1. Re ka mamela Molimo le babusi ba lefatše joang?

BIBELE e re re lokela ho mamela babusi ba lefatše, empa e boetse e re re lokela ho mamela Molimo ka linako tsohle. (Liketso 5:29; Tite 3:1) Re ka etsa see joang? Jesu o ile a fana ka molao-motheo o re thusang ho tseba hore na re lokela ho mamela mang. O ile a re re lokela ‘ho lefa Cesare lintho tsa Cesare, empa re lefe Molimo lintho tsa Molimo.’ ^[1] (Sheba ntlha e qetellong ea sehlooho.) (Matheu 22:21) Re lefa “Cesare lintho tsa Cesare” ha re mamela melao ea naha, re hlompha ba boholong pusong re bile re lefa lekhetho. (Baroma 13:7) Empa ha ba boholong ba re laela ho etsa ntho eo Molimo a sa e rateng, ka boikokobetso re hana ho e etsa.

2. Re bontša joang hore ha re kenelle lipolotiking tsa lefatše?

² Tsela e ’ngoe eo re lefang “Molimo lintho tsa Molimo” ka eona, ke ka ho se kenelle lipolotiking tsa lefatše lena. Ha re nke lehlakore ho tsona. (Esaia 2:4) Kaha ke Jehova ea lumeletseng mebuso ea batho hore e buse, ha re e hanyetse.  Re boetse ha re kenelle nthong leha e le efe e nang le bochaba. (Baroma 13:1, 2) Ha re leke ho fetola mebuso kapa ho susumetsa bo-ralipolotiki, ebile ha re ee likhethong kapa hona ho ba bo-nkhetheng.

3. Ke hobane’ng ha re sa nke lehlakore?

³ Bibele e fana ka mabaka a mangata a hore na ke hobane’ng ha Molimo a re re se ke ra nka lehlakore. Lebaka le leng ke hore re etsisa Jesu eo ‘e neng e se karolo ea lefatše.’ Ha ho mohla a kileng a kenella lipolotiking kapa lintoeng. (Johanne 6:15; 17:16) Lebaka le leng ke hore re tšehetsa ’Muso oa Molimo. Kaha ha re tšehetse mebuso ea batho, re khona ho bua ka bolokolohi hore ’Muso oa Molimo ke oona feela o tla rarolla mathata a batho. Baeta-pele ba bolumeli ba bohata ba nka lehlakore lipolotiking, ’me sena se baka likarohano. Empa kaha rōna ha re nke lehlakore, sena se etsa hore re be bonngoeng le bara le barali babo rōna lefatšeng ka bophara.—1 Petrose 2:17.

4. (a) Ke hobane’ng ha re ka lebella hore ha nako e ntse e ea ho tla ba thata le ho feta ho lula re sa nke lehlakore? (b) Ke hobane’ng ha re lokela ho itlhomella esale joale ho lula re sa nke lehlakore?

⁴ Mohlomong re lula libakeng tseo batho ba se nang taba le hore na re nka lehlakore lipolotiking kapa che. Empa ha bofelo ba tsamaiso ena ea Satane bo ntse bo atamela, ho tla ba thata le ho feta hore re lule re sa nke lehlakore. Batho ba bangata kajeno ke “ba sa bulehelang tumellano” le “ba hlooho li thata,” ’me boemo bona bo tla mpefala le ho feta. (2 Timothea 3:3, 4) Barab’abo rōna ba bang ba se ba ntse ba angoa ke liphetoho tsa lipolotiki tse etsahalang linaheng tsa habo bona. Ke kahoo hona joale re lokelang ho itlhomella e le hore re tle re lule re sa nke lehlakore esita le maemong a thata joalo. A re tšohleng lintlha tse ’nè tse ka re thusang tabeng ena.

5. Jehova o ikutloa joang ka mebuso ea lipolotiki?

⁵ Tsela e ’ngoe eo re ka itlhomellang ka eona hona joale e le hore re tle re lule re sa nke lehlakore, ke ka hore re nahane kamoo Jehova a ikutloang kateng ka mebuso ea batho. Jehova o ne a sa bōpela batho hore ba buse ba bang. (Jeremia 10:23) O nka hore bohle ba tsoa lelapeng le le leng. Empa mebuso ea lefatše e arotse batho ka bochaba. Esita le haeba mebuso e itseng e tsamaisa lintho hantle, e ke ke ea khona ho rarolla mathata ’ohle a batho. Ho feta moo, ke lira tsa ’Muso oa Molimo o qalileng ho busa ka 1914. Haufinyane ’Muso ona o tla felisa mebuso eohle ea lipolotiki.—Bala Pesaleme ea 2:2, 7-9.

6. Re lokela ho tšoara ba boholong pusong joang?

⁶ Molimo o lumeletse batho hore ba buse ba bang e le hore ho be le khotso le taolo. Sena se re nolofalletsa ho bolela  litaba tse molemo tsa ’Muso oa Molimo. (Baroma 13:3, 4) Molimo o boetse o re laela hore re rapelle ba boholong, e le hore re ka mo sebeletsa ka bolokolohi. (1 Timothea 2:1, 2) Ha re tšoaroa ka leeme, re ka ’na ra kōpa thuso ho ba boholong pusong. Ke sona seo Pauluse a ileng a se etsa. (Liketso 25:11) Le hoja Bibele e re Satane o laola mebuso ea batho, ha ho mohla e reng o laola ba ikarabellang pusong. (Luka 4:5, 6) Kahoo, ha rea lokela ho fana ka maikutlo a hore batho ba itseng ba boholong pusong ba laoloa ke Diabolose. Bibele e re ha rea lokela ho nyefola ba bang.—Tite 3:1, 2.

7. Re lokela ho qoba ho ba le boikutlo bofe?

⁷ Re mamela Molimo ka hore re se ke ra tšehetsa ralipolotiki ea itseng kapa mokha o itseng oa lipolotiki, esita le haeba o na le maano a ka re tsoelang molemo. Ka linako tse ling, ho ka ’na ha e-ba thata ho etsa sena. Ka mohlala, nka hore batho ba fetohela ’muso o bakelang batho mathata a mangata, ho akarelletsa le Lipaki Tsa Jehova. Ke ’nete hore u ke ke ua ikopanya le marabele ao, empa na u tla nka hore a nepile ’me u lakatse eka a ka atleha? (Baefese 2:2) Haeba re batla ho lula re sa nke lehlakore, ha rea lokela ho ba le boikutlo ba hore lehlakore le itseng le molemo ho feta le leng. Re tla bontša sena ka liketso le ka lipuo.

8. Re ka etsa’ng hore re “be seli” leha ho le joalo re “hloke molato” ha re tobana le teko ea ho nka lehlakore?

⁸ Tsela e ’ngoe hape eo re ka lulang re sa nke lehlakore ka eona, ke ka hore ‘re be seli joaloka linoha ’me leha ho le joalo re hloke molato joaloka maeba.’ (Bala Matheu 10:16, 17.) Haeba re le “seli,” re tla nahana esale pele ka maemo a thata ao re ka ’nang ra tobana le ’ona. ’Me e le hore re “hloke molato,” ha re na ho nka lehlakore ha re iphumana re le maemong ao. A re tšohleng a mang a maemo ao le hore na re ka etsa’ng, e le hore re se ke ra nka lehlakore.

9. Re lokela ho qoba eng ha re buisana le batho?

⁹ Moqoqong. Re lokela ho ba hlokolosi ha batho ba qala ba bua ka litaba tsa lipolotiki. Ka mohlala, ha re buisana le motho ka ’Muso oa Molimo, ha rea lokela ho tlatsana kapa hona ho hanyetsana le eena ka tsela eo a ikutloang ka eona ka mokha o itseng kapa moeta-pele ea itseng. Ho e-na le ho mo bolella ka boiteko boo batho ba bo etsang ho rarolla mathata, u lokela ho mo bontša hore na Bibele e re ’Muso oa Molimo o tla a rarolla joang. Haeba batho ba ngangisana ka lintho tse kang ho nyalana ha batho ba bong bo tšoanang kapa ho ntšoa ha mpa, ba bolelle seo Lentsoe la Molimo le se buang le hore u leka ho latela seo bophelong ba hao. Haeba motho a nahana hore melao e itseng e lokela ho felisoa kapa ho fetoloa, ha re kenelle tabeng eo, ebile ha re leke ho mo fetola maikutlo.

10. Re lokela ho etsa’ng e le hore re lule re sa nke lehlakore ha re shebeletse kapa re mametse litlaleho mecheng ea phatlalatso?

¹⁰ Mecha ea phatlalatso. Ka linako tse ling, taba e tlalehoa ka tsela e tšehetsang lehlakore le itseng. Sena se atisa ho etsahala linaheng tseo mecha ea phatlalatso e laoloang ke ’muso. Haeba mekhatlo ea litaba kapa batlalehi ba  litaba ba tlaleha taba ka tsela e tšehetsang lehlakore le itseng, re lokela ho ba hlokolosi hore re se ke ra qala ho nahana joaloka bona. Ka mohlala, ipotse, ‘Na ke thabela ho mamela motlalehi ea itseng oa litaba hobane ke lumellana le seo a se buang ka lipolotiki?’ E le hore u lule u sa nke lehlakore, qoba ho shebella kapa ho bala litlaleho tse tšehetsang mokha o itseng oa lipolotiki. Ho e-na le hoo, leka ho fumana tse sa nkeng lehlakore. Kamehla u lokela ho bapisa seo u se utloang le “mantsoe a phelisang” a ka Bibeleng.—2 Timothea 1:13.

11. Ke hobane’ng ha ho rata maruo ho ka ’na ha re thatafalletsa ho lula re sa nke lehlakore?

¹¹ Ho rata maruo. Haeba re nkela chelete le maruo holimo, re ka ’na ra thatafalloa ho lula re sa nke lehlakore. Ka mor’a 1970, barab’abo rōna ba bangata ba Malawi ba ile ba tlameha ho tela thepa eohle ea bona, kaha ba ne ba hana ho kena mokheng oa lipolotiki. Empa ka masoabi ba bang ba ne ba sa batle ho arohana le maruo a bona. Morali’abo rōna e mong ea bitsoang Ruth o re, “Ba bang ba ile ba ea palehong le rōna, empa hamorao ba ingolisa mokheng oa lipolotiki, ’me ba khutlela malapeng a bona hobane ba sa batle ho phela ka thata likampong tsa baphaphathehi.” Leha ho le joalo, bahlanka ba bangata ba Molimo ha ba etse seo. Ba lula ba sa nke lehlakore, esita le haeba seo se etsa hore ba hloke chelete kapa ba lahleheloe ke thepa ea bona.—Baheberu 10:34.

12, 13. (a) Jehova o nka batho joang? (b) Re ka bona ka eng haeba re e-na le bochaba?

¹² Boikhohomoso. Batho ba atisa ho ikotla sefuba ka morabe, setso, meetlo, libaka kapa linaha tsa habo bona. Empa Jehova ha a nke hore batho ba merabe e meng ba phahametse ba bang. Kaofela rea tšoana ho eena. Ke ’nete hore Jehova o re bōpile re sa tšoane ’me re ka thabela seo. Ha a batle hore re lahle setso sa rōna. Hape ha a batle hore re nke hore setso sa rōna se phahametse sa ba bang.—Baroma 10:12.

¹³ Ha rea lokela ho rata naha ea habo rōna haholo hoo re nkang hore e phahametse tse ling. Ha re ikutloa ka tsela eo, re ka ’na ra thatafalloa ho lula re sa nke lehlakore. Ho ile ha e-ba joalo le mehleng ea baapostola. Bakreste ba bang ba Baheberu ba ile ba tšoara bahlolohali ba Bagerike ka leeme. (Liketso 6:1) Re ka bona ka eng haeba re qala ho ikhohomosa? Ha mora kapa morali oabo rōna ea tsoang sebakeng se seng a fana ka tlhahiso, na u potlakela ho re, ‘Re etsa lintho ka tsela e fapaneng mona,’ ebe ua e hana? Haeba ho joalo, hopola keletso ena ea bohlokoa: ‘Ka ho ikokobetsa kelellong nka hore ba bang ba u phahametse.’—Bafilipi 2:3.

14. Ho rapela Jehova ho ka re tsoela molemo joang, hona ho na le mohlala ofe ka Bibeleng o bontšang see?

¹⁴ Tsela e ’ngoe hape eo re ka lulang re  sa nke lehlakore ka eona, ke ka hore re itšetlehe ka Jehova. Mo kōpe hore a u fe moea o halalelang, kaha sena se tla u thusa hore u be le mamello le boitšoaro. Ka tsela ena u tla khona ho tiisetsa ha ba boholong pusong ba etsa lintho ka bolotsana kapa ka leeme. Mo kōpe hore a u fe bohlale e le hore u lemohe boemo bo ka ’nang ba u thatafalletsa ho lula u sa nke lehlakore. Mo rapele hore a u thuse ho etsa se nepahetseng boemong boo. (Jakobo 1:5) U ka ’na ua koalloa teronkong kapa ua hlorisoa ka tsela e itseng hobane u tšepahala ho eena. Ke kahoo u lokelang ho rapela u mo kōpe hore a u thuse u hlalosetse ba boholong ka tsela e hlakileng hore na ke hobane’ng ha u sa nke lehlakore. U ka kholiseha hore Jehova o tla u thusa ho mamella.—Bala Liketso 4:27-31.

15. Bibele e ka re thusa joang hore re lule re sa nke lehlakore? (Sheba le lebokose le reng “ Lentsoe la Molimo le Ile la ba Matlafatsa.”)

¹⁵ Jehova o re file Bibele hore e re matlafatse. Thuisa ka litemana tse tla u thusa hore u lule u sa nke lehlakore. Leka ho li tšoara ka hlooho, kaha li tla u thusa ha ho ka etsahala hore ebe ha ua tšoara Bibele. Bibele e ka boetse ea tiisa tumelo ea hao litšepisong tsa Molimo. Re lokela ho ba le tumelo e le hore re mamelle mahloriso. (Baroma 8:25) Khetha litemana tse hlalosang lintho tseo ka ho khetheha u ka thabelang ho li etsa lefatšeng le lecha, ’me u ipone u le moo.

16, 17. Re ithuta’ng mohlaleng oa bahlanka ba tšepahalang ba Molimo ba ileng ba lula ba sa nke lehlakore? (Sheba setšoantšo se qalong.)

¹⁶ Ho nahana ka mehlala ea bahlanka ba tšepahalang ba Jehova le hona ho ka re thusa hore re lule re sa nke lehlakore. Ba bangata ba tlalehiloeng ka Bibeleng ba ne ba le sebete, ’me ba ile ba etsa liqeto tse ba thusitseng hore ba lule ba sa nke lehlakore. Nahana ka Shadrake, Meshake le Abednego, ba ileng ba hana  ho khumamela setšoantšo se emelang ’muso oa Babylona. (Bala Daniele 3:16-18.) Tlaleho ena ea Bibele e thusa Lipaki tse ngata kajeno hore li be sebete ’me li hane ho inamela folakha ea naha ea habo tsona. Jesu ha aa ka a kenella lipolotiking kapa litabeng tse ling tse arolang batho. O ne a tseba hore mohlala oa hae o motle o tla thusa balateli ba hae. O ile a re: “Le be sebete! Ke hlōtse lefatše.”—Johanne 16:33.

¹⁷ Barab’abo rōna ba bangata kajeno ha ba nke lehlakore litabeng tsa lefatše. Ba bang ba ’nile ba hlorisoa, ba bang ba kenngoa teronkong ’me ba bang ba bolaoa hobane ba tšepahala ho Jehova. Mohlala oa bona o re thusa hore le rōna re be sebete. Mor’abo rōna e mong oa Turkey o ile a re: “Mor’abo rōna Franz Reiter ea mocha lilemong o ile a bolaoa hobane a hana ho kena sesoleng sa Hitler. Lengolo leo a ileng a le ngolla ’mè oa hae bosiung ba pele a bolaoa le ile la bontša hore o na le tumelo e matla ho Jehova le hore oa mo tšepa, ’me ke ne ke batla ho mo etsisa ha nka tobana le teko e joalo.” ^[2]—Sheba ntlha e qetellong ea sehlooho.

18, 19. (a) Ba bang ka phuthehong ba ka u thusa joang hore u lule u sa nke lehlakore? (b) U ikemiselitse ho etsa’ng?

¹⁸ Balumeli-’moho le uena le bona ba ka u thusa hore u lule u sa nke lehlakore. Tsebisa baholo ha u le boemong bo thata. Ba ka u fa keletso e tsoang ka Bibeleng. Ba bang ka phuthehong le bona ba ka u thusa haeba ba tseba bothata ba hao, ’me ba ka u khothatsa. Ba kōpe hore ba u rapelle. Empa le rōna re lokela ho ba tšehetsa le ho ba rapella. (Matheu 7:12) U ka fumana mabitso a balumeli-’moho le rōna ba teronkong, ho jw.org/st tlas’a LITABA > LITABA TSA MOLAO. Khetha mabitso a seng makae, ’me u kōpe Jehova hore a thuse bara le barali bana babo rōna hore ba be sebete ’me ba lule ba tšepahala ho eena.—Baefese 6:19, 20.

¹⁹ Ha re ntse re atamela bofelong ba tsamaiso ena, re ka lebella hore mebuso e tla tsoela pele ho re hatella hore re nke lehlakore. Ke kahoo re lokelang ho itlhomella esale joale e le hore re lule re sa nke lehlakore lefatšeng lena le arohaneng!