1, 2. Re lokela ho kholiseha ka eng? (Sheba setšoantšo se qalong)

SEHLOOHO se fetileng se ile sa bontša hore Diabolose o re Jehova ha se ’musi ea lokileng ebile batho ba ka phela hamonate ha ba ipusa. Na Satane o bua ’nete? Nahana hore na ho ka ba joang ha batho ba se ba phela ka ho sa feleng ba ipusa. Na ba ne ba tla phela hamonate ba sa busoe ke Molimo? Na uena u ne u ka thaba haeba u ne u ka phela ka ho sa feleng u bile u itaola?

² Ha ho na motho leha e le ofe lefatšeng ea ka u arabellang lipotso tseo. Motho e mong le e mong o lokela ho nahanisisa ka lipotso tseo. Ha re etsa joalo, re tla hlokomela hore Jehova ke eena feela ea lokelang ho busa batho. Re lokela ho tšehetsa bobusi ba hae ka lipelo tsohle. Re tlil’o hlahloba mabaka a utloahalang a tsoang ka Bibeleng a hore na ke hobane’ng ha Jehova e le eena feela ea lokelang ho busa batho.

3. Ke hobane’ng ha Jehova e le eena feela ea lokelang ho busa?

³ Jehova o lokela ho re busa hobane o matla ’ohle ebile o bopile lintho tsohle. (1 Likron. 29:11; Lik 4:24) Ho  Tšenolo 4:11, Johanne o ile a bona babusi-’moho le Kreste ba 144 000 ba re: “Jehova, Molimo oa rōna, ua tšoaneleha ho amohela khanya le tlhompho le matla, hobane u bōpile lintho tsohle, ’me ka lebaka la thato ea hao li ile tsa e-ba teng ’me tsa bōptjoa.” Kaha Jehova o bopile lintho tsohle, ke eena ea lokelang ho busa batho hammoho le mangeloi.

4. Ke hobane’ng ha ho hana bobusi ba Jehova e le ho sebelisa bolokolohi ba rona hampe?

⁴ Ha ho letho leo Satane a le bopileng. Kahoo, ha a na tokelo ea ho busa eng kapa eng. Eena hammoho le Adama le Eva, ba ile ba ikhohomosa eaba ba hana ho tšehetsa bobusi ba Jehova. (Jer. 10:23) Ke ’nete hore ba ne ba fuoe bolokolohi ba ho iketsetsa liqeto, kahoo ba ne ba ka khetha ho ipusa. Empa na ba ne ba lokela ho ipusa? Che. Le hoja batho ba ka iketsetsa liqeto, seo ha se bolele hore ba na le tokelo ea ho hana ho busoa ke Molimo ea ba bopileng. Kahoo, re tla be re sebelisa bolokolohi ba rona hampe haeba re hana ho busoa ke Jehova. Re lokela ho busoa ke Jehova kaha re hloka tataiso ea hae.

5. Ke’ng e re kholisang hore Jehova o busa ka toka?

⁵ Lebaka le leng leo ka lona Jehova a lokelang ho re busa ke hore o busa ka toka. Jehova o re: “Ke ’na Jehova, ea bontšang mosa o lerato, toka le ho loka lefatšeng; etsoe ke khahlisoa ke lintho tsena.” (Jer. 9:24) Jehova ha a laoloe ke melao ea batho hore a buse ka toka. Kaha Jehova o etsa ntho e ’ngoe le e ’ngoe ka toka, ke eena feela ea matla ’ohle ebile o busa ka toka, ke eena ea fang batho melao. Kaha “ho loka le kahlolo ke sebaka se tiisitsoeng sa terone ea [hae]” re ka kholiseha hore melao eohle ea hae le liqeto tseo a li etsang li lokile. (Pes. 89:14; 119:128) Le hoja Diabolose a tsitlallela ho re Jehova ha a buse ka toka, eena ha a khone ho etsa hore toka e be teng lefatšeng.

6. Ke hobane’ng ha Jehova e le eena ea lokelang ho busa batho?

⁶ Hape, Jehova o lokela ho re busa hobane o bohlale ebile o tseba lintho tsohle tse hlokehang hore bophelo bo be teng. Ka mohlala, o ile a fa mora oa hae matla a ho phekola mafu a hlolang lingaka. (Mat. 4:23, 24; Mar. 5:25-29) Taba ena e ne e se mohlolo ho Jehova. Oa tseba hore na ’mele o sebetsa joang ebile a ka khona ho o folisa. Jehova a ka boela a tsosa bafu a ba a thibela likoluoa tsa tlhaho.

7. Ke joang Jehova a leng bohlale ho feta batho ba lefatše?

⁷ Linaha tsa lefatše li ntse li leka ho ikopanya ho etsa hore ho be le khotso pakeng tsa tsona. Empa Jehova a ka etsa hore ho be le khotso lefatšeng a le mong kaha o bohlale. (Esa. 2:3, 4; 54:13) Ha re ntse re ithuta kamoo Jehova a leng bohlale kateng, re ka ikutloa joaloka moapostola Pauluse ha a re: “O! botebo ba maruo le bohlale le tsebo ea Molimo! Likahlolo tsa hae ke tse ke keng tsa batlisisoa hakaakang ’me litsela tsa hae ke tse ke keng tsa fuputsoa hakaakang!”—Bar. 11:33.

8. Ke’ng eo u e ratang ka bobusi ba Jehova?

⁸ Bibele ha e re bolelle feela hore na ke hobane’ng ha Jehova a lokela ho re  busa. E boetse e re bolella hore na ke hobane’ng ha bobusi ba Jehova bo phahametse ba batho. Lebaka le leng ke hore Jehova o lerato. Kaha Jehova ke “Molimo ea mohau le ea mosa, ea liehang ho halefa le ea tletseng mosa o lerato le ’nete,” rea rata ha a re busa. (Ex. 34:6) Kaha re bahlanka ba hae, oa re hlompha ebile o re hlokomela ho feta kamoo re ka itlhokomelang kateng. Jehova ha a re time eng kapa eng e ka re tsoelang molemo le hoja Diabolose a re Jehova o re tima lintho tse molemo. O ile a ba a tela mora oa hae e le hore re tle re fumane bophelo bo sa feleng.—Bala Pesaleme ea 84:11; Baroma 8:32.

9. Re tseba joang hore Molimo o tsotella e mong le e mong oa rona?

⁹ Jehova o rata e mong le e mong oa bahlanka ba hae. Ka mohlala, ho ile ha ba le nako eo ka eona Jehova a neng a sebelisa baahloli ho pholosa sechaba sa hae ho ba lireng. Nakong eo, Ruthe e ne e se Moiseraele. Empa o ile a tela lintho tse ngata hore e be morapeli oa Jehova. Jehova ha aa ka a mo tlolisa mahlo. O ile a mo hlohonolofatsa ka ho mo fa molekane a ba a mo fa mora. Ho feta moo, ha Ruthe a se a tsositsoe bafung, o tla tseba hore mora oa hae o ne a le lelokong la Mesia. Hape, o tla thaba haholo ha a fumana hore pale ea bophelo ba hae e ngotsoe ka har’a Bibele bukeng e bileng e rehelletsoeng ka eena.—Ruthe 4:13; Mat. 1:5, 16.

10. Ke’ng e bontšang hore Jehova ha se ’musi ea hatellang?

¹⁰ Jehova ha a hatelle batho bao a ba busang. Batho ba busoang ke eena ba na le bolokolohi ebile ba thabile. (2 Bakor. 3:17) Davida o ile a re: “Ho hlompheha le bokhabane li ka pel’a [Molimo], matla le thabo li sebakeng sa hae.” (1 Likron. 16:7, 27) Mopesaleme Ethane o ile a re: “Ho thaba batho ba tsebang mohoo oa thabo. Jehova, ba ntse ba tsamaea leseling la sefahleho sa hao. Ba ithabela lebitsong la hao letsatsi lohle. Ba phahamisoa ho lokeng ha hao.”—Pes. 89:15, 16.

11. Ke’ng e ka re kholisang haholoanyane hore bobusi ba Jehova bo lokile?

¹¹ Ha re lula re nahanisisa ka lintho tse molemo tseo Jehova a li etsang, re tla kholiseha le ho feta hore o lokela ho re busa. Re ikutloa joaloka mopesaleme ha a re: “Letsatsi mabaleng a hao le molemo ho feta a sekete sebakeng se seng.” (Pes. 84:10) Kaha Jehova ke eena ea re bopileng, oa tseba hore na ke lintho life tseo re li hlokang e le hore re thabe ’me o re fa tsona. Lintho tseo a batlang hore re li etse li molemong oa rona, esita le haeba ho hlokahala hore re itele.—Bala Esaia 48:17.   

12. Ke lebaka lefe le ka sehloohong leo ka lona re tšehetsang bobusi ba Jehova?

¹² Bibele e re ka mor’a hore Kreste a buse ka lilemo tse sekete, ho na le batho ba tla hana ho busoa ke Jehova. (Tšen. 20:7, 8) Hobane’ng? Ka mor’a hore Satane a lokolloe, o tla ba khelosa a etse hore ba nahane hore ba ka ipusa. A ka ’na a etsa hore batho ba nahane hore ba tla phela hamonate ba sa busoe ke Jehova. Empa o tla be a le leshano. Kahoo re lokela ho ipotsa: ‘Na nka kholoa leshano leo?’ Re ke ke ra le kholoa haeba re rata Jehova re bile re  mo sebeletsa ka lebaka la lintho tse molemo tseo a re etselitseng tsona le hore ke eena ea lokelang ho re busa. Re tla phela hamonate hafeela re busoa ke Jehova.

13. Re ka boela ra etsa’ng ho tšehetsa puso ea Jehova?

¹³ Re lokela ho tšehetsa bobusi ba Jehova ka pelo eohle. Re se re hlokometse hore Jehova ke eena feela ea lokelang ho re busa ’me bobusi ba hae bo lokile. Re ka tšehetsa bobusi ba Jehova ka hore re lule re tšepahalla ho sebeletsa Jehova. Re ka boela ra tšehetsa bobusi ba Jehova joang? Re ka etsa joalo ka hore re etse lintho ho ea ka thato ea hae. Ha re etsa joalo, re bontša hore re rata bobusi ba Jehova ’me rea bo tšehetsa.—Bala Baefese 5:1, 2.

14. Baholo le bo-ntate ba ka etsisa Jehova joang?

¹⁴ Re ithutile Bibeleng hore Jehova o busa ka lerato. Kahoo, bo-ntate le baholo ba lokela ho etsisa Jehova ka hore ba hlokomele ba malapa le liphutheho ka lerato ’me e se ke ea e-ba bahatelli. Pauluse o ne a etsisa Jehova le Jesu. (1 Bakor. 11:1) O ne a sa qobelle batho ho etsa lintho ka tsela e nepahetseng kapa hona ho ba nyenyefatsa. Ho e-na le hoo, o ne a ba kopa. (Bar. 12:1; Baef. 4:1; Filem. 8-10) Ke eona tsela eo Jehova a etsang lintho ka eona. Kahoo, re lokela ho mo etsisa.

15. Ke joang re bontšang hore re tšehetsa bobusi ba Jehova ha re tšehetsa liqeto tseo mokhatlo oa hae o li etsang?

¹⁵ Re ka etsa’ng ho bontša hore re hlompha Jehova? Ka hore re tšehetse liqeto tseo mokhatlo oa hae o li etsang leha re sa li utloisise kapa re sa lumellane  le tsona. Le hoja batho ba lefatše ba sa etse lintho joalo, ke eona tsela eo lintho li etsoang ka eona ka har’a mokhatlo oa Jehova. (Baef. 5:22, 23; 6:1-3; Baheb. 13:17) Kaha Jehova oa re rata, o tla re hlohonolofatsa ha re tšehetsa liqeto tseo mokhatlo oa hae o li etsang.

16. Batho ba tšehetsang bobusi ba Jehova ba etsa liqeto joang?

¹⁶ Re ka boela ra bontša hore re tšehetsa bobusi ba Jehova ha re etsa liqeto. Jehova a ke ke a re fa molao nthong e ’ngoe le e ’ngoe. Ho e-na le hoo, o re tataisa ka ho re bolella hore na o ikutloa joang. Ka mohlala, ha a re fe melao ea hore na re apare liaparo life. Ho e-na le hoo, o re khothalletsa hore re apare liaparo tse bontšang hore rea itlhompha le hore re Bakreste. (1 Tim. 2:9, 10) Hape, ha a batle hore re etse liqeto tse tla khopisa batho ba bang. (1 Bakor. 10:31-33) Re tla be re bontša hore re tšehetsa bobusi ba Jehova ha re etsa liqeto re itšetlehile ka tsela eo Jehova a ikutloang ka eona, eseng ka tsela eo rona re ikutloang ka eona.

17, 18. Banyalani ba ka bontša joang hore ba tšehetsa bobusi ba Jehova?

¹⁷ Malapa a Bakreste le ’ona a ka tšehetsa bobusi ba Jehova. Ka mohlala, ho ka etsahala’ng haeba mathata ao banyalani ba sa a lebellang a hlaha lenyalong hoo ba ka bang ba nyahama? Banyalani ba ka nahana ka tsela eo Jehova a ileng a sebelisana le Baiseraele ka eona. Jehova o ne a ipitsa monna oa sechaba sa Iseraele. (Esa. 54:5; 62:4) Mathata a ileng a hlaha a ne a le boima. Empa Jehova ha aa ka a potlakela ho lahla Baiseraele. (Bala Pesaleme ea 106:43-45) Ha re ithuta lintho tsena ka Jehova, re mo rata haholoanyane.

¹⁸ Banyalani ba ratang Jehova ba lokela ho mo etsisa ka hore ha mathata a hlaha, ba se ke ba lahla balekane ba bona ka mabaka a khahlanong le Mangolo. Ba lokela ho hlokomela hore Jehova o ba kopantse ’me o batla hore ba lule ba le ’moho. Ba ka hlalana haeba molekane e mong a entse bohlola. (Mat. 19:5, 6, 9) Ba ka bontša hore ba tšehetsa bobusi ba Jehova ka hore ba sebetse ’moho ho rarolla mathata ao ba nang le ’ona.

19. Ha re entse liphoso, re lokela ho etsa’ng?

¹⁹ Kaha ha rea phethahala, ka linako tse ling re tla etsa lintho tse tla utloisa Jehova bohloko. Kahoo, Jehova o fane ka Mora oa hae molemong oa rona e le hore ha re mo siteloa, a ka re tšoarela. (1 Joh. 2:1, 2) Ho e-na le hore re lule re utloile bohloko ka lebaka la liphoso tseo re li entseng, re lokela ho loanela hore re se ke ra li pheta. Ha re bontša hore re rata Jehova, o tla re tšoarela a be a re thuse hore re se ke ra pheta liphoso tsa rona le nakong e tlang.—Pes. 103:3.

20. Ke hobane’ng ha re lokela ho tšehetsa bobusi ba Jehova hona joale?

²⁰ Batho bohle ba tla phela paradeiseng, ba tla busoa ke Jehova ba be ba mo tsebe haholoanyane. (Esa. 11:9) Empa le hona joale re ka ithuta lintho tse ngata ka eena. Haufinyane qoso ea Satane e tla rarolloa. Kahoo, a re tšehetseng bobusi ba Jehova hona joale ka hore re mo mamele, re mo sebeletse ka botšepehi ’me re etse sohle se matleng a rona ho mo etsisa.