KAOFELA ha rona re thabela ho tsejoa re le batho ba molemo. Empa ha ho bonolo hore re be batho ba molemo mehleng ena. Le leng la mabaka ke hobane re phela har’a batho “ba hlokang lerato la se molemo.” (2 Tim. 3:3) Ha ba mamele melao ea Jehova, ba re “botle ke bobe le bobe ke botle.” (Esa. 5:​20) Le rona re ka thatafalloa ho ba batho ba molemo ka lebaka la tsela eo re holisitsoeng ka eona le ho se phethahale. Re ka ikutloa joaloka morali’abo rona e mong ea ileng a re: “Ho thata hore ke utloisise hore nka ba motho ea molemo.”

Litaba tse monate ke hore re ka khona ho ba batho ba molemo. Moea oa Jehova o ka re thusa hore re be batho ba molemo ’me o matla ho feta mathata ’ohle ao re ka thulanang le ’ona a ka re sitisang ho ba molemo. A re hlahlobeng hore na ho ba molemo ho bolela’ng le hore na re ka etsa’ng hore re be batho ba molemo ka linako tsohle.

Motho ea molemo ke ea qobang ho etsa lintho tse mpe, o itšoere hantle ebile o loanela ho etsa lintho tse nepahetseng ka linako tsohle. O batla menyetla ea ho thusa batho ba bang ka linako tsohle ’me oa ba thusa.

Ha ho potang hore re lula re bona batho ba etsetsang malapa a bona le metsoalle ea bona lintho tse molemo. Empa na ho ba molemo ho fella moo feela? ’Nete ke hore re ke ke ra khona ho ba batho ba molemo ka linako tsohle, etsoe le Bibele e re “ha ho motho ea lokileng lefatšeng ea tsoelang pele ho etsa se molemo ’me a sa etse sebe.” (Moek. 7:​20) Moapostola Pauluse o ile a lumellana le taba ena eaba o re: “Kea tseba hore ho ’na, ke hore, nameng ea ka, ha ho lule letho le molemo.” (Bar. 7:​18) Kahoo, ke habohlokoa hore re ithute ho Jehova e le hore re ka ba batho ba molemo.

Jehova Molimo ke mohlala o motle oo re ka o etsisang. Bibele e re ka eena: “U molemo ’me u etsa se molemo. Nthute melao ea hao ea tsamaiso.” (Pes. 119:​68) A re hlahlobeng litsela tse peli tse hlahang temaneng ena tse buang ka hore Jehova o molemo.

O molemo. Jehova o lula a le molemo ka linako tsohle. O ile a re ho Moshe: “Ke tla etsa hore molemo oohle oa ka o fete ka pel’a sefahleho sa hao.” Jehova o ile a bontša Moshe hore o molemo a ba a mo bontša le khanya ea hae. Eaba Moshe o utloa lentsoe le hlalosang Jehova tjena: “Jehova, Jehova, Molimo ea mohau le ea mosa, ea liehang ho halefa le ea tletseng mosa o lerato le ’nete, ea bolokelang ba likete mosa o lerato, ea tšoarelang phoso le tlolo le sebe, empa ho hang a ke ke a lokolla kotlong.” (Ex. 33:​19; 34:​6, 7) Kahoo rea utloisisa hore ntho e ’ngoe le e ’ngoe eo Jehova a e etsang e molemo. Le hoja ho ne ho se na motho ea molemo joaloka Jesu lefatšeng, o ile a re: “Ha ho ea molemo, haese a le mong, Molimo.”​—Luka 18:19.

Mesebetsi ea Jehova e molemo. Lintho tsohle tseo Jehova a li etsang li paka hore o molemo. Bibele e re: “Jehova o molemo ho bohle, mehauhelo ea hae e holim’a mesebetsi  eohle ea hae.” (Pes. 145:9) Kaha Jehova o molemo ebile ha a leeme, o file batho bohle bophelo le lintho tsohle tseo ba li hlokang. (Lik. 14:​17) Taba ea hore Jehova oa re tšoarela ha re mo sitetsoe e bontša hore o molemo. Mopesaleme o ile a re: “Jehova, u molemo ’me u itokiselitse ho tšoarela.” (Pes. 86:5) Re kholisehile hore “Jehova a ke ke a hanela ba tsamaeang ka ho hloka molato ka ntho leha e le efe e ntle.”​—Pes. 84:11.

Jehova o re bopile ka setšoantšo sa hae, kahoo re ka khona ho ba batho ba molemo le ba etsang lintho tse ntle. (Gen. 1:​27) Ha ho itlele feela hore re be batho ba molemo, ke kahoo Jehova a re khothaletsang hore re ‘ithute ho etsa se molemo.’ (Esa. 1:​17) Empa re ka etsa’ng e le hore re be batho ba molemo? A re hlahlobeng litsela tse tharo tse ka re thusang.

Ea pele, re lokela ho kopa Jehova hore a re fe moea o halalelang, kaha o ka re thusa hore re be batho ba molemo mahlong a hae. (Bagal. 5:​22) Moea oa Molimo o ka re thusa ho rata lintho tse molemo le ho hloea tse se nang thuso. (Bar. 12:9) Ha e le hantle, Bibele e re Jehova a ka re “tiisa ketsong e ’ngoe le e ’ngoe e molemo le lentsoeng le leng le le leng le molemo.”​—2 Bathes. 2:​16, 17.

Ea bobeli, re lokela ho bala Lentsoe la Molimo. Jehova o re ruta ka “tsela eohle ea se molemo,” e le hore re ka tšoaneleha “bakeng sa mosebetsi o mong le o mong o molemo.” (Liprov. 2:9; 2 Tim. 3:​17) Ha re bala Bibele le ho nahanisisa ka lintho tseo re li balang, re tla li boloka lipelong tsa rona ’me li tla re thusa ho etsa thato ea Molimo. Ha re etsa joalo, ho tla tšoana leha e ka re bolokile matlotlo ao re ka a sebelisang nako e tlang.​—Luka 6:​45; Baef. 5:9.

Ea boraro, re lokela ho leka ka hohle ho ba ‘baetsisi ba se molemo.’ (3 Joh. 11) Ho na le mehlala ea batho ba hlahang ka Bibeleng bao re ka ba etsisang. Haholo-holo re lokela ho etsisa Jehova le Jesu. Hape, re ka boela ra ithuta ka batho ba ileng ba tsebahala ka ho ba molemo. Ba bang ba bona ke Tabitha le Barnabase. (Lik. 9:​36; 11:​22-24) Ho nahanisisa ka litlaleho tsa bona le ka lintho tseo ba ileng ba li etsa molemong oa batho ba bang ho ka u thusa. Ebe u leka ho bona hore na u ka ba etsisa joang ka ho thusa batho ba bang ka lapeng le ka phuthehong. Hape u ka leka ho bona hore na Tabitha le Barnabase ba ile ba rua molemo joang ha ba ne ba etsetsa batho ba bang lintho tse molemo. Le uena u tla rua molemo ka tsela e tšoanang.

Re ka boetse ra nahana ka mehlala ea batho ba mehleng ena, ba etsetsang batho ba  bang lintho tse molemo. Mohlala, baholo ba sebetsa ka thata hore e be batho ba molemo. Re ke ke ra lebala baralib’abo rona ba sebetsang ka thata hore “e be mesuoe ea se molemo.” (Tite 1:8; 2:3) Morali’abo rona Roslyn o re: “Motsoalle oa ka o ikitlaeletsa ho thusa batho ba bang ka phuthehong. O nahana ka maemo a bona ebe o leka ho ba thusa ka litsela tse fapa-fapaneng ’me u lula a ba khoaelletse ho itseng e le ho bontša hore o ntse a nahanne ka bona. Kannete ke motho ea molemo.”

Jehova o khothaletsa batho ba hae hore ba ‘batle se molemo.’ (Amose 5:​14) Ha re etsa joalo, re tla rata lintho tseo Jehova a reng li molemo re be re ikemisetse ho li etsa.

Ho ba batho ba molemo ha ho bolele ho khahlisa batho ka ho ba fa limpho tse turu. Mohlala, na u nahana hore setaki se ka taka setšoantšo ka borache bo le bong kapa a mabeli feela? Ha e le hantle se hloka a mangata. Ka tsela e tšoanang, leha re thusa batho ka lintho tse nyaane, ba tla bona hore re batho ba molemo.

Bibele e re re lokela ho ba malala-a-laotsoe e le hore re ka thusa batho ba bang. (2 Tim. 2:​21; Tite 3:1) Ha re nahana ka maemo a batho ba bang, re tla batla litsela tsa ho ba thusa. (Bar. 15:2) Re ka arolelana lintho tseo re nang le tsona le bona. (Liprov. 3:​27) Re ka ba memela lijong ’me ra qoqa ka lintho tse khothatsang. Haeba ho e-na le motho ea kulang, re ka mo etela kapa ra mo letsetsa. Re ka ’na ra batla menyetla ea ho bua se “molemo bakeng sa ho haha kamoo tlhokahalo e ka bang kateng, e le hore e ka fana ka se molemo ho ba e utloang.”​—Baef. 4:29.

Re ka etsisa Jehova ka hore re batle menyetla ea ho etsetsa batho ba bang lintho tse molemo. Kahoo, re qoba ho ba leeme. Tsela e molemo eo re ka etsang joalo ka eona ke ka hore re rute batho ka ’Muso oa Molimo. Joalokaha Jesu a re laetse, re leka ho ba molemo le ho batho ba re hloileng. (Luka 6:​27) Ha ho phoso ho ba mosa le ho ba molemo ho batho bohle kaha “ha ho molao o khahlanong le lintho tse joalo.” (Bagal. 5:​22, 23) Haeba re le batho ba molemo esita leha re hlorisoa kapa re e-na le mathata, re ka etsa hore batho ba bang ba batle ho sebeletsa Jehova.​—1 Pet. 3:​16, 17.

“Motho ea molemo o tla khotsofalla liphello tsa mesebetsi ea hae.” (Liprov. 14:​14) Tse ling tsa liphello tseo ke life? Ha re etsetsa batho ba bang lintho tse molemo, le bona ba tla re etsetsa ka tsela e tšoanang. (Liprov. 14:​22) Re lokela ho ba molemo ho batho bohle esita le ho ba re hloileng kaha ho etsa joalo ho ka ’na ha etsa hore ba fetole tsela eo ba nahanang ka eona le eo ba etsang lintho ka eona.​—Bar. 12:20.

Ha re le batho ba molemo re loanela ho etsa lintho tse ntle ’me ka tsela eo re itsoela molemo. Bara le barali babo rona ba bangata ba tiisa ’nete ena. Mohlala, Morali’abo rona Nancy o re: “Ke ne ke sa tsotelle, ke itšoere hampe ebile ke sa hlomphe. Leha ho le joalo, ha ke ithuta ka Jehova le melao ea hae, ke ile ka bona hore o molemo eaba ke qala ho mo mamela ’me ka thaba. Hona joale ke na le seriti ebile kea itlhompha.”

Lebaka le ka sehloohong leo ka lona re batlang ho ba batho ba molemo ke hobane re batla ho thabisa Jehova. Jehova oa bona ha re le molemo le haeba batho ba bang ba sa bone. Oa bona ha re etsa lintho tse molemo ka linako tsohle. (Baef. 6:​7, 8) Joale, Jehova o re putsa joang? Bibele e re: “Ea molemo o fumana kamohelo e tsoang ho Jehova.” (Liprov. 12:2) Ka hona, ha re ikemisetseng ho lula re le batho ba molemo. Jehova o tšepisa hore o tla fana ka “khanya le tlhompho le khotso bakeng sa e mong le e mong ea etsang se molemo.”​—Bar. 2:10.