li 18 ha a ne a kolobetsoa ka 1926. Batsoali ba hae e ne e le Liithuti Tsa Bibele, e leng kamoo Lipaki Tsa Jehova li neng li tsejoa kateng ka nako eo. Batsoali ba hae ba ne ba e-na le bara ba bararo le barali ba babeli bao ba ba holisitseng hore ba sebeletse Jehova le ho etsisa Jesu Kreste. Joaloka Liithuti tse ling tsa Bibele, moshanyana eo ea tšepahalang o ne a e-ja bohobe le veine ka Sehopotso. Leha ho le joalo, tšepo ea hae ka bokamoso e ile ea fetoha nakong eo a neng a mametse puo ea bohlokoa e neng e e-na le sehlooho se reng: “Bongata bo Boholo.” Puo eo e ne e fanoa ke Mor’abo rona Joseph Franklin Rutherford kopanong e neng e le Amerika ka selemo sa 1935. Ho ile ha sibolloa eng kopanong eo?

2. Ke ’nete efe e thabisang eo Mor’abo rona Rutherford a ileng a e hlalosa puong ea hae?

² Puong ea hae, Mor’abo rona Rutherford o ile a hlalosa hore na ke bo-mang ba etsa’ng letšoele le leholo le hlahang ho Tšenolo 7:9. Ho fihlela ka 1935, Liithuti Tsa Bibele li ne li nahana hore bongata bo boholo ke sehlopha sa bobeli se nang le tšepo ea ho ea leholimong empa se se na tumelo e matla. Mor’abo rona Rutherford o ile a sebelisa Mangolo ho hlalosa hore bongata bo boholo ha boa khetheloa ho ea leholimong empa ke linku tse ling * tsa Jesu tse tl’o phonyoha ‘matšoenyeho  a maholo’ ’me li phele ka ho sa feleng lefatšeng. (Tšen. 7:​14) Jesu o ile a re: “Ke na le linku tse ling, tseo e seng tsa lesaka lena; le tsona ke tla li tlisa ’me li tla mamela lentsoe la ka, e tla ba mohlape o le mong, molisa a be mong.” (Joh. 10:​16) Batho bana ba joaloka linku, ke Lipaki tse tšepahalang tsa Jehova tse nang le tšepo ea ho phela lefatšeng la Paradeise ka ho sa feleng. (Mat. 25:​31-33, 46) A re ke re hlahlobeng hore na kutloisiso eo e ncha e ile ea fetola maphelo a bahlanka ba Jehova ba bangata joang ho akarelletsa le moshanyana eane ea lilemo li 18.​—Pes. 97:​11; Liprov. 4:18.

3, 4. Kopanong ea 1935, batho ba likete-kete ba ile ba utloisisa’ng ka tšepo ea bona, hona hobane’ng?

³ Motsotso o thabisang kopanong eo e ile ea e-ba ha sebui se re ho bamameli: “Ka kopo, na bohle ba nang le tšepo ea ho phela lefatšeng ka ho sa feleng ba ka ema?” Mor’abo rona ea neng a le teng kopanong eo o ile a bona batho ba ka holimo ho halofo ea batho ba neng ba le teng ba ema. Mor’abo rona Rutherford o ile a re: “Bonang! Bongata bo Boholo!” Ka mor’a moo, batho ba ile ba opa liatla ba thabile haholo. Ba neng ba eme ba ile ba hlokomela hore ha baa lokela ho ea phela leholimong. Ba ne ba tseba hore ha baa tlotsoa ka moea o halalelang. Letsatsing le hlahlamang, Lipaki tse 840 li ile tsa kolobetsoa ’me boholo ba tsona e ne e le linku tse ling.

⁴ Ka mor’a puo eo, moshanyana eane eo re buileng ka eena le ba bang ba likete ba ile ba emisa ho ja bohobe le ho noa veine ka Sehopotso. Ka boikokobetso, mor’abo rona e mong o ile a hlalosa maikutlo a ba bangata ha a ne a re: “Sehopotso sa 1935 e bile sa ho qetela seo ke neng ke ja litšoantšetso ka sona. Ke ne ke tseba hore Jehova ha aa sebelisa moea oa hae o halalelang ho mpha tšepo ea ho il’o phela leholimong, ho e-na le hoo ke ne ke e-na le tšepo ea ho phela lefatšeng le ho thusa hore lefatše e tle e be paradeise.” (Bar. 8:​16, 17; 2 Bakor. 1:​21, 22) Ho tloha ka nako eo, bongata bo boholo bo ile ba eketseha ’me bo ne bo sebetsa mahetla a bapile le batlotsuoa ba setseng. *

5. Jehova o ikutloa joang ka ba emisitseng ho ja litšoantšetso Sehopotsong?

⁵ Jehova o nka ba ileng ba emisa ho ja litšoantšetso ka mor’a Sehopotso sa 1935 joang? Hape o ikutloa joang ka Paki e kolobelitsoeng e lumelang hore e lokela ho ja bohobe le ho noa veine ka Sehopotso empa hamorao e hlokomela hore ha ea tlotsoa ka moea o halalelang? (1 Bakor. 11:​28) Ba bang ba ne ba ja litšoantšetso hobane ba sa utloisise hore na tšepo ea bona ke efe. Empa joaloka linku tse ling, Jehova o tla ba amohela ka mofuthu haeba ba lumela hore ba ne ba etsa phoso ’me ba emisa ho li ja hape ba tsoela pele ho mo sebeletsa ka botšepehi,. Le hoja ba se ba sa je bohobe le ho noa veine, ba ntse ba tsoela pele ba e-ea Sehopotsong hobane ba bontša hore ba ananela ka ho teba ntho eo Jehova le Jesu ba ba etselitseng eona.

6. Jesu o laetse mangeloi hore a etse’ng?

⁶ Kaha matšoenyeho a maholo a tla qhoma haufinyane, re tla matlafala haholo ha re hlahloba Tšenolo khaolo ea bosupa hore na e re’ng ka Bakreste ba tlotsitsoeng le bongata bo boholo ba linku tse ling. Jesu o ile a  laela mangeloi hore a tšoare meea e mene ea timetso. Ha aa lokela ho tlohella meea eo hore e foke lefatšeng ho fihlela Bakreste bohle ba tlotsitsoeng ba fumana tiiso ea hore Jehova o ba amohetse. (Tšen. 7:​1-4) Kahoo, ka lebaka la hore batlotsuoa ba ile ba tšepahala, ba tla fumana moputso oa hore e be marena le baprista hammoho le Jesu leholimong. (Tšen. 20:6) Jehova, Jesu le mangeloi ba tla thaba ha ba bona Bakreste ba tlotsitsoeng ba 144 000 ba fumana moputso oa bona oa ho phela leholimong.

7. Ho Tšenolo 7:​9, 10, Johanne o ile a bona bo-mang ponong, hona ba ne ba etsa’ng? (Sheba setšoantšo se sekoahelong.)

⁷ Ka mor’a hore Johanne a bue ka marena le baprista ba 144 000 o boetse o bona ntho e thabisang haholo, e leng “bongata bo boholo” bo pholohang Armagedone. Ho fapana le batlotsuoa, bongata bo boholo ke letšoele le leholo haholo ebile ha bo khone ho baleha. (Bala Tšenolo 7:​9, 10.) Bo “apere liaparo tse telele tsa ka holimo tse tšoeu” tse bontšang hore bo ipolokile bo “se na letheba lefatšeng” la Satane hape bo lutse bo tšepahala ho Molimo le Kreste. (Jak. 1:​27) Bo hoeletsa bo thabile hore bo pholohile ka lebaka la ntho eo Jehova le Jesu, Konyana ea Molimo ba e entseng. Hape ba tšoere makala a palema ho bontša hore ba amohela ka thabo Morena eo Jehova a mo khethileng e leng Jesu.​—Bapisa Johanne 12:​12, 13.

8. Tšenolo 7:​11, 12 e re’ng ka lelapa la Jehova le leholimong?

⁸ Bala Tšenolo 7:​11, 12. Ho etsahala’ng ha ba leholimong ba bona bongata bo boholo? Johanne o bona lelapa la Jehova le leholimong le thabile haholo le bile le mo rorisa ha le bona bongata bo boholo. Lelapa la Jehova le leholimong le tl’o thaba haholo ha le bona pono ena e phethahala ea ha bongata bo boholo bo tsoa matšoenyehong a maholo bo ntse bo phela.

9. Ho ea ka Tšenolo 7:​13-15, bongata bo boholo bo etsa’ng hona joale?

⁹ Bala Tšenolo 7:​13-15. Johanne o hlalosa hore bongata bo boholo ‘bo hlatsoitse liaparo tsa bona tse telele tsa ka holimo ’me bo li soeufalitse maling a konyana.’ Taba ena e bontša hore ba na le letsoalo le hloekileng le hore Jehova o ba amohetse. (Esa. 1:​18) Ke Bakreste ba inehetseng, ba kolobelitsoeng, ba bontšang tumelo e matla sehlabelong sa Jesu le ho ba le setsoalle le Jehova. (Joh. 3:​36; 1 Pet. 3:​21) Kahoo, baa tšoaneleha ho ema ka pel’a terone ea Molimo ba mo etsetsa “tšebeletso e halalelang bosiu le motšehare” mona lefatšeng. Le hona joale ba chesehela ho bolela le ho etsa barutuoa le ho beha ’Muso pele bophelong ba bona.​—Mat. 6:​33; 24:​14; 28:​19, 20.

10. Bongata bo boholo bo kholisehile ka eng, hape ke tšepiso efe eo ba tla e bona ha e phethahala?

¹⁰ Bongata bo boholo bo phonyohileng matšoenyeho a maholo, bo kholisehile hore Jehova o tla tsoela pele ho bo hlokomela kaha “ea lutseng teroneng o tla ala tente ea hae holim’a bona.” Tšepiso eo linku tse ling esale li emetse ho bona ha e phethahala, ke e reng: “[Molimo] o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li tla hlola li e-ba teng.”​—Tšen. 21:​3, 4.

11, 12. (a) Ho ea ka Tšenolo 7:​16, 17, ke litlhohonolofatso life tseo bongata bo boholo bo tl’o li fumana nakong e tlang? (b) Linku tse ling li ka etsa’ng Sehopotsong, hona hobane’ng?

¹¹ Bala Tšenolo 7:​16, 17. Hona tjena bahlanka ba bang ba Jehova ba phela ka har’a tlala ea sekoboto ka lebaka la ho hloka chelete  ea ho reka lijo kapa ka lebaka la mathata a bakoang ke lintoa. Ba bang ba literonkong ka lebaka la tumelo ea bona. Leha ho le joalo, ba bongata bo boholo ba thabisoa ke ho tseba hore ka mor’a hore ba pholohe ho felisoa ha tsamaiso ena e khopo ba tla thabela ho ba le matletse-tletse a lijo le ho sebeletsa Jehova kamehla. Nakong eo lefatše la Satane le timetsoang, bongata bo boholo bo tla pholoha bohale ba Jehova bo joaloka mocheso o tlabolang o tla felisa lefatše la Satane. Ka mor’a hore matšoenyeho a maholo a fele, Jesu o tla tataisetsa ba pholohileng “lilibeng tsa metsi a bophelo” bo sa feleng. Kannete bongata bo boholo bo na le tšepo e babatsehang! Har’a batho ba libilione ba phetseng, bongata bo boholo bo ke ke ba shoa!​—Joh. 11:​26.

¹² Ba linku tse ling ba na le tšepo e babatsehang eo ba lebohang Jehova le Jesu ka eona. Ha baa khetheloa ho ea phela leholimong empa ba bohlokoa ho Jehova joaloka batlotsuoa. Lihlopha tseo ka bobeli li rorisa Molimo le Kreste. Tsela e ’ngoe ea ho etsa joalo ke ho ba teng Lijong Tsa Shoalane Tsa Morena.

13, 14. Ke hobane’ng ha batho bohle ba lokela ho ea Sehopotsong sa lefu la Jesu?

¹³ Lilemong tsa morao tjena, ke batho ba fokolang haholo ka palo ba jang litšoantšetso Sehopotsong. Taba ena e bolela hore liphuthehong tse ngata lefatšeng lohle ha ho na batho ba jang. E boetse e bontša hore batho ba bangata ba bang teng Sehopotsong ba na le tšepo ea ho phela lefatšeng. Joale ke hobane’ng ha ba ba teng Lijong Tsa Shoalane Tsa Morena? Ba ba teng feela joalokaha u ka ea lechatong la motsoalle oa hao. U ea lechatong leo hobane u bontša banyalani bao hore oa ba tšehetsa ebile oa ba rata. Ka tsela e tšoanang, ba linku tse ling ba ba teng Sehopotsong hobane ba batla ho bontša Kreste le batlotsuoa hore baa ba rata ebile baa ba tšehetsa. Ba linku tse ling ba boetse ba ba teng Sehopotsong ho bontša hore ba ananela sehlabelo sa Jesu e le hore ba tle ba khone ho phela ka ho sa feleng lefatšeng.

¹⁴ Lebaka le leng la bohlokoa le etsang hore Bakreste ba linku tse ling ba ee Sehopotsong ke hobane ba batla ho mamela taelo ea Jesu.  Ha Jesu a ne a theha Lijo Tsa Shoalane Tsa Morena le baapostola ba hae ba tšepahalang, o ile a re ho bona: “Le ’ne le etsa sena ho nkhopola.” (1 Bakor. 11:​23-26) Kahoo, ba linku tse ling ba tsoela pele ho ea Lijong Tsa Shoalane Tsa Morena hafeela ho ntse ho e-na le batlotsuoa lefatšeng mona. Hape ba linku tse ling ba mema motho e mong le e mong hore a be teng Sehopotsong.

15. Re ka etsa’ng ho rorisa Jehova le Kreste Sehopotsong?

¹⁵ Sehopotsong re ba le monyetla oa ho rorisa Molimo le Kreste ka ho bina le ho rapela. Sehlooho sa puo ea Sehopotso selemong sena se re: “Bontša Hore U Ananela Seo Molimo le Kreste ba U Etselitseng Sona.” E tla matlafatsa kananelo ea rona ho Jehova le Jesu. Ha litšoantšetso tseo li ntse li feta, li tla re hopotsa hore li tšoantšetsa ’mele oa Kreste le mali a hae. Re tla hopola hore Jehova o ile a fana ka Mora oa hae bakeng sa rona e le hore re tle re fumane bophelo bo sa feleng. (Mat. 20:​28) E mong le e mong ea ratang Ntate oa rona le Mora oa hae o tla batla ho ba teng Sehopotsong.

16. Batlotsuoa le linku tse ling ba tšoana ka eng?

¹⁶ Phapang e teng pakeng tsa batlotsuoa le ba linku tse ling ha e etse hore Jehova a nke sehlopha se seng se phahametse se seng. Kaofela baa lekana mahlong a Jehova. Ho feta moo, o ba rekile ka theko e tšoanang ea ho fana ka bophelo ba Mora oa hae. Lihlopha tseo tse peli li fapana ka hore se seng se na le tšepo ea ho phela leholimong ha se seng sona e le lefatšeng. Ka bobeli li lokela ho tšepahalla Molimo le Jesu. (Pes. 31:​23) Hape hopola hore moea oa Molimo o sebetsa ka tsela e tšoanang ho e mong le e mong oa rona. Taba ena e bolela hore Jehova o fana ka moea oa hae o halalelang ho e mong le e mong ho latela tlhoko ea hae.

17. Batlotsuoa ba ntseng ba le teng lefatšeng ba letetse eng?

¹⁷ Bakreste ba tlotsitsoeng ha baa hlaha ba se ba ntse ba e-na le tšepo ea ho phela leholimong. Ke Jehova ea ba fileng tšepo eo. Ba nahana ka tšepo ea bona, ba rapela ka eona ’me ba letetse ho fumana moputso oa ho ea phela leholimong ka tjantjello. Ha ba tsebe hore na ha ba se ba le leholimong ba tl’o ba joang. (Bafil. 3:​20, 21; 1 Joh. 3:2) Leha ho le joalo, ba letetse ka tjantjello ho kopana le Jehova, Jesu, mangeloi le batlotsuoa ba bang. Ba labalabela ho ba le bona ’Musong oa Molimo.

18. Linku tse ling li letetse’ng ka tjantjello?

¹⁸ Ba linku tse ling ba shebetse pele ho tl’o phela ka ho sa feleng lefatšeng e leng takatso  ea e mong le e mong. (Moek. 3:​11) Hape ba shebetse pele nakong eo ba tla beng ba thusa hore lefatše lohle e be paradeise. Ba letetse nako eo ka eona ba tla beng ba haha matlo, ba lema lirapa le ho holisetsa bana ba bona phethehong. (Esa. 65:​21-23) Ba shebetse pele hore ba tl’o hahlaula lefatše ba sheba popo ea Jehova e hlollang e kang lithaba, meru le maoatle le lintho tsohle tseo Jehova a li bopileng. Ka holimo ho tsohle, ba thabela ho tseba hore setsoalle sa bona le Jehova se tla ’ne se matlafale le ho feta.

19. Sehopotso se re fa monyetla ofe hona se tl’o tšoaroa neng selemong see?

¹⁹ Jehova o file e mong le e mong oa bahlanka ba hae tšepo e ikhethang ka bokamoso. (Jer. 29:​11) Sehopotso sa lefu la Jesu se fa batho bohle monyetla oa hore ba rorise Molimo le Kreste ka ntho eo ba e entseng bakeng sa bona e le hore ba tle ba thabele bophelo bo sa feleng. Sehopotso ke ketsahalo ea bohlokoa ka ho fetisisa e etsang hore Bakreste ba be ’moho. Se tla tšoaroa ka mor’a hore letsatsi le likele ka Moqebelo oa la 27 March, 2021. Selemong sena ba bangata ba tla ba le bolokolohi ba ho ba teng ketsahalong ena ea bohlokoa. Ba bang ba tla ba teng ho sa tsotellehe likhanyetso. Ba bang ba tla thulana le qholotso ea hore ba tšoarele Sehopotso teronkong. E se eka ha Jehova, Jesu le lelapa la Molimo le leholimong ba shebelletse, ba ka bona phutheho, sehlopha le motho ka bo-mong a e-ba teng Sehopotsong ’me a etsa joalo ka thabo.