1, 2. (a) Ke ka tsela efe lefatše lee le tšoanang le senokoane se ahloletsoeng lefu? (Sheba setšoantšo se qalong.) (b) Batho ba tla ikutloa joang ha lefatše lee le khopo le felisoa?

NAHANA ka monna oa senokoane ea ahloletsoeng lefu. Balebeli ba teronko ba mo ntša ka seleng ea hae ’me ba mo isa moo a e’o bolaeloa teng. Le hoja monna eo a shebahala a phetse hantle, o tl’o shoa ka mor’a nako e seng kae.

² Ka tsela e itseng, lefatše lena le laoloang ke Satane, le tšoana le monna eo ea ahloletsoeng lefu. Ke khale le ahlotsoe ’me le haufi le ho felisoa. Bibele e re: “Lefatše lea feta.” (1 Joh. 2:17) Re kholisehile hore lefatše lena le tl’o felisoa. Leha ho le joalo, ho na le phapang e kholo pakeng tsa ho felisoa ha lefatše lena le ho bolaoa ha monna eo re buileng ka eena. Tabeng ea monna enoa, batho ba ka ’na ba re ha aa ahloloa ka toka kapa ba mo buella hore a se ke a bolaoa. Ha e le lefatše lena lona kahlolo ea lona e entsoe ke ’Musi oa Bokahohle ea nang le toka. (Deut. 32:4) Kahoo lefatše lena le tla felisoa ebile ha ho na motho ea tla re ha ho oa etsoa toka ha le felisoa. Ha le qeta ho felisoa motho e mong le e mong o tla lumela hore Molimo o le ahlotse ka toka. Batho bohle ba tla imoloha.

3. ’Muso oa Molimo o tla felisa lintho life tse ’nè?

 ³ Ke lintho life tse tla felisoa le “lefatše” lee ‘le fetang’? Lintho tse ngata tseo batho ba nahanang hore li tla ba teng ka ho sa feleng li tla felisoa. Na tseo ke litaba tse bohloko? Che! Ha e le hantle, ke tsona ‘litaba tse molemo tsa ’Muso.’ (Mat. 24:14) Kahoo, a re bueng ka lintho tse ’nè tse tla felisoa ha ’Muso oa Molimo o tla. Re tla bua ka tse latelang: batho ba khopo, mekhatlo e tletseng bobolu, liketso tse mpe le mahlomola. Ho tsona kaofela re tla hlahloba hore na (1) lintho tsena li re ama joang, (2) Jehova o tla etsa’ng ka tsona le (3) hore na o tla ntlafatsa maemo joang.

4. Batho ba khopo ba re ama ka litsela life?

⁴ Batho ba khopo ba re ama joang? Ka mor’a hore moapostola Pauluse a bolela esale pele hore mehleng ena ho tla ba le “linako tse mahlonoko tseo ho leng thata ho sebetsana le tsona,” o ile a boela a re: “Batho ba khopo le baikhakanyi ba tla tsoela pele ho tloha bobeng ho ea bobeng bo fetisisang.” (2 Tim. 3:1-5, 13) Na mantsoe aa ke ’nete? Boholo ba rona re kile ra sotloa ke batho ba khopo, ba re soma kapa ba re hlasela. Ba bang ha ba pate bokhopo boo ba bo etsang, ha ba bang bona ba etsa eka ke batho ba molemo empa ba le khopo. Le haeba liketso tsa bokhopo ha li e-s’o re ame ka ho toba empa ka tsela e itseng li ntse li re ama. Lintho tse mpe tseo ba li etsang lia re nyarosa. Tsela eo batho ba khopo ba sotlang bana, batho ba holileng, le batho ba sa khoneng ho itšireletsa ka eona e etsa hore re lule re tšohile haholo. Batho ba khopo ba itšoara joaloka liphoofolo ’me ba etsa liketso tsa bodemona. (Jak. 3:15) Litaba tse monate ke hore Lentsoe la Jehova le re fa tšepo ea hore maemo ana a tla felisoa.

5. (a) Batho ba khopo ba sa na le monyetla ofe? (b) Ho tla etsahala’ng ka batho ba khopo ba sa batleng ho fetoha?

⁵ Jehova o tla etsa’ng? Hona joale Jehova o file batho ba khopo monyetla oa hore ba fetohe. (Esa. 55:7) Jehova o se a ntse qeto ea hore o tla felisa batho bohle ba khopo empa ha a e-s’o ba ahlole ka bomong. Ho tla etsahala’ng ka batho ba hanang ho fetoha, ba tšehetsang tsamaiso ee ho fihlela matšoenyeho a maholo a qala? Jehova o tšepisitse hore o tla felisa batho ba khopo. (Bala Pesaleme ea 37:10.) Batho ba khopo ba ka ’na ba nahana hore ba tla pholoha kahlolo eo hobane ba pata liketso tse mpe tseo ba li etsang ’me ha ho mohla ba fumanang kahlolo e ba lokelang. (Jobo 21:7, 9) Leha ho le joalo, Bibele e re hopotsa sena ka Molimo: “Mahlo a hae a holim’a litsela tsa motho. O bona mehato eohle ea hae. Ha ho botšo kapa moriti o lefifi. Bakeng sa hore ba tloaetseng ho etsa se kotsi ba ipate moo.” (Jobo 34:21, 22) Ha ho na motho ea ka ipatelang Jehova. Ha ho na lefifi le ka sitisang Jehova ho bona ntho leha e le efe. Ka mor’a Armagedone, re tla sheba moo batho ba khopo ba neng ba lula teng ’me re ke ke ra ba bona. Ba tla be ba le sieo, ka ho sa feleng!—Pes. 37:12-15.

6. Ho tla sala batho ba joang lefatšeng, hona ke hobane’ng ha tseo e le litaba monate?

⁶ Ho tla sala batho ba joang lefatšeng? Jehova o fana ka tšepiso ena e khothatsang:  “Ba bonolo ba tla rua lefatše, ka sebele ba tla fumana thabo e phethehileng khotsong e ngata. Ba lokileng ba tla rua lefatše, ba tla lula ho lona ka ho sa feleng.” (Pes. 37:11, 29) “Ba bonolo” le “ba lokileng” ke bo-mang? Batho ba bonolo ke bao ka boikokobetso ba amohelang thuto le tataiso ea Jehova. Ba lokileng ke ba thabelang ho etsa lintho tse lokileng mahlong a Jehova Molimo. Le hoja hona joale batho ba khopo ba le bangata ho feta ba lokileng, lefatšeng le lecha, ba bonolo le ba lokileng e tla ba bona feela ba phelang lefatšeng ka nako eo. Kaofela ha bona ba tla etsa hore lefatše e be paradeise!

7. Mekhatlo e tletseng bobolu e re ama joang?

⁷ Mekhatlo e tletseng bobolu e re ama joang? Boholo ba lintho tse mpe tse etsahalang lefatšeng ha li etsoe ke motho a le mong empa li etsoa ke mekhatlo. Mohlala, nahana ka mekhatlo ea likereke e sa bolelleng batho ’nete ka Molimo ’me e ba susumeletsa hore ba se ke ba tšepa Bibele. Mekhatlo eo e boetse e thetsa batho ka hore na ho tla etsahala’ng ka lefatše. Nahana hape ka mebuso e khothalletsang ntoa ea merabe, e ratang tjotjo, e khethollang batho, e hatellang mafutsana le batho ba sa khoneng ho itšireletsa. Ho na le lifeme tse silafatsang tikoloho ka boomo. Ho boetse ho na le batho ba ruileng haholo ka botsotsi, ha limilione tsa batho li sotleha ke bofutsana. Ntle ho pelaelo, mekhatlo ena e tletseng bobolu ke eona e ikarabellang bakeng sa boholo ba mathata ana a teng lefatšeng.

8. Ho latela Bibele, ho tla etsahala’ng ka mebuso le mekhatlo ea eona e bonahalang eka e tla lula e le teng?

⁸ Jehova o tla etsa’ng? Matšoenyeho a maholo a tla qala ha mebuso ea lipolotiki e fetohela malumeli ’ohle a bohata e leng Babylona e Moholo, eo ka Bibeleng e tšoantšetsoang ke seotsoa. (Tšen. 17:1, 2, 16; 18:1-4) Mekhatlo eo ea bolumeli ba bohata e tla felisoa. Joale ho tla etsahala’ng ka mekhatlo e meng e tletseng bobolu? Bibele e tšoantša mekhatlo ena le lihlekehleke le lithaba hobane e bonahala eka e ke ke ea felisoa. (Bala Tšenolo 6:14.) Leha ho le joalo, Lentsoe la Molimo le re bolella hore mebuso hammoho le mekhatlo ea eona e tla felisoa. Matšoenyeho a maholo a tla fihla sehlohlolong ha ho e-ba le pherekano e kholo mebusong ea lipolotiki le ba e tšehetsang ba bile ba le khahlanong le ’Muso oa Molimo. (Jer. 25:31-33) Ka mor’a moo ho ke ke ha hlola ho e-ba le mekhatlo e etsang bobolu.

9. Ke’ng e re kholisang hore lefatše le lecha le tla hlophiseha?

⁹ Mekhatlo e tletseng bobolu e tla nkeloa sebaka ke’ng? Ka mor’a Armagedone, na ho tla ba le mokhatlo lefatšeng? Bibele e re: “Ho na le maholimo a macha le lefatše le lecha tseo re li letetseng ho ea ka tšepiso ea hae, ’me ho loka ho tla aha ho tsona.” (2 Pet. 3:13) Leholimo le lefatše la khale e leng mebuso e tletseng bobolu le mekhatlo e laoloang ke eona li tla felisoa. Mebuso le mekhatlo eo e tla nkeloa sebaka ke’ng? Mantsoe a reng “maholimo a macha le lefatše le lecha” a bolela hore ho tla ba le ’muso o mocha le bafo ba bacha ba tla busoa ke ’muso oo.  Pusong ea Jesu ho tla etsoa lintho tse thabisang Jehova, eo e leng Molimo oa tlhophiso. (1 Bakor. 14:33) Kahoo ‘lefatšeng le lecha’ ho tla ba le tlhophiso. Ho tla ba le banna ba lokileng ba tla hlokomela lintho. (Pes. 45:16) Ba tla etelloa pele ke Kreste le babusi-’moho le eena ba 144 000. U ka inahanela feela hore na ho tla ba joang ha mekhatlo ena e tletseng bobolu e se e nketsoe sebaka ke mokhatlo o le mong, o momahaneng le o ke keng oa ba le bobolu.

10. Ke liketso life tse mpe tse tloaelehileng moo u lulang, hona li ama uena le lelapa la hao joang?

¹⁰ Liketso tse mpe li re ama joang? Re phela har’a batho ba bangata ba etsang liketso tse mpe. Boitšoaro bo bobe, ho se tšepahale le pefo li tletse hohle lefatšeng. Kahoo batsoali ba bangata ba ikutloa ba thatafalloa ke ho sireletsa bana ba bona liketsong tsena tse mpe. Mekhoa ea boithabiso e se e na le liketso tsena tse mpe ho feta leha e le neng pele ’me sena se etsa hore batho ba se ke ba mamela melao ea Jehova ea boitšoaro. (Esa. 5:20) Bakreste ba ’nete ba leka ho qoba mekhoa ena. Ba leka ka hohle hore ba lule ba tšepahala le hoja ba phela har’a batho ba hlomphollang melao ea Jehova.

11. Re ithuta’ng kahlolong eo Jehova a ileng a e tlisetsa Sodoma le Gomora?

¹¹ Jehova o tla etsa’ng ka batho ba etsang liketso tse mpe? Hopola seo a ileng a se etsa ka batho ba neng ba tloaetse ho etsa liketso tse mpe Sodoma le Gomora. (Bala 2 Petrose 2:6-8.) Monna ea lokileng Lota le lelapa la hae ba ne ba utloa bohloko ha ba bona batho ba etsa liketso tse mpe. Ha Jehova a felisa baahi ba sebaka seo kaofela, o ne a sa felise liketso tse mpe feela empa o ne “a behela batho ba se nang bomolimo mohlala oa lintho tse tlang ho tla.” Joalokaha Jehova a ile a felisa batho bohle ba boitšoaro bo bobe mehleng eo, o tla boela a felise batho ba etsang liketso tse mpe ha a tlisa kahlolo lefatšeng.

12. U lebeletse ho etsa mesebetsi efe lefatšeng la paradeise?

¹² Liketso tse mpe li tla nkeloa sebaka ke’ng? Lefatše la Paradeise le tla tlala ka batho ba etsang mesebetsi e metle. Nahana ka mosebetsi o thabisang oa ho fetola lefatše paradeise kapa oa ho ikahela matlo le ho ahela bana babo rona. Nahana hore na ho tla ba joang ha re amohela batho ba limilione ba tsositsoeng bafung ’me re ba ruta ka Jehova le kamoo a ’nileng a sebelisana le batho kateng. (Esa. 65:21, 22; Lik. 24:15) Re tla thabela ho etsa mesebetsi eo re e ratang e bileng e tlotlisang Jehova!

13. Borabele ba Satane le Adama le Eva bo bakile mahlomola afe?

¹³ Mahlomola a re ama joang? Batho ba khopo, mekhatlo e tletseng bobolu le liketso tse mpe kaofela ha tsona li re bakela mahlomola. Na ho na le motho ea e-s’o angoe ke lintoa, bofutsana, khethollo ea morabe, ho kula kapa lefu? Lintho tsena lia re ama. Li bile teng ka mor’a hore Satane le Adama le Eva ba fetohele Molimo. Hona joale kaofela re angoa ke litla-morao tsa borabele boo.

14. Jehova o tla etsa’ng ka lintho tse bohloko tse re hlahelang? Fana ka mohlala.

 ¹⁴ Jehova o tla etsa’ng ka lintho tse bohloko tse re hlahelang? Nahana ka mehlala ena. Jehova o tšepisa hore o tla felisa lintoa. (Bala Pesaleme ea 46:8, 9.) O tla boela a felise ho kula. (Esa. 33:24) O tla felisa lefu! (Esa. 25:8) A felise le bofutsana. (Pes. 72:12-16) Jehova o tla boela a felise lintho tsohle tse bohloko tse re sulafaletsang bophelo. O tla felisa le “moea” o mobe oa lefatše lena, kaha tšusumetso ea Satane le bademona ba hae e tla be e se e le sieo.—Baef. 2:2.

15. Ke lintho life tse tla felisoa?

¹⁵ Nahana feela ho se ho se na lintoa, ho kula le lefu! Nahana hape ho se ho se na masole, libetsa kapa ntho leha e le efe e re hopotsang lintoa! Nahana ho se ho se na lipetlele, lingaka, baoki, liinshorense tsa bophelo, limmoshara, mabitla le likhoebo tsa mapato. Kaha tlolo ea molao e tla be e felisitsoe, ha ho sa tla ba le lik’hamphani tsa tšireletso, lialamo le mapolesa, ’me mohlomong ha re sa tla hloka le linotlolo. Re ke ke ra hlola re tšoenyeha ka eng kapa eng.

16, 17. (a) Batho ba tla pholoha Armagedone ba tla ikutloa joang? Fana ka mohlala. (b) Re ka etsa’ng e le hore re se ke ra felisoa hammoho le lefatše lee le khopo?

¹⁶ Bophelo bo tla ba joang ha mahlomola a se a le sieo? Ha ho bonolo ho nahana ka seo. Nahana ka mehlala ena. Batho ba lulang pel’a seteishene sa terene ba qetella ba se ba sa utloe lerata le etsoang ke terene. Batho ba lulang pel’a moo ho qhalloang toti teng ba qetella ba se ba sa utloe monko o mobe o tsoang moo. Ka tsela e tšoanang, le rona re phetse lefatšeng lena nako e telele hoo re seng re sa hlokomele hore na lintho tsena li re ama hakae. Empa ha mahlomola ana a felisoa, re tla imoloha e le kannete.

¹⁷ Bophelo bo tla ba joang ha mahlomola a se a le sieo? Pesaleme ea 37:11 e fana ka karabo ha e re: “Ba tla fumana thabo e phethehileng khotsong e ngata.” Na mantsoe ao ha a u khothatse? Ke sona seo Jehova a u batlelang sona. Kahoo, etsa sohle se matleng a hao hore u lule haufi le Jehova Molimo le mokhatlo oa hae mehleng ena ea bofelo. Lula u nahana ka tšepo eo u nang le eona ’me u bolelle ba bang ka eona. (1 Tim. 4:15, 16; 1 Pet. 3:15) Ka tsela eo, u ka kholiseha hore u ke ke oa felisoa hammoho le lefatše lena le seng le ntse le ahlotsoe. Empa u tla lula u thabile ’me u tla phela ka ho sa feleng.