SEBAKENG se seng moo ho bolokoang lintho tsa khale koana Jerusalema (Bible Lands) ho na le lejoe le nang le mongolo o ngotsoeng lilemong tsa bo-600 ho ea ho tsa bo-700 pele ho mehla ea Kreste. Lejoe leo le ile la fumanoa lebitleng la lehaha le haufi le Hebrone, Iseraele. Mongolo oo o re: “Ho rohakoe Hagaf mora oa Hagav ke Yahweh Sabaot.” Mongolo oo o lumellana le Bibele joang? O bontša hore lebitso la Jehova le neng le ngoloa ka YHWH mangolong a Seheberu, le ne le tsebahala ebile le sebelisoa letsatsi le letsatsi mehleng eo. Ha e le hantle, mengolo e meng e ngotsoeng mahaheng a mabitla, e bontša hore ho na le batho ba neng ba sebelisa mahaha ao e le sebaka sa ho kopana le ho ipata ’me hangata ba ne ba ngola lebitso la Molimo maboteng ho akarelletsa le mabitso a batho a nang le moelelo oa lebitso la Molimo.

Ha Dr Rachel Nabulsi oa univesithi ea Georgia a bua ka mengolo ena o ile a re: “Ho sebelisoa ha lebitso YHWH khafetsa ke ntho ea bohlokoa. . . . Mengolo eo e bontša kamoo lebitso YHWH le neng le le bohlokoa kateng ho Baiseraele le Bajuda.” Taba ena e lumellana le Bibele moo lebitso la Molimo YHWH le hlahang ka makhetlo a mangata ka mangolong a Seheberu. Hangata mabitso a batho a ne a akarelletsa lebitso la Molimo.

Mantsoe “Yahweh Sabaot” a ngotsoeng lejoeng, a bolela “Jehova oa mabotho.” Ho bonahala hore ha se lebitso la Molimo feela le neng le sebelisoa empa ho ne ho boetse ho sebelisoa le litlotla tse kang, “Jehova oa mabotho.” Taba ena e boetse e lumellana le poleloana e ka Bibeleng e reng, “Jehova oa mabotho” e hlahang ka makhetlo a fetang 250 ka mangolong a Seheberu, haholo-holo bukeng ea Esaia, Jeremia le Zakaria.