Buka ea Matheu le Luka lia fapana ha li bua ka litaba tsa tsoalo ea Jesu le bophelo ba hae ha e sa le ngoana hobane bangoli ba tsona ba ngotse ka litsela tse sa tšoaneng.

Buka ea Matheu e bua haholo ka Josefa. E hlalosa kamoo Josefa a ileng a ikutloa kateng ha a utloa hore Maria o imme. E boetse e re bolella hore lengeloi le ile la hlalosetsa Josefa torong hore na ho tlile joang hore Maria a ime, eaba Josefa oa utloisisa. (Mat. 1:19-25) Hape, Matheu o re lengeloi le ile la bolella Josefa torong hore a balehele Egepeta, eaba Josefa oa baleha. Hamorao, lengeloi la boela la bolella Josefa torong hore a khutlele Iseraele, eaba Josefa o khutlela teng. Josefa o ile a etsa qeto ea hore a il’o lula Nazaretha le ba lelapa la hae. (Mat. 2:13, 14, 19-23) Likhaolong tse qalang tsa Buka ea Matheu, lebitso la Josefa le hlaha ka makhetlo a robeli, empa la Maria le hlaha ka makhetlo a mane feela.

Buka ea Luka eona e bua haholo ka Maria. E re bolella hore Maria o ile a eteloa ke lengeloi Gabriele, a ea ha Elizabetha, eaba o rorisa Jehova ha a le moo. (Luka 1:26-56) E boetse e re bolella hore na Simeone o ile a re’ng ho Maria ha a mo hlalosetsa lintho tse bohloko tse neng li tla etsahalla Jesu. Ha Josefa le ba lelapa la hae ba etetse tempeleng ha Jesu a le lilemo li 12, Luka o ile a qotsa mantsoe a Maria, eseng a Josefa. Luka a boela a re Maria o ile a nahanisisa ka lintho tsohle tse etsahetseng. (Luka 2:19, 34, 35, 48, 51) Likhaolong tse peli tse qalang tsa Buka ea Luka, lebitso la Maria le hlaha ka makhetlo a 12, empa la Josefa le hlaha ka makhetlo a mararo feela. Kahoo, Buka ea Matheu e bua haholoanyane ka lintho tse ileng tsa etsahalla Josefa. Buka ea Luka eona, e bua haholo ka tse etsahalletseng Maria.

Bangoli ba libuka tsena ba boetse ba ngotse ka litsela tse sa tšoaneng, ba bua ka leloko leo Jesu a hlahang ho lona. Matheu o ile a batlisisa ka baholo-holo ba Josefa ’me a fumana hore mora oa Josefa e leng Jesu, e tla ba eena mojalefa boreneng ba Davida. Hobane’ng? Hobane Josefa e ne e le setloholo sa Solomone, mora oa Davida. (Mat. 1:6, 16) Empa Luka eena o ile a batlisisa ka baholo-holo ba Maria ’me a fumana hore Jesu e ne e le eena mojalefa “ho ea ka nama” boreneng ba Davida. (Bar. 1:3) Hobane’ng? Hobane Maria e ne e le setloholo sa Nathane, mora oa Davida. (Luka 3:31) Empa ke hobane’ng ha Maria a sa hlahe e le morali oa ntat’ae Heli, lethathamong la leloko la habo le hlahang Bukeng ea Luka? Hobane hangata melokong, ho hlaha batho ba batona feela. Kahoo, ha Luka a ne a bua ka Josefa a re ke mora oa Heli, o ne a bolela hore ke mokhoenyana oa Heli.—Luka 3:23.

Tsela eo Buka ea Matheu le Buka ea Luka li buang ka leloko la Jesu ka eona e bontša ka ho hlaka hore Bibele e ne e bua ’nete ha e re Jesu ke eena Mesia. Taba ea hore Jesu e ne e le setloholo sa Morena Davida e ne e tsebahala haholo hoo Bafarisi le Basaduse ba sa kang ba e hana. Buka ea Matheu le ea Luka li matlafatsa tumelo ea rona ’me li re thusa hore re tšepe hore Molimo o tla phethahatsa litšepiso tsa hae.