1. Jesu o ile a fa barutuoa ba hae taelo efe? (Sheba setšoantšo se sekoahelong.)

BOSIUNG ba pele Jesu a e-shoa, o ile a fa barutuoa ba hae taelo e ikhethang. O ile a re: “Le ratane feela joalokaha ke le ratile.” O ile a ekeletsa ka hore: “Bohle ba tla tseba ka sena hore le barutuoa ba ka, haeba le e-na le lerato har’a lona.” ​—Joh. 13:​34, 35.

2. Ke hobane’ng ha ho le bohlokoa ho rata batho ba bang?

² Jesu o ile a re ho tla ba bonolo hore batho bohle ba bone balateli ba hae haeba ba ratana ka tsela eo a ba ratileng ka eona. Taba eo e ne e le ’nete mehleng ea baapostola ’me ho ntse ho le joalo le mehleng ena. Ke kahoo ho leng bohlokoa hore re tsoele pele re rata batho ba bang le maemong a thata.

3. Re tl’o hlahloba eng sehloohong see?

³ Kaha ha rea phethahala, ha ho bonolo hore re rate batho ba bang ho tsoa pelong. Empa leha ho le joalo, re lokela ho leka ho etsisa Jesu. Sehloohong sena re tl’o ithuta hore na lerato le ka re thusa joang hore re be batho ba bopang khotso, ba seng leeme hape re amohele baeti. Ha u ntse u bala sehlooho sena ipotse: ‘Nka ithuta’ng ho Bakreste-’moho le ’na ba ileng ba tsoela pele ho rata batho ba bang le hoja ho ne ho le thata ho etsa joalo?’

4. Ho ea ka Matheu 5:​23, 24, ke hobane’ng ha re lokela ho bopa khotso le motho le haeba a re koatetse?

⁴ Jesu o re rutile hore na ke hobane’ng ha ho le bohlokoa ho bopa khotso le Mokreste-’moho le rona eo re sa utloaneng le eena. (Bala Matheu 5:​23, 24.) O ile a toboketsa taba ena  ea hore re lokela ho utloana le batho ba bang haeba re batla ho khahlisa Molimo. Jehova o nyakalla haholo haeba re etsa sohle se matleng a rona hore re be le khotso le bara le barali babo rona. A ke ke a amohela borapeli ba rona haeba re jara batho ba bang ka pelo ebile re hana ho bopa khotso le bona.​—1 Joh. 4:20.

5. Mor’abo rona e mong o ile a thatafaletsoa ke eng hore a bope khotso?

⁵ Ka linako tse ling ho ka ba thata ho rona hore re bope khotso. Ke eng e ka re thatafaletsang? Nahana ka taba ena e ileng ea etsahalla Mor’abo rona Mareka. * O ile a utloa bohloko haholo ha mor’abo rona e mong a mo nyelisa a bile a bua lintho tse seng monate ka eena ho batho ba bang ka phuthehong. Mor’abo rona Mareka o ile a etsa’ng? O re: “Ke ile ka utloa bohloko haholo eaba ke mo joetsa hore a utloe hantle!” Mor’abo rona Mareka o re ka mor’a moo o ile a utloa a soabile eaba o leka ho kopa tšoarelo ho mor’abo rona le ho bopa khotso. Empa mor’abo rona o ile a hana ho bopa khotso le eena. Qalong, Mor’abo rona Mareka o ile a re: ‘Ke hobane’ng ha ke ntse ke ituba?’ Molebeli oa potoloho o ile a khothaletsa Mor’abo rona Mareka hore a se ke a tela. Joale, Mor’abo rona Mareka o ile a etsa’ng?

6. (a) Mor’abo rona Mareka o ile a phehella ho bopa khotso joang? (b) O ile a sebelisa Lengolo la Bakolose 3:​13, 14 joang?

⁶ Mor’abo rona Mareka o ile a itlhahloba eaba oa bona hore ka linako tse ling o inka a phahametse batho ba bang. A hlokomela hore o lokela ho fetola tsela eo a etsang lintho ka eona. (Bakol. 3:​8, 9, 12) O ile khutlela ho mor’abo rona eaba ka boikokobetso o kopa tšoarelo ka lebaka la tsela eo a ileng a itšoara ka eona. O ile a boela a ngolla mor’abo rona eo mangolo a mo bolella kamoo a leng masoabi kateng le kamoo a batlang hore e boele ebe metsoalle hape. A ba a phaella ka hore a mo fe limpho tseo a neng a nahana hore o tla li rata. Ka bomali-mabe  mor’abo rona eo o ile a tiisa hlooho eaba ha a mo tšoarele, a tsoela pele a jarile sekhopi seo. Mor’abo rona Mareka o ile a lula a mamela taelo ea Jesu ea hore a rate Bakreste-’moho le eena a be a ba tšoarele. (Bala Bakolose 3:​13, 14.) Esita le haeba batho ba bang ba ke ke ba lumela ho bopa khotso le rona, ho ba rata ka tsela eo Jesu a ileng a re rata ka eona ho tla etsa hore re ba tšoarele re be re rapelle hore lintho li loke nakong e tlang.​—Mat. 18:​21, 22; Bagal. 6:9.

7. (a) Jesu o ile a re khothaletsa hore re etse’ng? (b) Morali’abo rona e mong o ile a tobana le bothata bofe?

⁷ Jesu o ile a re khothaletsa hore re leke ho tšoara batho ba bang ka tsela eo re batlang hore ba re tšoare ka eona. O ile a re re se ke ra rata batho ba re ratang feela. (Luka 6:​31-33) Le hoja taba ee e ka ba ntho e sa tloaelehang, u ka etsa’ng ha Mokreste-’moho le uena a qoba ho kopana le uena a bile a sa batle ho u lumelise libokeng? Morali’abo rona Lara o ile a thulana le boemo bona. O re: “Morali’abo rona e mong o ne a sa batle ho ntumelisa ’me ke ne ke sa tsebe hore na sesosa ke’ng. Ke ile ka tšoenyeha haholo ’me ke ne ke se ke sa thabele ho ea libokeng.” Qalong, Morali’abo rona Lara o ne a re: ‘Ha se molato oa ka, ho feta moo, batho ba bang ka phuthehong ba hlokometse hore morali’abo rona o se a etsa lintho ka tsela e sa tloaelehang.’

8. Morali’abo rona Lara o ile a etsa’ng ho bopa khotso, hona re ithuta’ng mohlaleng oa hae?

⁸ Morali’abo rona Lara o ile a nka mehato ea hore a bope khotso. O ile a rapela Jehova ’me a etsa qeto ea ho bua le morali’abo rona. Ba ile ba bua ka bothata boo ’me ba bopa khotso. Lintho li ile tsa bonahala li lokile. Morali’abo rona Lara o re: “Empa hamorao morali’abo rona o ile a etsa ntho e tšoanang le eo a ileng a e etsa pele. Ke ile ka nyahama haholo.” Qalong, Morali’abo rona Lara o ile a utloa eka o tla thaba haeba morali’abo rona a ka fetola tsela eo a etsang lintho ka eona. Empa hamorao Morali’abo rona Lara o ile a hlokomela hore ntho eo a ka e etsang ke hore a tsoele pele a rata morali’abo le ho mo “tšoarela ka bolokolohi.” (Baef. 4:​32–5:2) O ile a hopola  hore lerato la Bakreste ba ’nete “ha le boloke tlaleho ea bobe. Le jara lintho tsohle, le lumela lintho tsohle, le tšepa lintho tsohle, le mamella lintho tsohle.” (1 Bakor. 13:​5, 7) Ha a ka hlola a tšoenyeha ka taba eo. Ka mor’a nako, morali’abo rona eo o ile a qala ho mo phutholohela. Ha u phehella ho bopa khotso le bara le barali babo rona ebile u tsoela pele ho ba rata, u ka kholiseha hore “Molimo oa lerato le oa khotso” o tla ba le uena.​—2 Bakor. 13:11.

9. Ho ea ka Liketso 10:​34, 35, ke hobane’ng ha re lokela ho qoba ho ba leeme?

⁹ Jehova ha a leeme. (Bala Liketso 10:​34, 35.) Re bontša ka ho se be leeme hore re bana ba hae. Re mamela taelo ea hore re rate baahelani ba rona joalokaha re ithata ’me re boetse re etsa hore ho lule ho e-na le khotso pakeng tsa rona le Bakreste-’moho.​—Bar. 12:​9, 10; Jak. 2:​8, 9.

10-11. Morali’abo rona e mong o ile a hlola bothata ba ho ba le maikutlo a fosahetseng joang?

¹⁰ Batho ba bang ba ka ’na ba thatafalloa ke ho se be leeme. A re bone se ileng sa etsahalla morali’abo rona e mong ea bitsoang Ruthe. Ha e sa le mocha, ho ile ha e-ba le ho se utloisisane pakeng tsa hae le motho ea tsoang naheng e ’ngoe. Taba ee e ile ea etsa hore a ikutloe joang? Morali’abo rona Ruthe o re: “Ke ile ka hloea ntho e ’ngoe le e ’ngoe ka naha ea habo. Ke ne ke nahana hore le batho ba bang ba tsoang naheng eo ba tšoana le eena ho akarelletsa le bara le barali babo rona.” Morali’abo rona Ruthe o ile a hlola bothata boo joang?

¹¹ Morali’abo rona Ruthe o ile a bona hore o lokela ho loantša bothata ba ho se be le maikutlo a nepahetseng. O ile a bala ka litlaleho tse tsoang naheng eo bukeng ea selemo. O re: “Ke ile ka sebetsa ka thata e le hore ke loantše maikutlo ao ke neng ke e-na le ’ona ka batho ba moo. Ke ile ka hlokomela hore bara le barali babo rona ba moo ba sebeletsa Jehova ka cheseho. Ke ile ka bona hore le bona ke karolo ea mokhatlo oa Jehova o lefatšeng.” Ka mor’a nako, Morali’abo rona Ruthe o ile a hlokomela hore o lokela ho rata batho ba bang. O re: “Nako eohle ha ke kopana le bara le barali babo rona ba tsoang naheng eo ke etsa ka hohle hore ke be botsoalle ho bona. Ke ile ka bua le bona ’me ka ba tseba haholoanyane.” Phello e ile ea e-ba efe? O re: “Ka mor’a nako boikutlo ba ka bo ile ba fetoha.”

12. Morali’abo rona Sara o ne a e-na le bothata bofe?

¹² Batho ba bang ba ka ’na ba ba leeme empa ba sa hlokomele. Mohlala, Morali’abo rona Sara o ne a nahana hore ha a leeme hobane o ne a sa ahlole batho ho ea ka morabe oa bona, maemo a bona a lichelete kapa boikarabelo boo ba nang le bona ka mokhatlong. Empa o boetse oa lumela hore o ne a le leeme. Ka tsela efe? Morali’abo rona Sara o ne a tsoa lelapeng la barutehi ’me o ne a batla ho tloaelana le batho ba rutehileng feela. O ile a ba a bolella motsoalle oa hae hore eena o etsa metsoalle le batho ba rutehileng feela. Hape o qoba ho ba motsoalle oa ba sa rutehang. Ho hlakile hore, morali’abo rona Sara o ne a lokela ho fetola tsela eo a etsang lintho ka eona. Joang?

13. Re ka ithuta’ng tseleng eo Morali’abo rona Sara a ileng a etsa lintho ka eona?

¹³ Mopotolohi e mong o ile a thusa morali’abo rona Sara hore a itlhahlobe. Morali’abo rona Sara o re: “O ile a mpabatsa ka hore ke sebeletsa Jehova ka botšepehi, ke fana ka likarabo tse monate hape ke tseba Mangolo. Ka mor’a moo o ile a re ha re ntse re e-ba le tsebo e eketsehileng, re lokela ho ba le makhabane a kang boikokobetso le mohau.”  Morali’abo rona Sara o ile a etsa lintho tseo mopotolohi a mo elelitseng ka tsona. O re: “Ke hlokometse hore ntho ea bohlokoa ke ho ba lerato hape re be mosa.” Hamorao, o ile a qala ho tšoara bara le barali babo rona ka tsela e fapaneng. O re: “Ke ile ka leka ho utloisisa hore na ke makhabane a fe a bona ao Jehova a a ratang.” Taba ee e re ama joang? Le ka mohla re se ke ra nahana hore re phahametse batho ba bang hobane feela re rutehile. Haeba re e-na le lerato bakeng sa mokhatlo oohle oa barab’abo rona, re tla qoba ho ba leeme.​—1 Pet. 2:17.

14. Ho ea ka Baheberu 13:​16, Jehova o ikutloa joang ha re amohela baeti?

¹⁴ Jehova oa thaba ha re amohela baeti. (Bala Baheberu 13:​16.) O nka ho amohela baeti e le karolo ea borapeli haholo-holo ha re thusa batho ba hlokang. (Jak. 1:​27; 2:​14-17) Kahoo, Bibele e re khothaletsa hore re latele “mokhoa oa ho amohela baeti.” (Bar. 12:​13) Ha re amohela baeti, re bontša batho ba bang hore kannete rea ba rata, rea ba tsotella ebile re batla hore e be metsoalle ea rona. Kaha sejo senyane ha se fete molomo, Jehova oa thaba ha re arolelana le batho ba bang lijo le linomapholi tseo re nang le tsona leha re qeta nako le bona. (1 Pet. 4:​8-10) Empa ka nako e ’ngoe ho ka ba le lintho tse re sitisang ho amohela baeti.

15-16. (a) Ke hobane’ng ha batho ba bang ba ikutloa hore ba ke ke ba khona ho amohela baeti? (b) Morali’abo rona Edit o ile a hlola bothata ba ho ba leqe ho amohela baeti joang?

¹⁵ Tsela eo re hotseng ka eona e ka ’na ea etsa hore re be leqe ho amohela baeti. Nahana ka mohlolohali e mong ea bitsoang Edit. Pele e e-ba Paki, o ne a sa rate ho ba har’a batho. O ne a bona eka batho ba bang ba ka amohela baeti hantle ho mo feta.

¹⁶ Ka mor’a hore e be Paki, o ile a fetola tsela eo a neng a nahana lintho ka eona. Hanyane ka hanyane o ile a itloaetsa ho amohela baeti. O re: “Ha ho ne ho hahuoa holo, moholo e mong o ile a mpolella hore ho na le banyalani ba tl’o re thusa ’me o ile a mpotsa hore na nka ba amohela ka libeke tse peli. Ke ile ka hopola kamoo Jehova a ileng  a hlohonolofatsa mohlolohali oa Sarepta kateng.” (1 Mar. 17:​12-16) Morali’abo rona Edit o ile a ba amohela ka mofuthu. Na o ile a fumana litlhohonolofatso? O re: “Ba ile ba lula likhoeli tse peli ho e-na le libeke tse peli. Nako eo re e qetileng re le ’moho re ile ra ba metsoalle e haufi.” O ile a rua molemo haholo hobane o ile a fumana metsoalle phuthehong ea hae. Hona joale ke pula-maliboho ’me o thabela hore bara le barali babo rona ba eang tšimong le eena ba tle ha hae ba tl’o thabela lino-mapholi. O re: “Kea thaba ha ke fana. Hape ke fumana litlhohonolofatso tse ngata.”​—Baheb. 13:​1, 2.

17. Mor’abo rona Luka le mosali oa hae ba ile ba hlokomela’ng?

¹⁷ Ho ka ’na ha etsahala hore ebe re se re ntse re amohela baeti empa na re ka ntlafatsa? Ka mohlala, Mor’abo rona Luka le mosali oa hae ba rata ho amohela baeti. Hangata ba ne ba tloaetse ho mema batsoali ba bona, beng ka bona, metsoalle le molebeli oa potoloho le mosali oa hae. Leha ho le joalo, Mor’abo rona Luka o re: “Re ile ra hlokomela hore re ne re tloaetse ho mema batho ba haufi le rona feela.” Mor’abo rona Luka le mofumahali oa hae ba ile ba ntlafatsa hokae tabeng ea ho amohela baeti?

18. Mor’abo rona Luka le mofumahali oa hae ba ile ba ntlafatsa hokae tabeng ea ho amohela baeti?

¹⁸ Banyalani bana ba ile ba fetola tsela eo ba etsang lintho ka eona ka mor’a hore ba nahane ka mantsoe a Jesu a reng: “Haeba le rata ba le ratang, le na le moputso ofe?” (Mat. 5:​45-47) Ba ile ba hlokomela hore ba lokela ho etsisa Jehova ea seng leeme. Kahoo, ba ile ba etsa qeto ea hore ba meme batho ba e-s’o ba meme ho hang. Mor’abo rona Luka o re: “Kaofela ha rona re ile ra natefeloa ke ho ba hammoho. Ra boela ra khothatsana le ho atamela haufi le Jehova.”

19. Re ka bontša joang hore re balateli ba Jesu, hona u ikemiselitse ho etsa’ng?

¹⁹ Re bone hore na ho rata batho ba bang ho tsoa pelong ho ka re thusa joang ho bopa khotso, ho se be leeme le ho amohela baeti. Re lokela ho loantša maikutlo a fosahetseng ao re ka bang le ’ona ’me re rate Bakreste-’moho le rona ho tsoa botebong ba pelo. Ha re etsa joalo, re tla thaba hape re tla be re bontša hore re balateli ba Jesu.​—Joh. 13:​17, 35.