KA LINAKO tse ling. Mohlala, Deuteronoma 24:14, 15 e re: “U se ke ua etsa bolotsana ho mosebetsi ea hiriloeng ea khathatsong le ea futsanehileng, ebang ke oa barab’eno kapa oa bajaki ba leng naheng ea heno . . . e le hore a se ke a hoeletsa ho Jehova khahlanong le uena, ’me ea e-ba sebe ho uena.”

Tlaleho ea boipiletso nyeoeng e ’ngoe e fumanoe pel’a Ashdode ’me eona e ngotsoe lilemong tsa bo-601 ho ea ho 700 pele ho mehla ea Jesu. Ho ne ho e-na le tokomane e ngoletsoeng holim’a nkho ea letsopa eo mohlomong e neng e ngotsoe ke mosebetsi ea hlolehileng ho phetha mosebetsi oa hae. E ne e re: “Ka mor’a hore mohlanka oa hao a qete ho beha lijo-thollo tse kotutsoeng, Hoshayahu mor’a Shobay o ile a tla a nka seaparo sa mohlanka oa hao. . . Basebetsi-’moho le ’na bao ke neng ke kotula le bona har’a lebatama la letsatsi ba ka mpakela hore . . . taba eo ke e buileng ke ’nete. Ha ke na molato . . . Haeba morena a sa bone ho hlokahala hore seaparo sa ka se khutlisoe, ke kopa a nkhauhele. Ha oa lokela ho thola ha mohlanka oa hao a nketsoe seaparo.”

Rahistori Simon Schama o re boipiletso bona “bo bua le rona ka taba e fetang feela ea mosebetsi ea batlang seaparo sa hae. Bo fana ka maikutlo a hore mosebetsi enoa o ne a tseba molao oa Bibele haholo-holo o hlahang ho Levitike le Deuteronoma o khahlanong le tšoaro e mpe ea basebetsi ba futsanehileng.”