1. Joaloka Morena Davida, batho ba bang ba ka ’na ba ipotsa potso efe?

KAOFELA ha rona re batla ho phela ka khotso. Ha ho na motho ea thabelang ho tšoenyeha. Ho ntse ho le joalo, ka linako tse ling re ka ikutloa re tšoenyehile haholo. Ke kahoo bahlanka ba bang ba Jehova ba ka ’nang ba botsa potso e tšoanang le eo Morena Davida a ileng a e botsa Jehova ha a ne a re: “Ke tla beha khanyetso moeeng oa ka halelele hakae, mesarelo ka pelong ea ka [letsatsi le letsatsi?]”​—Pes. 13:2.

2. Re tl’o bua ka’ng sehloohong see?

² Le hoja re tšoenyeha ka linako tse ling, ho na le lintho tseo re ka li etsang e le hore re se ke ra tšoenyeha haholo. Sehloohong sena re tla qala pele ka ho bua ka tse ling tsa lintho tse ka etsang hore re tšoenyehe. Ka mor’a moo, re tla bua ka lintho tse tšeletseng tseo re ka li etsang tse tla thusa hore re lule re khobile matšoafo ha re e-na le mathata.

3. Ke lintho life tse re tšoenyang, hona na re ka khona ho li qoba?

³ Ho na le lintho tse ling tse ka re nyahamisang tseo re se nang matla a feletseng holim’a tsona. Mohlala, re ke ke ra khona ho laola litšenyehelo tsa lijo, liphahlo le bolulo ha li ntse li nyoloha selemo le selemo kapa hona ho laola makhetlo ao ka ’ona basebetsi-’moho kapa bana bao re kenang sekolo le bona ba ka lekang ho re susumeletsa ho etsa boitšoaro  bo bobe kapa ho se tšepahale. Hape re ke ke ra thibela tlolo ea molao e bang teng moo phelang teng. Re tobana le mathata ana hobane re phela lefatšeng leo ho lona batho ba bangata ba sa pheleng ka melao ea Molimo. Satane, molimo oa lefatše lena oa tseba hore batho ba bang ba tla lumella “matšoenyeho a tsamaiso ena” ho ba khina ho sebeletsa Jehova. (Mat. 13:​22; 1 Joh. 5:​19) Kahoo, ha ho makatse hore ebe lefatše le tletse ka lintho tse ngata tse re tšoenyang.

4. Ho tla etsahala’ng haeba re tšoenyeha haholo ka mathata a rona?

⁴ Re ka tšoenyeha haholo ka mathata a rona hoo re ka hlolehang ho nahana ka lintho tse ling. Mohlala, re ka tšoenyeha ka hore re ke ke ra ba le chelete e lekaneng ho reka lintho tseo re li hlokang kapa re kule le hore re felloe ke mosebetsi kapa re se khone ho sebetsa. Hape re ka tšoenngoa ke hore re ke ke ra tšepahala ha re lekeha ho tlola melao ea Molimo. Haufinyane Satane o tl’o etsa hore batho bao a ba laolang ba hlasele batho ba Molimo, kahoo, re ka ngongoreha ka hore na ka nako eo re tla etsa’ng. Re ka ipotsa, ‘Na ke phoso ho tšoenyeha ka lintho tsee?’

5. Jesu o ne a bolela’ng ha a ne a re: “Khaotsang ho tšoenyeha”?

⁵ Rea tseba hore Jesu o ile a re ho balateli ba hae: “Khaotsang ho tšoenyeha.” (Mat. 6:​25) Empa na Jesu o ne a bolela hore ha rea lokela ho tšoenyeha ho hang? Qha! Ho feta moo, bahlanka ba bang ba Jehova ba nakong e fetileng, ba ile ba sebetsana le ho tšoenyeha empa Jehova ha aa ka a ba lahla. * (1 Mar. 19:4; Pes. 6:3) Ha e le hantle, Jesu o ne a re thoba maikutlo. O ne a sa batle ha re tšoenyeha haholo ka lintho tseo re li hlokang hoo li ka re sitisang ho sebeletsa Jehova. Kahoo, re ka etsa’ng ha re ikutloa ha re nyahame?​—Sheba lebokose le reng “ U ka Etsa’ng?”

6. Ho ea ka Bafilipi 4:​6, 7, ke’ng e ka re thusang hore re se ke ra tšoenyeha?

⁶ (1) Rapela khafetsa. Haeba u tšoenyehile ka mathata a hao, u ka rapela Jehova hore a u thuse. (1 Pet. 5:7) Ha lithapelo tsa hao li arajoa, u tla fumana “khotso ea Molimo e fetang monahano oohle” oa motho. (Bala Bafilipi 4:​6, 7.) Jehova o tla u fa khotso eo ka matla a moea oa hae o halalelang.​—Bagal. 5:22.

7. Ha re rapela Jehova, re lokela ho hopola eng?

⁷ Ha u bua le Jehova, mo phetlele sefuba. Toba taba. Mo bolelle bothata ba hao u be u mo hlalosetse tsela eo u ikutloang ka eona. Haeba ho bonahala eka ho na le mokhoa oa hore u sebetsane le bothata boo, mo kope hore a u fe bohlale le matla a hore u etse joalo. Haeba bothata boo bo le ka holimo ho matla a hao, kopa Jehova hore a u thuse u se ke oa tšoenyeha le ho khathatseha ka taba eo haholo. Ha u toba taba ha u rapela, u tla bona ka tsela e hlakileng hore na Jehova a arabela lithapelo tsa hao joang. Haeba Jehova a sa arabe lithapelo tsa rona hang-hang, re se ke ra tlohela ho rapela. Jehova o batla hore re tobe taba ha re bua le eena le hore re tsoele pele ho phehella thapelong.​—Luka 11:​8-10.

8. Ke’ng hape eo re lokela ho e hopola ha re rapela?

⁸ Nakong eo u lahlelang matšoenyeho a hao ho Jehova ka thapelo, etsa bonnete ba hore u mo lebohe. Le ha re e-na le mathata a boima, ke habohlokoa hore re nahane ka lintho tse ntle tseo re nang le tsona. Haeba ka  matsatsi a mang u sa khone ho bolella Jehova hore na u ikutloa joang, u hopole hore a ka araba thapelo ea hao le ha u ka re feela ‘Ke kopa o nthuse.’​—2 Likron. 18:​31; Bar. 8:​26.

9. Re lokela ho etsa’ng ha re tšohile?

⁹ (2) Itšetlehe ka bohlale ba Jehova eseng ba hao. Mehleng ea Esaia, batho ba Juda ba ne ba tšaba hore Baassyria ba tla ba hlasela. Bajuda ba ne ba sa batle ho hloloa ke Baassyria eaba ba kopa thuso Egepeta. (Esa. 30:​1, 2) Jehova o ile a ba lemosa hore ho tšepa Baegepeta ho ka ba ntša kotsi. (Esa. 30:​7, 12, 13) Jehova o ile a re Esaia a bolelle Bajuda hore na ba ka sireletseha joang. O ile a re: “Matla a lona e tla ba ho lula le sa khathatseha ’me le e na le tšepo” ho Jehova.​—Esa. 30:​15b.

10. Ke maemong afe ao re ka bontšang hore re tšepa Jehova?

¹⁰ Re ka bontša joang hore re tšepa Jehova? Nahana ka mehlala ena. A re re u fumana mosebetsi o patalang hantle empa joale u tl’o lokela ho sebetsa lihora tse ngata hape le nako ea ho sebeletsa Jehova e tl’o ameha. Kapa mohlomong mosebetsi-’moho le uena o bontša maikutlo a lerato ho uena empa bothata ke hore ha se Paki ea Jehova. Kapa a re re mong ka uena u o beha bothateng u re ho uena: “Pakeng tsa ka le Molimo, u khetha mang?” Maemong ana, ho ka ’na ha e-ba thata ho etsa qeto empa Jehova a ka u thusa hore u etse qeto e nepahetseng. (Mat. 6:​33; 10:​37; 1 Bakor. 7:​39) Potso ke hore, na u tla latela tataiso ea hae u be u e sebelise?

11. Ke litlaleho life tsa Bibele tseo re lokelang ho li bala e le hore re se ke ra tšoha ha ba bang ba re hanyetsa?

¹¹ (3) Ithute mehlaleng e metle le e mebe. Bibele e na le litlaleho tse ngata tse bontšang bohlokoa ba ho lula re khobile matšoafo ’me re tšepile Jehova. Ha u ntse u bala litlaleho tsena, nahana hore na ke’ng e ileng ea thusa bahlanka ba Molimo hore ba lule ba khobile matšoafo le ha ba ne ba tobane le likhanyetso tse boima. Ka mohlala, baapostola ha baa ka ba tšoha ha lekhotla le phahameng la Bajuda le ne le ba laela hore ba khaotse ho bua ka Jesu. Ho e-na le hoo, ka sebete ba ile ba re: “Re tla mamela Molimo e le ’musi ho e na le batho.” (Lik. 5:​29) Le ka mor’a hore ba shapuoe, ha baa ka ba tlakasela. Hobane’ng? Hobane ba ne ba tseba hore Jehova o tla ba thusa. Ba ne ba mo thabisitse. Kahoo, ba ile ba tsoela pele ho bolela ka Jesu. (Lik. 5:​40-42) Ka tsela e tšoanang, Setefane ha a tjamelane le ho bolaoa, o ile a lula a e-na le khotso le khutso hoo sefahleho sa hae se neng “se le joaloka sefahleho sa lengeloi.” (Lik. 6:​12-15) Hobane’ng? Hobane o ne a kholisehile hore o thabisitse Jehova.

12. 1 Petrose 3:​14 le 4:​14, e re ke hobane’ng ha re thaba ha re hlorisoa?

¹² Baapostola ba ne ba e-na le bopaki bo hlakileng ba hore Jehova o na le bona. O ne a ba file matla a ho etsa mehlolo. (Lik. 5:​12-16; 6:8) Rona ha re na matla a ho etsa mehlolo mehleng ena. Ho ntse ho le joalo, ka lerato Jehova o sebelisa Bibele ho re kholisa hore ha re utloa bohloko ka lebaka la ho loka, rea mo thabisa hape moea oa hae o tla ba le rona. (Bala 1 Petrose 3:​14; 4:​14.) Kahoo, ho e-na le hore re lule re nahana ka hore na re tla etsa’ng ha re hlorisoa ka sehloho nakong e tlang, re lokela ho nahana haholo ka hore na re tlameha ho etsa’ng hona joale ho matlafatsa kholiseho eo re nang le eona ea hore Jehova o tla re tšehetsa le ho re pholosa nakong e tlang. Joaloka barutuoa ba pele, re tlameha ho tšepa mantsoe a Jesu a reng: “Ke tla le fa melomo le bohlale, tseo bahanyetsi bohle ba lona ba ke keng ba khona ho li hanyetsa  kapa ho li phehisa.” Jesu o ile a re kholisa a re: “Le tla rua meea ea lona ka ho mamella ha lona.” (Luka 21:​12-19) Hape, u se ke oa lebala hore Jehova o lula a hopola le lintho tse nyenyane feela ka bahlanka ba hae ba shoang ba tšepahala. Ka lebaka leo o tla ba tsosa.

13. Re ka rua molemo ofe haeba re ithuta ka ba hlolehileng ho tšepa Jehova?

¹³ Re ka boela ra ithuta mehlaleng ea batho ba sa kang ba khoba matšoafo le ho tšepa Jehova. Ho ithuta ka mehlala eo ho tla re thusa hore re se ke ra etsa liphoso tseo ba li entseng. Mohlala, ha Morena Asa a sa tsoa qala ho busa Juda o ile a itšetleha ka Jehova ha lebotho le leholo la sesole le tl’o mo hlasela ’me Jehova o ile a mo thusa hore a le hlole. (2 Likron. 14:​9-12) Empa hamorao ha lebotho le lenyenyane la Morena Baasha oa Iseraele le mo hlasela, Asa o ile a patala sesole sa Syria hore se mo thuse ho e-na le hore a kope thuso ho Jehova joaloka pele. (2 Likron. 16:​1-3) Le ha a se a le liphateng tse chesang a kulela lefu, ha aa ka a tšepa hore Jehova o tla mo thusa.​—2 Likron. 16:12.

14. Re ithuta’ng liphosong tsa Asa?

¹⁴ Qalong, ha Asa a ne a e-na le mathata o ile a kopa Jehova hore a mo thuse. Empa hamorao, ha aa ka a kopa thuso ho Jehova eaba o ikhethela ho etsa liqeto a le mong. Ka tsela e itseng, ho ne ho bonahala eka leqheka la Asa la ho kopa thuso ho Basyria le ne le tla sebetsa. Empa khotso ea Bajuda e ile ea e-ba ea nakoana. Jehova o ile a bolella Asa a sebelisa moprofeta oa hae a re: “Kahobane u itšetlehile ka morena oa Syria ’me ha oa ka oa itšetleha ka Jehova Molimo oa hao, ka lebaka leo lebotho la sesole la morena oa Syria le phonyohile letsohong la hao.” (2 Likron. 16:7) Re lokela ho hlokomela hore re se ke ra itšepa ho tlola ha re sebetsana le litaba tsa rona empa re kope tataiso ea Jehova ka Lentsoeng la hae. Esita le haeba re tobane le boemo ba tšohanyetso, re lokela ho khoba matšoafo le ho itšetleha ka Jehova ’me o tla re thusa hore re atlehe.

15. Re ka ’na ra etsa’ng ha re ntse re ithuta Bibele?

¹⁵ (4) Tšoara litemana tsa Bibele ka hlooho. Haeba u fumana litemana tsa Bibele tse bontšang bohlokoa ba hore u lule u khobile matšoafo, leka ho li tšoara ka hlooho. E le hore u li tšoare ka hlooho, u ka li balla holimo, oa li ngola fatše kapa oa khutlela ho tsona hangata. Joshua o ile a laeloa hore nako le nako a bale buka ea Molao ka lentsoe le tlaase e le hore a tle a etse lintho ka bohlale. Lintho tseo a neng a li bala li ne li mo thusa hore a se ke a tšoha empa a be sebete ha a tataisa batho ba Jehova. (Josh. 1:​8, 9) Litemana tse ngata tse hlahang ka Bibeleng li ka u thusa hore u khobe matšoafo ha u tobane le maemo a nyahamisang kapa a tšosang.​—Pes. 27:​1-3; Liprov. 3:​25, 26.

16. Jehova o sebelisa Bakreste-’moho le rona joang e le hore re mo tšepe maemong ’ohle?

¹⁶ (5) Qeta nako e ngata le bahlanka ba Molimo. Jehova o sebelisa Bakreste-’moho le rona ho re thusa hore re mo tšepe maemong ’ohle. Ha re le libokeng, re rua molemo lipuong tse fanoang, likarabong le meqoqong e khothatsang eo re bang le eona le Bakreste-’moho le rona. (Baheb. 10:​24, 25) Re ka khothala haholo haeba re bua le Bakreste-’moho le rona bao re ba tšepang ka mathata a rona. Mantsoe a monate a tsoang ho motsoalle oa hao a ka u thusa hore u se ke oa nyahama haholo.​—Liprov. 12:25.

17. Ho ea ka Baheberu 6:​19, ho ba le tšepo ka ’Muso oa Molimo ho ka re thusa joang hore re be le matla ha re e-na le mathata?

¹⁷ (6) Lula u matlafatsa tšepo ea hao. Tšepo  eo re nang le eona ka ’Muso oa Molimo e tšoana le “ankora bakeng sa moea” ho sa tsotellehe mathata ao re kopanang le ’ona kapa menahano e re nyahamisang. (Bala Baheberu. 6:​19.) Nahanisisa ka tšepiso eo Jehova a re fileng eona ea ha ho tla be ho se na letho leo re tšoenyehang ka lona. (Esa. 65:​17) Nahana u se u phela lefatšeng le lecha ’me ho se ho se na lintho tse bohloko le tse tšoenyang. (Mik. 4:4) U tla boela u matlafatse tšepo ea hao ha u bolella batho ba bang ka eona. Etsa sohle seo u ka se khonang ho ruta batho Bibele le ho etsa barutuoa. Haeba u etsa joalo, u tla ba le “kholiseho e feletseng ea tšepo ho fihlela bofelong.”​—Baheb. 6:11.

18. Ho tla etsahala’ng nakong e tlang, hona re tla etsa’ng?

¹⁸ Ha lefatše lena le ntse le e-ea bofelong, re tla ba le mathata a mangata a ka etsang hore re tšoenyehe. Temana ea rona ea selemo ea 2021 e re thusa hore re tobane le mathata ao re khobile matšoafo re sa tšepa matla a rona empa re tšepile Jehova. Selemong sena, a re bontšeng ka liketso hore re na le tumelo tšepisong ena ea Jehova e reng: “Matla a lona e tla ba ho lula le sa khathatseha ’me le e na le tšepo.”​—Esa. 30:15.